My photo
ಕರಾವಳಿ ಹುಡುಗಿ :)

Friday, December 25, 2009

ಖರ್ಜೂರ ಕೇಕ್ ಮತ್ತು ಬಾಳೆಹಣ್ಣು ಕೇಕ್ (DATE CAKE & BANANA NUT CAKE) - EGGLESS

ಖರ್ಜೂರ ಕೇಕ್ :

ಈ ಖರ್ಜೂರದ ಕೇಕ್ ರೆಸಿಪಿ ಇಲ್ಲಿಂದ. ಇದು ನಮ್ಮ ಮನೆಯಲ್ಲಿ ಫೇವರಿಟ್ ಕೇಕ್ ಹಾಗು ನನ್ನ ಹೆಚ್ಚಿನ ಫ್ರೆಂಡ್ಸ್ ಗಳಿಗೆ ಇಷ್ಟವಾದ ಕೇಕ್. ಮಾಡಲು ಸುಲಭ, ಹಾಗು ತುಂಬಾ ರುಚಿಯಾಗಿರುತ್ತದೆ.

ಬೇಕಾಗುವ ಸಾಮಗ್ರಿಗಳು:
ಖರ್ಜೂರ - 18 (ಬೀಜ ತೆಗೆದು)
ಹಾಲು - ¾ ಕಪ್
ಸಕ್ಕರೆ - ¾ ಕಪ್
ಮೈದಾ ಹಿಟ್ಟು - 1 ಕಪ್
ಎಣ್ಣೆ / ಬೆಣ್ಣೆ - ¼ ಕಪ್
ಬೇಕಿಂಗ್ ಸೋಡಾ - 1 ಚಮಚ
Dry Fruits (ಗೋಡಂಬಿ, ಒಣ ದ್ರಾಕ್ಷಿ, ವಾಲ್ ನಟ್ಸ್) - ¼ ಕಪ್



ಮಾಡುವ ವಿಧಾನ:
ಹಾಲಿನಲ್ಲಿ ಖರ್ಜೂರವನ್ನು ಸೇರಿಸಿಕೊಂಡು ಎರಡು ನಿಮಿಷ ಕುದಿಸಿರಿ. ಇದು ತಣ್ಣಗಾದ ನಂತರ ಮಿಕ್ಸಿಯಲ್ಲಿ ರುಬ್ಬಿಕೊಂಡು, ಈ ಮಿಶ್ರಣದೊಂದಿಗೆ ಸಕ್ಕರೆ, ಎಣ್ಣೆ ಸೇರಿಸಿಕೊಂಡು ಚೆನ್ನಾಗಿ ಮಿಕ್ಸ್ ಮಾಡಿಕೊಳ್ಳಿ. ಇದಕ್ಕೆ ಜರಡಿಯಾಡಿಸಿದ ಮೈದಾವನ್ನು ಸ್ವಲ್ಪ ಸ್ವಲ್ಪವೇ ಸೇರಿಸಿಕೊಂಡು ನಿಧಾನದಲ್ಲಿ ಬೆರೆಸಿರಿ. ಕೊನೆಯಲ್ಲಿ ಬೇಕಿಂಗ್ ಸೋಡಾ, ತುಂಡು ಮಾಡಿಟ್ಟ Dry fruits ಗಳನ್ನು ಸೇರಿಸಿ.


ಒಂದು ಬೇಕಿಂಗ್ ಪಾನ್ ಗೆ ಬೇಕಿಂಗ್ sprayಯನ್ನು ಸವರಿಕೊಂಡು ನಂತರ ಕೇಕ್ ನ ಮಿಶ್ರಣವನ್ನು ಸುರಿದು ಓವೆನ್ ನಲ್ಲಿ ಮಧ್ಯದ rackನಲ್ಲಿಟ್ಟು 350 F ನಲ್ಲಿ 35- 40 ನಿಮಿಷ ಬೇಯಿಸಿರಿ. ಕೇಕ್ ನ ಒಳಗಡೆ ಒಂದು ಚಾಕು ಅಥವಾ tooth pickನ್ನು ಹಾಕಿದಾಗ ಅದು ಸರಾಗವಾಗಿ ಬಂದರೆ ಕೇಕ್ ರೆಡಿಯಾಗಿದೆ. ಇದನ್ನು ಅರ್ಧ ಗಂಟೆ ತಣ್ಣಗಾಗಲು ಬಿಟ್ಟು ನಂತರ ಬೇಕಾದ ರೀತಿಯಲ್ಲಿ ತುಂಡು ಮಾಡಿಕೊಂಡು ತಿನ್ನಬಹುದು.

ಬೇಕಿಂಗ್ ಪಾನ್ ಇಲ್ಲದಿದ್ದರೆ ಯಾವುದೇ ಪಿಂಗಾಣಿಯ Oven safe ಪಾತ್ರೆಯಲ್ಲಿ ಕೇಕ್ ನ್ನು ಮಾಡಬಹುದು.
ಬೇಕಿಂಗ್ sprayಯ ಬದಲು ಪಾತ್ರೆಗೆ (ಒಂದು aluminium foil ಹಾಕಿ ಅಥವಾ ಹಾಕದೆ) ಎಣ್ಣೆ ಸವರಿಕೊಂಡು ಇದರ ಮೇಲೆ ಸ್ವಲ್ಪ ಮೈದಾಪುಡಿಯನ್ನು ಹರಡಿ ಕೊಂಡು ನಂತರ ಪಾತ್ರೆಯನ್ನು ಕವುಚಿ ಹಾಕಿ ಹೆಚ್ಚಾಗಿರುವ ಮೈದಾ ಪುಡಿಯನ್ನು ತೆಗೆದರೆ ಬೇಕಿಂಗ್ ಪಾನ್ ಸಿದ್ದ. ನಂತರ ಇದರಲ್ಲಿ ಕೇಕ್ ಮಿಶ್ರಣವನ್ನು ಹಾಕಬೇಕು. ಕೇಕ್ ಮಿಕ್ಸ್ ಕೊನೆಯಲ್ಲಿ ಇಡ್ಲಿ ಹಿಟ್ಟಿ ಗಿಂತಲೂ ಹೆಚ್ಚು ಗಟ್ಟಿಯಾಗಿರಬೇಕು.
ಬೇಕಿಂಗ್ ಪಾನ್ ನಲ್ಲಿ 2-2½ ಇಂಚು ದಪ್ಪಕ್ಕೆ ಹಿಟ್ಟು ಹಾಕಿದರೆ ಕೇಕ್ ಚೆನ್ನಾಗಿ ಬರುತ್ತದೆ. ಕೇಕ್ ಗೆ white sugar ಮತ್ತು brown sugarನ್ನು ಸಮಪ್ರಮಾಣದಲ್ಲಿ ಹಾಕಿದರೆ ಕೇಕ್ ಹೆಚ್ಚು ರುಚಿಯಾಗುತ್ತದೆ.

