ಬಸಳೆ ಸೊಪ್ಪಿನ ತಂಬುಳಿ [Basale (Indian Spinach) Soppina Thambuli]

ತಂಬುಳಿಯನ್ನು ಹೆಚ್ಚಾಗಿ ದಕ್ಷಿಣ ಕನ್ನಡ- ಉಡುಪಿ ಜಿಲ್ಲೆಯಲ್ಲಿ ಮಾಡುತ್ತಾರೆ. ಬಾಳೆಎಲೆಯಲ್ಲಿ ಉಪ್ಪು, ಉಪ್ಪಿನಕಾಯಿ, ಪಲ್ಯಗಳು ಹಾಗು ಅನ್ನ ಎಲ್ಲ ಬಡಿಸಿದ ನಂತರ, ತುಪ್ಪ ಸಾರು ಬಡಿಸುವುದರ ಮೊದಲು ತಂಬುಳಿಯನ್ನು ಅನ್ನಕ್ಕೆ ಬಡಿಸುತ್ತಾರೆ. ಇದು ತುಂಬ ಜೀರ್ಣಕಾರಿ.

ಬೇಕಾಗುವ ಸಾಮಗ್ರಿಗಳು:
ಬಸಳೆ ಸೊಪ್ಪು - 10
ಜೀರಿಗೆ - ½ ಚಮಚ
ಶುಂಠಿ - 1 ಸೆ. ಮಿ. ತುಂಡು
ಮೊಸರು / ಮಜ್ಜಿಗೆ - ½ ಕಪ್
ತೆಂಗಿನ ತುರಿ - ½ ಕಪ್
ಹಸಿ ಮೆಣಸು - 1 ರಿಂದ 2

ಉಪ್ಪು - ½ ಚಮಚ / ರುಚಿಗೆ ತಕ್ಕಷ್ಟು
ಎಣ್ಣೆ - ಸ್ವಲ್ಪ
ಒಗ್ಗರಣೆಗೆ - ಎಣ್ಣೆ, ಸಾಸಿವೆ, ಕರಿಬೇವು.

ಮಾಡುವ ವಿಧಾನ
ಬಸಳೆ ಸೊಪ್ಪನ್ನು ತೊಳೆದು, ಚೆನ್ನಾಗಿ ಒರೆಸಿ, ನಂತರ ಸಣ್ಣ ಸಣ್ಣ ತುಂಡು ಗಳನ್ನಾಗಿ ಮಾಡಬೇಕು. ಸ್ವಲ್ಪ (1 ಚಮಚ) ಎಣ್ಣೆ ಹಾಕಿ ಬಸಳೆಸೊಪ್ಪನ್ನು 5 ನಿಮಿಷ ಚನ್ನಾಗಿ ಹುರಿಯಬೇಕು. ನಂತರ ಮೇಲಿನ ಎಲ್ಲ ಸಾಮಗ್ರಿಗಳನ್ನು ಸೇರಿಸಿ ರುಬ್ಬಬೇಕು. ಮಜ್ಜಿಗೆ ಉಪಯೋಗಿಸಿದರೆ ಕೊನೆಯಲ್ಲಿ ಸೇರಿಸಿದರೆ ಸಾಕು.
ಇದನ್ನು ನಂತರ ಪಾತ್ರೆಗೆ ಹಾಕಿ, ಉಪ್ಪು ಸೇರಿಸಿ, ಬೇಕಿದ್ದಲ್ಲಿ ಸ್ವಲ್ಪ ನೀರು ಹಾಕಿ ಮಿಕ್ಸ್ ಮಾಡಬೇಕು. ಇದು ಚಟ್ನಿಗಿಂತ ಸ್ವಲ್ಪ ತೆಳ್ಳಗಿರಬೇಕು. ಕೊನೆಯಲ್ಲಿ ಒಗ್ಗರಣೆ ಸೇರಿಸಿದರೆ, ತಂಬುಳಿ ಸಿದ್ದ.