ಬಾಳೆಹಣ್ಣು ಕೇಕ್ / BANANA – NUT CAKE

ಬೇಕಾಗುವ ಸಾಮಗ್ರಿಗಳು:
ಬಾಳೆಹಣ್ಣು - 3 (ಪಚ್ಚೆ ಬಾಳೆ)
ಮೈದಾ ಹಿಟ್ಟು - 1¼ ಕಪ್
ಸಕ್ಕರೆ - ½ ಕಪ್
ಎಣ್ಣೆ / ಬೆಣ್ಣೆ - ¼ ಕಪ್
ಬೇಕಿಂಗ್ ಸೋಡಾ - 1 ಚಮಚ

ವೆನಿಲ್ಲಾ ಎಸೆನ್ಸ್ - 1 ಚಮಚ
ಹಾಲು - ¼ ಕಪ್
Dry Fruits (ಗೋಡಂಬಿ, ಒಣ ದ್ರಾಕ್ಷಿ, ವಾಲ್ ನಟ್ಸ್) - ¼ ಕಪ್


ಮಾಡುವ ವಿಧಾನ:
ಸಿಪ್ಪೆ ಸುಲಿದ ಬಾಳೆಹಣ್ಣನ್ನು ಮಿಕ್ಸಿಯಲ್ಲಿ ರುಬ್ಬಿಕೊಳ್ಳಿ.
ಇದಕ್ಕೆ ಮೇಲಿನ ಎಲ್ಲ ಸಾಮಗ್ರಿಗಳನ್ನು ಸೇರಿಸಿ ಮಿಕ್ಸ್ ಮಾಡಿಕೊಳ್ಳಿರಿ.
ನಂತರ ಒಂದು ಬೇಕಿಂಗ್ ಪಾನ್ ನಲ್ಲಿ ಹಾಕಿ ಓವೆನ್ನಲ್ಲಿ 350 F ನಲ್ಲಿ 35- 40 ನಿಮಿಷ ಬೇಯಿಸಿರಿ.

ತಣ್ಣಗಾದ ನಂತರ ಬೇಕಾದ ರೀತಿಯಲ್ಲಿ ತುಂಡು ಮಾಡಿಕೊಂಡು ತಿನ್ನಬಹುದು.

Tuesday, December 8, 2009

ನೀರು ದೋಸೆ ಮತ್ತು ಸೌತೆಕಾಯಿ ದೋಸೆ (neer Dose & Southekayi Dose)

ನೀರು ದೋಸೆ ಮಂಗಳೂರಿಗರ ಫೇವರಿಟ್ ದೋಸೆ. ಇದರ ಹಿಟ್ಟು ಉಳಿದ ದೋಸೆ ಹಿಟ್ಟಿಗಿಂತ ತುಂಬಾ ತೆಳ್ಳಗಾಗಿರುವ ಕಾರಣ ಈ ಹೆಸರು. ಇನ್ನೊಂದು ವಿಶೇಷ ಎಂದರೆ ಇದನ್ನು ಅಕ್ಕಿ ರುಬ್ಬಿದ ತಕ್ಷಣವೇ ಮಾಡಬೇಕು.


ಸಾಮಗ್ರಿಗಳು:
ಅಕ್ಕಿ – 1 ಕಪ್
ತೆಂಗಿನ ತುರಿ – ¼ ಕಪ್ (ತೆಂಗಿನ ತುರಿ ಸೇರಿಸದೆ ಕೂಡ ಮಾಡಬಹುದು)
ಉಪ್ಪು – ¾ ಚಮಚ / ರುಚಿಗೆ ತಕ್ಕಷ್ಟು
ನೀರು – 1 ½ ಕಪ್ ನಷ್ಟು

ವಿಧಾನ:

ಅಕ್ಕಿಯನ್ನು ಮುಳುಗವಷ್ಟು ನೀರಿನಲ್ಲಿ 6-8 ಗಂಟೆ ನೆನೆಸಿರಿ. ನಂತರ ಅಕ್ಕಿಯನ್ನು ಚೆನ್ನಾಗಿ ತೊಳೆದುಕೊಂಡು ತೆಂಗಿನ ತುರಿ ಹಾಗು ½ ಕಪ್ ನಷ್ಟು ನೀರು ಸೇರಿಸಿಕೊಂಡು ಮಿಕ್ಸಿಯಲ್ಲಿ ನಯವಾಗಿ ರುಬ್ಬಿರಿ. ಇದಕ್ಕೆ ರುಚಿಗೆ ತಕ್ಕಷ್ಟು ಉಪ್ಪು ಹಾಗು 1 ಕಪ್ ನಷ್ಟು ನೀರು ಸೇರಿಸಿ ಹಿಟ್ಟನ್ನು ಮಿಕ್ಸ್ ಮಾಡಿಟ್ಟುಕೊಳ್ಳಿ.

ಎಣ್ಣೆ ಸವರಿದ ಕಾದ ಕಾವಲಿಯಲ್ಲಿ ಒಂದು ಸೌಟು ಹಿಟ್ಟನ್ನು ತೆಗೆದುಕೊಂಡು ದೋಸೆಯನ್ನು ಮಾಡಬೇಕು. ಈ ದೋಸೆಯನ್ನು ಪುನ: ಮಗುಚಿ ಹಾಕುವ ಅಗತ್ಯ ಇರುವುದಿಲ್ಲ.

ಸಾಮಾನ್ಯವಾಗಿ, ನೀರುದೋಸೆ ಮಾಡುವಾಗ ಕಾವಲಿಯ ಒಂದು ಕೊನೆಯಲ್ಲಿ ಹಿಟ್ಟನ್ನು ಹಾಕಿ, ಕಾವಲಿಯನ್ನು ಕೈಯಿಂದ ಅಲ್ಲಾಡಿಸಿದರೆ ದೋಸೆಹಿಟ್ಟು ಇಡೀ ಕಾವಲಿಯಲ್ಲಿ ಹರಡಿಕೊಳ್ಳುತ್ತದೆ. ಈ ರೀತಿ ಮಾಡಲು ಹೊಸಬರಿಗೆ ಕಷ್ಟವಾದುದರಿಂದ, ದೋಸೆ ಹಿಟ್ಟನ್ನು ಮಧ್ಯದಲ್ಲಿ ಉಳಿದ ದೋಸೆಯಂತೆಯೇ ಹಾಕಿಕೊಂಡು ಮಾಡಬಹುದು. ಅದರ ಸಣ್ಣ ತುಣುಕನ್ನು ಈ ಕೊಂಡಿಯಲ್ಲಿ ನೋಡಬಹುದು.



A Variation : ಸೌತೆಕಾಯಿ ದೋಸೆ

ಬೇಕಾಗುವ ಸಾಮಗ್ರಿಗಳು:

ಅಕ್ಕಿ – 2 ಕಪ್

1 ಸಣ್ಣ ಸೌತೆಕಾಯಿ(=ಮುಳ್ಳುಸೌತೆಕಾಯಿ)
ಉಪ್ಪು – ರುಚಿಗೆ ತಕ್ಕಷ್ಟು
ನೀರು

ವಿಧಾನ :
ಎಳೆ ಸೌತೆಕಾಯಿಯ ಸಿಪ್ಪೆ ತೆಗೆದು ಸಣ್ಣಗೆ ಹೆಚ್ಚಿ ಅಕ್ಕಿಯೊಂದಿಗೆ ರುಬ್ಬಿಕೊಂಡು, ಕೊನೆಯಲ್ಲಿ ರುಚಿಗೆ ತಕ್ಕಷ್ಟು ಉಪ್ಪು ಹಾಗು ನೀರು ಸೇರಿಸಿಕೊಂಡು ಹಿಟ್ಟನ್ನು ತಯಾರಿಸಬೇಕು. ಸೌತೆಕಾಯಿಯು ದೋಸೆಗೆ ಒಳ್ಳೆಯ ಪರಿಮಳ ಹಾಗು ರುಚಿಯನ್ನು ಕೊಡುತ್ತದೆ.

ಹೆಚ್ಚಾಗಿ ಈ ದೋಸೆಗಳನ್ನು ತೆಂಗಿನ ಕಾಯಿ ಚಟ್ನಿ, ಅಥವಾ ಕಾಯಿತುರಿ-ಬೆಲ್ಲದ ಮಿಶ್ರಣದೊಂದಿಗೆ ತಿನ್ನುವುದು ವಾಡಿಕೆ.

ಒಂದು ವರ್ಷದ ಹಿಂದೆ ಈ " ನನ್- ಪ್ರಪಂಚ" ವನ್ನು ಕುತೂಹಲ, ಉತ್ಸಾಹದಿಂದ ಶುರು ಮಾಡಿದ್ದೆ. ಇದು ನನಗೆ ಹಲವಾರು ಸಹೃದಯಿ ಬ್ಲಾಗ್ ಗೆಳೆಯರನ್ನು ಪರಿಚಯಿಸಿದೆ. ಈ ಮೂಲಕ ನನ್ನ ಸಣ್ಣ ಪ್ರಯತ್ನವು ಸ್ವಲ್ಪವಾದರೂ ಉಪಯೋಗವಾದಲ್ಲಿ ತುಂಬಾ ಸಂತೋಷ..ಇದುವರೆಗೆ ಪ್ರೋತ್ಸಾಹಿಸಿದ ಎಲ್ಲ ಆತ್ಮೀಯರಿಗೆ ನಾನು ಆಭಾರಿ. ಹಾಗೆಯೇ ಮುಂದೆಯೂ ಕೂಡ ನಿಮ್ಮ ಪ್ರೋತ್ಸಾಹದ ನಿರೀಕ್ಷೆಯಲ್ಲಿ,
ವನಿತಾ.

Thursday, November 19, 2009

ಟೊಮೇಟೊ ಪಲ್ಯ / Tomato Sabji

ಟೊಮಾಟೊ - 2-3 (ದೊಡ್ಡ ಗಾತ್ರದ್ದು, ಸಣ್ಣಗೆ ಹೆಚ್ಚಿ)
ಈರುಳ್ಳಿ - 1 (ಸಣ್ಣಗೆ ಹೆಚ್ಚಿ)
ಬ್ಯಾಡಗಿ ಮೆಣಸಿನ ಪುಡಿ - ½ - ¾ ಚಮಚ (ಖಾರಕ್ಕೆ ತಕ್ಕಂತೆ)
ಉಪ್ಪು - ½ ಚಮಚ / ರುಚಿಗೆ ತಕ್ಕಷ್ಟು
ಸಕ್ಕರೆ - ½ ಚಮಚ
ಬೆಳ್ಳುಳ್ಳಿ - 2 (ಸಣ್ಣಗೆ ಹೆಚ್ಚಿ)
ಸಾಸಿವೆ - ½ ಚಮಚ
ಅರಿಶಿನ ಪುಡಿ - ಚಿಟಿಕೆ
ಕರಿಬೇವು - 5-6 ಎಲೆ
ಎಣ್ಣೆ - 3-4 ಚಮಚ
ಒಂದು ಪಾತ್ರೆಯಲ್ಲಿ ಎಣ್ಣೆ ಸೇರಿಸಿಕೊಂಡು ಸಾಸಿವೆ, ಬೆಳ್ಳುಳ್ಳಿ, ಕರಿಬೇವು ಸೇರಿಸಿ ಒಗ್ಗರಣೆ ಮಾಡಿಕೊಳ್ಳಬೇಕು.
ನಂತರ ಈರುಳ್ಳಿ ಸೇರಿಸಿಕೊಂಡು ಚೆನ್ನಾಗಿ ಹುರಿಯಬೇಕು. ಇದಕ್ಕೆ ಅರಿಶಿನ ಪುಡಿ, ಮೆಣಸಿನ ಪುಡಿ ಸೇರಿಸಿಕೊಂಡು ಒಂದು ನಿಮಿಷ ಹುರಿದುಕೊಂಡು, ನಂತರ ಸಣ್ಣಗೆ ಹೆಚ್ಚಿದ ಟೊಮೇಟೊವನ್ನು ಸೇರಿಸಿ ಹದಉರಿಯಲ್ಲಿ ಟೊಮೇಟೊ ಮೆತ್ತಗಾಗುವ ತನಕ (15-20 ನಿಮಿಷ) ಬೇಯಿಸಬೇಕು. ಕೊನೆಯಲ್ಲಿ ರುಚಿಗೆ ತಕ್ಕಷ್ಟು ಉಪ್ಪು, ಸ್ವಲ್ಪ ಸಕ್ಕರೆ ಹಾಗು ಕತ್ತರಿಸಿಟ್ಟ ಕೊತ್ತಂಬರಿ ಸೊಪ್ಪು ಸೇರಿಸಿ ಒಲೆಯಿಂದ ಇಳಿಸಿದರೆ ರುಚಿಯಾದ ಟೊಮೇಟೊ ಪಲ್ಯ ಸಿದ್ದ. ಈ ಪಲ್ಯವು ಚಪಾತಿಯ ಜೊತೆಗೆ ಒಳ್ಳೆಯ ಕಾಂಬಿನೇಶನ್.

Saturday, November 7, 2009

ಹೀರೆಕಾಯಿ ಸಿಪ್ಪೆ ಚಟ್ನಿ



ಹೀರೆಕಾಯಿ ಪಲ್ಯ ಅಥವಾ ಸಾಂಬಾರ್ ಮಾಡಿದ ನಂತರ ಅದರ ಸಿಪ್ಪೆಯನ್ನು ಬಿಸಾಡುವುದು ಸಾಮಾನ್ಯ....ಆ ಸಿಪ್ಪೆಯಿಂದ ಒಳ್ಳೆಯ ಚಟ್ನಿ ಮಾಡಬಹುದು.

ಹೀರೆಕಾಯಿಯನ್ನು ಚೆನ್ನಾಗಿ ತೊಳೆದುಕೊಂಡು ಅದರ ಸಿಪ್ಪೆಯನ್ನು ಚಾಕುವಿನಿಂದ ತೆಗೆಯಿರಿ. ಚಟ್ನಿ ಮಾಡ್ಬೇಕು ಅಂದ್ರೆ ಸ್ವಲ್ಪ ಜಾಸ್ತಿನೆ ತೆಗೆಯಿರಿ, ಪರವಾಗಿಲ್ಲ..ಒಂದೆರಡು ದಿನ ಇದನ್ನು ಒಂದು ಕವರ್ ನಲ್ಲಿ ಹಾಕಿ ಫ್ರಿಜ್ ನಲ್ಲಿಟ್ಟು ನಂತರವೂ ಉಪಯೋಗಿಸಬಹುದು.

ಈ ಸಿಪ್ಪೆಯನ್ನು (ಒಂದು ಹಿಡಿಯಷ್ಟು) ತೊಳೆದುಕೊಂಡು ¼ ಕಪ್ ನೀರಿನಲ್ಲಿ 5-10 ನಿಮಿಷ ಬೇಯಿಸಿ. ನಂತರ ½ ಕಪ್ ನಷ್ಟು ತೆಂಗಿನ ತುರಿ, ಖಾರಕ್ಕೆ ತಕ್ಕಷ್ಟು (2-4) ಹುರಿದ ಬ್ಯಾಡಗಿ ಮೆಣಸು , 10 ಕಾಳು ಹುರಿದ ಉದ್ದಿನ ಬೇಳೆ, ರುಚಿಗೆ ತಕ್ಕಷ್ಟು ಉಪ್ಪು ಹಾಗು ಬೇಯಿಸಿದ ಸಿಪ್ಪೆಯನ್ನು ಸೇರಿಸಿಕೊಂಡು ರುಬ್ಬಿಕೊಳ್ಳಿ. ರುಬ್ಬುವಾಗ ಸ್ವಲ್ಪ ನೀರು ಸೇರಿಸ್ಕೊಂಡು ಚಟ್ನಿಯ ಹದಕ್ಕೆ ರುಬ್ಬಿಕೊಳ್ಳಿ. ಇದನ್ನು ಒಂದು ಪಾತ್ರೆ ಯಲ್ಲಿ ತೆಗೆದುಕೊಂಡು ಒಗ್ಗರಣೆ ಸೇರಿಸಿದರೆ, ದೋಸೆ, ಚಪಾತಿ ಊಟದೊಂದಿಗೆ ಸವಿಯಲು ಒಳ್ಳೆಯ ಚಟ್ನಿ ಸಿದ್ದ.
-
ನಿಮಗೆ ಹಸಿಮೆಣಸಿನಿಂದ ಮಾಡಿದ ಚಟ್ನಿ ಇಷ್ಟವಿದ್ದರೆ, ಬೇಯಿಸಿದ ಸಿಪ್ಪೆಗೆ ಹಸಿಮೆಣಸು, ತೆಂಗಿನ ತುರಿ, ಉಪ್ಪು ಸೇರಿಸಿ ರುಬ್ಬಿ ನಂತರ ಒಗ್ಗರಣೆ ಸೇರಿಸಿದರೆ ಚಟ್ನಿ ರೆಡಿಯಾಗುತ್ತದೆ.

Sunday, October 25, 2009

ಮೆಕ್ಸಿಕನ್ ರೈಸ್ / MEXICAN RICE

ಅನ್ನ ಎಂದರೆ ಒಂದು ಮೈಲು ದೂರ ಓಡುವ ನನ್ನ ಮಗಳು ಒಂದು ದಿನ, ಸ್ಕೂಲ್ ನಿಂದ ಬಂದು ಅಮ್ಮಾ ‘I had yummy yellow rice” ಅಂದಾಗ ನನಗೆ ಆಶ್ಚರ್ಯ, ಜೊತೆಗೆ ಕುತೂಹಲ ಕೂಡ!!!
ಹಾಗೆಯೇ ಗೂಗಲ್ ನಲ್ಲಿ ಹುಡುಕಿದಾಗ yellow rice ಅಂದರೆ ಒಂದು Mexican dish, ಇದನ್ನು ಮಾಡಲು annatto ಅಥವಾ Bixa seed ನ paste ಹಾಕಬೇಕೆಂದು ಗೊತ್ತಾಯಿತು. ಮತ್ತು ಇದನ್ನು ಹಾಕದೆಯೂ ಕೂಡ Mexican rice ಮಾಡಬಹುದೆಂದು ತಿಳಿಯಿತು. ನಮ್ಮ Fried riceನ ತರಾನೆ ಟೇಸ್ಟ್ ಬರುತ್ತದೆ. ಮಾಡಲು ತುಂಬಾ ಸುಲಭ ಹಾಗು 25-30ನಿಮಿಷದ ಒಳಗೆ ಸಿದ್ದವಾಗುತ್ತದೆ. ನಾನು ಮೆಕ್ಸಿಕನ್ನರ long grain riceಗೆ ಬದಲಾಗಿ ನಮ್ಮ ಬಾಸ್ಮತಿ ಅನ್ನವನ್ನು ಉಪಯೋಗಿಸಿದೆ.

ಅಕ್ಕಿ - 1 ಕಪ್

ಈರುಳ್ಳಿ - 1 (ಉದ್ದಕ್ಕೆ ತೆಳ್ಳಗೆ ಸೀಳಿ)

ಟೊಮೇಟೊ- 1 (ಉದ್ದಕ್ಕೆ ತೆಳ್ಳಗೆ ಸೀಳಿ)

ಕ್ಯಾಪ್ಸಿಕಂ - ½ (ಉದ್ದಕ್ಕೆ ತೆಳ್ಳಗೆ ಸೀಳಿ)

ಉಪ್ಪು - 1 ಚಮಚ / ರುಚಿಗೆ ತಕ್ಕಷ್ಟು

ಮೆಣಸಿನ ಪುಡಿ- ½ ಚಮಚ / (ಖಾರಕ್ಕೆ ಹೊಂದಿಕೊಂಡು)

ಬೆಳ್ಳುಳ್ಳಿ - ದೊಡ್ಡ 2 ಎಸಳು (ಸಣ್ಣಗೆ ಹೆಚ್ಚಿ)

ಟೊಮೇಟೊ ಸಾಲ್ಸಾ - 2 ಚಮಚ (ಇದು ಮೆಕ್ಸಿಕನ್ನರ ಸಾಸ್, ಟೊಮೇಟೊ ಜೊತೆಗೆ ಈರುಳ್ಳಿ, ಮೆಣಸು, ಬೆಳ್ಳುಳ್ಳಿ ಹಾಕಿದ ಮಿಶ್ರಣ)

ಎಣ್ಣೆ / ತುಪ್ಪ - 5-6 ಚಮಚ

ಅಕ್ಕಿಯನ್ನು ಸ್ವಲ್ಪ ನೀರಿನಲ್ಲಿ 15-20 ನಿಮಿಷ ನೆನೆಸಿಡಿ.

1 ½ - 2 ಕಪ್ ನೀರನ್ನು ಒಂದು ಬಾಣಲೆಯಲ್ಲಿ ಹಾಕಿಕೊಂಡು ಕುದಿಯಲು ಬಿಡಿ.

ಇನ್ನೊಂದು ಪಾತ್ರೆಯಲ್ಲಿ ಸ್ವಲ್ಪ ಎಣ್ಣೆ / ತುಪ್ಪ ಹಾಕಿಕೊಂಡು ಬೆಳ್ಳುಳ್ಳಿ ಯನ್ನು ಚೆನ್ನಾಗಿ ಕೆಂಪಗೆ ಆಗುವ ತನಕ ಹುರಿದು, ನಂತರ ಇದಕ್ಕೆ ಈರುಳ್ಳಿ ಯನ್ನು ಸೇರಿಸಿ, ಚೆನ್ನಾಗಿ ಹುರಿಯಿರಿ. ಅಕ್ಕಿಯನ್ನು ತೊಳೆದುಕೊಂಡು ಬಸಿದು, ಇದಕ್ಕೆ ಸೇರಿಸಿಕೊಂಡು ಇನ್ನು 5 ನಿಮಿಷ ಹುರಿಯಿರಿ. ಕೊನೆಯಲ್ಲಿ ಮೆಣಸಿನ ಪುಡಿ, ಸಾಲ್ಸಾ, ಉಪ್ಪು ಸೇರಿಸಿ ಈ ಮಿಶ್ರಣವನ್ನು ಕುದಿಯುವ ನೀರಿಗೆ ಸೇರಿಸಿ, ಸಣ್ಣ ಉರಿಯಲ್ಲಿ 15-20 ನಿಮಿಷ (ನೀರು ಆರುವ ತನಕ) ಬೇಯಿಸಿರಿ.

ಕೊನೆಯಲ್ಲಿ ಇನ್ನೊಂದು ಪಾತ್ರೆಯಲ್ಲಿ, ಸ್ವಲ್ಪ ಎಣ್ಣೆ ಹಾಕಿಕೊಂಡು ಕ್ಯಾಪ್ಸಿಕಂನ್ನು ಚೆನ್ನಾಗಿ ಹುರಿಯಿರಿ. ಸ್ಟೋವ್ ಆರಿಸಿಬಿಟ್ಟು ನಂತರ ಟೊಮೇಟೊ ತುಂಡುಗಳನ್ನು ಸೇರಿಸಿ, ಇದನ್ನು ಅನ್ನದೊಂದಿಗೆ ಮಿಕ್ಸ್ ಮಾಡಿ raitha ದೊಂದಿಗೆ ತಿನ್ನಲು ಕೊಡಿ.

Friday, October 2, 2009

ಪ್ರಶಸ್ತಿಗಳಿಂದ ಬೆಲೆಕಟ್ಟಲಾಗದ ಹಸಿರು ಕ್ರಾಂತಿಯ ಹರಿಕಾರ ಡಾ.ನೋರ್ಮನ್ ಇ ಬೊರ್ಲಾಗ್

“You cannot build a peaceful world on empty stomach
and human misery”
– Dr. Norman E Borlaug (March 25, 1914 - September 12, 2009).

ಎಷ್ಟು ಸತ್ಯವಾದ ಮಾತುಗಳು....

ಅನಿವಾರ್ಯ ಕಾರಣಗಳಿಂದಾಗಿ ತುಂಬಾ ದಿನಗಳಿಂದ ಬ್ಲಾಗ್ ನಲ್ಲಿ ಏನೂ ಬರೆದಿರಲಿಲ್ಲ. ಇವತ್ತು ಬರೆಯುತ್ತಿರುವುದು ಯಾವುದೇ ಅಡುಗೆ ವಿಧಾನದ ಬಗ್ಗೆ ಅಲ್ಲ. ಎಷ್ಟೋ ದೇಶಗಳ ಬಡ ಜನರ ಹಸಿವೆಯನ್ನು ನೀಗಿಸಿದ ಅಧಿಕ ಇಳುವರಿಯ ಗೋಧಿ ತಳಿಯ ಸಂಶೋಧಕ, ಹಸಿರು ಕ್ರಾಂತಿಯ ಹರಿಕಾರ, ಕೃಷಿ ವಿಜ್ಞಾನಿ (agronomist), ಮಾನವತಾವಾದಿ (humanitarian), ನೊಬೆಲ್ ಶಾಂತಿ ಪ್ರಶಸ್ತಿ ವಿಜೇತ ಡಾ.ನೋರ್ಮನ್ ಇ ಬೊರ್ಲಾಗ್ ಬಗೆಗೆ.
ಅಮೆರಿಕದೇಶದ ಪ್ರಜೆಯಾಗಿ ಉಳಿದ ಬಡದೇಶಗಳ ಆಹಾರ ಕ್ರಾಂತಿಗಾಗಿ ತನ್ನ ಬದುಕನ್ನು ಮುಡಿಪಾಗಿಟ್ಟ ಕೃಷಿ ವಿಜ್ಞಾನಿ ಡಾ. ಬೊರ್ಲಾಗ್. ಇವರ ಆಲೋಚನೆ, ಸಂಶೋದನೆ, ಪರಿಶ್ರಮದಿಂದಾಗಿ ಭಾರತ, ಪಾಕಿಸ್ತಾನ, ಮೆಕ್ಸಿಕೋದಂತಹ ರಾಷ್ಟ್ರಗಳು ಆಹಾರ ಸ್ವಾವಲಂಬಿ ರಾಷ್ಟ್ರವಾಗಿ ಹೊರಹೊಮ್ಮಲು ಸಾಧ್ಯವಾಯಿತು. ಬಿಲಿಯನ್ ಜನರ ಹಸಿವನ್ನು ನೀಗಿಸಿ, ಜೀವ ಉಳಿಸಿದ ಕೀರ್ತಿ ಇವರಿಗೆ ಸಲ್ಲುತ್ತದೆ. ಹಾಗಾಗಿ ಹಲವು ಪ್ರಶಸ್ತಿಗಳು ಇವರನ್ನು ಅರಸಿಕೊಂಡು ಬಂದುವು. ಇದರಲ್ಲಿ ನೊಬೆಲ್ ಶಾಂತಿ ಪ್ರಶಸ್ತಿ, ಅಮೇರಿಕಾದ ಪ್ರಜೆಗೆ ದೊರಕುವ ಅತ್ಯುನ್ನತ ಪ್ರಶಸ್ತಿ -Congressional Gold medal, ಜೊತೆಗೆ ಭಾರತದ ಪದ್ಮವಿಭೂಷಣ ಪ್ರಶಸ್ತಿ, ಮತ್ತು 50ಕ್ಕೂ ಹೆಚ್ಚು ವಿಶ್ವವಿಧ್ಯಾಲಯಗಳ ಗೌರವ ಡಾಕ್ಟರೇಟ್ ಪದವಿಗಳು. ಇವರ ಬಗ್ಗೆ ನೀವು ಇಲ್ಲಿ ಮತ್ತು ಇಲ್ಲಿ ಓದಬಹುದು.

ಡಾ ಬೊರ್ಲಾಗ್ ರವರು ನಾವು ಕೆಲಸ ಮಾಡುವ Texas A& M Universityಯಲ್ಲಿ ಉದ್ಯೋಗದಲ್ಲಿದ್ದರು. ಹಾಗಾಗಿ ಅವರ ಕೆಲವು ಪ್ರಶಸ್ತಿಗಳು ಹಾಗು ಫೋಟೋಗಳನ್ನು ನಿಮ್ಮೊಂದಿಗೆ ಹಂಚಿಕೊಳ್ಳುತ್ತೇನೆ...


ನೊಬೆಲ್ ಶಾಂತಿ ಪ್ರಶಸ್ತಿ -ಹಸಿರು ಕ್ರಾಂತಿಯ ಹರಿಕಾರನಿಗೆ, ಸ್ವೀಡನ್ ನ ನೊಬೆಲ್ ಫೌಂಡೇಶನ್ ನವರು ಡಿಸೆಂಬರ್ 10, 1970 ರಲ್ಲಿ ಕೊಟ್ಟ ಪ್ರಶಸ್ತಿ. ಇವರು ಇದುವರೆಗೆ ನೊಬೆಲ್ ಶಾಂತಿ ಪ್ರಶಸ್ತಿ ಪಡೆದ ಏಕಮಾತ್ರ ಸಸ್ಯಶಾಸ್ತ್ರಜ್ಞ/ ಕೃಷಿ ವಿಜ್ಞಾನಿ.



Congressional Gold Medal (ಜುಲೈ 17, 2006)- ಅಮೆರಿಕ ದೇಶವು ತನ್ನ ಪ್ರಜೆಯೊಬ್ಬನಿಗೆ ಕೊಡುವ ಅತ್ಯುನ್ನತ ಪಶಸ್ತಿ.


Presidential medal of freedom (ಜನವರಿ 10, 1977) - ಇದು Congressional Gold Medal ಜೊತೆಗೆ ಅಮೆರಿಕ ದೇಶವು ತನ್ನ ಪ್ರಜೆಯೊಬ್ಬನಿಗೆ ಕೊಡುವ ಅತ್ಯುನ್ನತ ಪಶಸ್ತಿ.


National medal of science (ಫೆಬ್ರವರಿ13, 2005). ವಿಜ್ಞಾನ ಕ್ಷೇತ್ರದಲ್ಲಿ ಅಮೆರಿಕ ದೇಶವು ತನ್ನ ಪ್ರಜೆಗೆ ಕೊಡುವ ಅತ್ಯುನ್ನತ ಪ್ರಶಸ್ತಿ.


ಅಧಿಕ ಇಳುವರಿಯ ಗೋಧಿ ತಳಿಯ ಉತ್ಪಾದನೆಗಾಗಿ ಮೆಕ್ಸಿಕೋ ಸರಕಾರದಿಂದ ಕೊಡಲ್ಪಟ್ಟ Order of the Aztec Eagle award (1970). ಇದು ಮೆಕ್ಸಿಕೋ ಸರಕಾರ ವಿದೇಶೀಯರಿಗೆ ಕೊಡುವ ಅತ್ಯುನ್ನತ ಪ್ರಶಸ್ತಿ.

ಕ್ಯಾನ್ಸರಿನಿಂದ ಬಳಲುತ್ತಿದರು ಕೂಡ ನಗುಮುಖದಿಂದ ತಮ್ಮ ಕಿರಿಯ ಸಹೋದ್ಯೋಗಿಗಳೊಂದಿಗೆ ಯಾವಾಗಲು discussionಗೆ ಪ್ರಾಮುಖ್ಯತೆ ನೀಡುತ್ತಿದ್ದ ಡಾ.ನೋರ್ಮನ್ ಇ ಬೊರ್ಲಾಗ್ ಜೊತೆಗೆ, ನಮ್ಮ ಮನೆಯವರು ಎರಡು ವರ್ಷಗಳ ಹಿಂದೆ.

ಈ ಎಲ್ಲ ಪ್ರಶಸ್ತಿ ಗಳು ಇಲ್ಲಿನ George bush Presidential library & Museum ನಲ್ಲಿಡಲಾಗಿದೆ.

ವೈಜ್ಞಾನಿಕ ಸಂಶೋಧನೆಗಳು ಎಷ್ಟೋ ಮಲ್ಟಿನ್ಯಾಷನಲ್ ಕಂಪನಿಗಳ ಧನಗಳಿಕೆಯ ಸೊತ್ತಾಗುವ ಈ ಕಾಲದಲ್ಲಿ ಡಾ. ಬೊರ್ಲಾಗ್ ರವರ ನಿಸ್ವಾರ್ಥ ಸೇವೆ ಹಾಗು ಮಾನವೀಯತೆ ನಿಜವಾಗಿಯು ಅನುಕರಣೀಯ. ಅವರು ನಡೆದು ಬಂದ ದಾರಿ, ಯುವ ವಿಜ್ಞಾನಿಗಳಿಗೆ ಸ್ಪೂರ್ತಿಯ ನೆಲೆಯಾಗಬೇಕು.

Saturday, September 5, 2009

ಕಾಶ್ಮೀರಿ ಪಲಾವ್ / KASHMIRI PULAO

ಬೇಕಾಗುವ ಸಾಮಗ್ರಿಗಳು:
ಬಾಸ್ಮತಿ ಅಕ್ಕಿ - 2 ಕಪ್
ಬಟಾಣಿ ಬೇಯಿಸಿ - ½ ಕಪ್
ಕ್ಯಾರೆಟ್ ಸಣ್ಣಗೆ ತುಂಡು ಮಾಡಿ ಬೇಯಿಸಿ - ¼ ಕಪ್
ಕ್ಯಾಪ್ಸಿಕಂ - 1 ಸಣ್ಣಗೆ ತುಂಡು ಮಾಡಿ
ಈರುಳ್ಳಿ - ½ ಕಪ್
ಸಕ್ಕರೆ - 2 ಚಮಚ (ಸಿಹಿಗೆ ಅನುಗುಣವಾಗಿ)
ಉಪ್ಪು - 2 ಚಮಚ / ರುಚಿಗೆ ತಕ್ಕಂತೆ
ಪಿಸ್ತಾ, ಬಾದಾಮಿ, ಗೋಡಂಬಿ, ಒಣ ದ್ರಾಕ್ಷಿ - ¼ ಕಪ್
ಕ್ರೀಂ - 2 ಟೇಬಲ್ ಚಮಚ
ಹಾಲು - 1 ಟೇಬಲ್ ಚಮಚ- ಇದಕ್ಕೆ ಸ್ವಲ್ಪ ಕೇಸರಿ ಸೇರಿಸಿ ಕುದಿಸಿಡಬೇಕು.
ಚೆಕ್ಕೆ - ½” ಸಣ್ಣ ತುಂಡು / ಅಥವಾ 1-2 ಎಲೆ
ಏಲಕ್ಕಿ - 2
ಜೀರಿಗೆ - ¼ ಚಮಚ
ತುಪ್ಪ / ಬೆಣ್ಣೆ - 2 ಟೇಬಲ್ ಚಮಚ
ಹಣ್ಣುಗಳು (Seedless ದ್ರಾಕ್ಷಿ, ಆಪಲ್, Pineapple) - ಬೇಕಾದಷ್ಟು ಸಣ್ಣಗೆ ತುಂಡು ಮಾಡಿ


ಮಾಡುವ ವಿಧಾನ:
ಎರಡು ಕಪ್ ಅಕ್ಕಿಯನ್ನು ತೊಳೆದು 3 ಗ್ಲಾಸ್ ನೀರಿನಲ್ಲಿ ರುಚಿಗೆ ತಕ್ಕಷ್ಟು ಉಪ್ಪು, ಸಕ್ಕರೆ, 2 ಚಮಚ ತುಪ್ಪ ಹಾಕಿ ಬೇಯಿಸಬೇಕು. ಬೆಂದ ನಂತರ ಕುಕ್ಕರಿನ ಮುಚ್ಚಳ ತೆಗೆದಿಡಬೇಕು ಅಥವಾ ಒಂದು ದೊಡ್ಡ ಬಟ್ಟಲಿನಲ್ಲಿ ಅನ್ನವನ್ನು ಹರಡಿಡಬೇಕು. ಇದರಿಂದ ಅನ್ನ ಉದುರಾಗಿರುತ್ತದೆ.
ಇನ್ನೊಂದು ಪಾತ್ರೆಯಲ್ಲಿ ತುಪ್ಪ ಬಿಸಿಮಾಡಿ ಇದರಲ್ಲಿ dry fruits ಗಳನ್ನು ಹುರಿದು ತೆಗೆದಿಡಬೇಕು.
ನಂತರ ಇದೇ ತುಪ್ಪದಲ್ಲಿ ಈರುಳ್ಳಿಯನ್ನು ಚೆನ್ನಾಗಿ ಹುರಿಯಬೇಕು. ಇದಕ್ಕೆ ಚೆಕ್ಕೆ, ಏಲಕ್ಕಿ, ಜೀರಿಗೆ, ಕ್ಯಾಪ್ಸಿಕಂ ಸೇರಿಸಿ ಸ್ವಲ್ಪ ಹುರಿಯಿರಿ. ಬೇಯಿಸಿದ ಕ್ಯಾರೆಟ್, ಬಟಾಣಿ ಸೇರಿಸಿ ಸ್ವಲ್ಪ ಹುರಿದುಕೊಂಡು ನಂತರ ಕೇಸರಿ ಹಾಲು, ಕ್ರೀಂ ಮತ್ತು ಬೇಯಿಸಿಟ್ಟ ಅನ್ನವನ್ನು ಸೇರಿಸಿ ಚೆನ್ನಾಗಿ ಮಿಕ್ಸ್ ಮಾಡಿ ಒಲೆಯಿಂದ ಇಳಿಸಿ.
ಕೊನೆಯಲ್ಲಿ ದ್ರಾಕ್ಷಿ, ಆಪಲ್, ಅಥವಾ ನಿಮಗೆ ಬೇಕಾದ ಹಣ್ಣುಗಳನ್ನು ಸೇರಿಸಿ ತಿನ್ನಲು ಕೊಡಿ.
ಇದನ್ನು ಹಾಗೆಯೇ ತಿನ್ನಬಹುದು ಅಥವಾ raitha ದೊಂದಿಗೆ ಸವಿಯಬಹುದು. ನನಗೆ ಕ್ಯಾರೆಟ್ ಕೋಸಂಬರಿ ಯೊಂದಿಗೆ ತಿನ್ನಲು ಇಷ್ಟವಾಯಿತು.


Source: 100 Rice Delights by Mrs. Mallika Badrinath.

Sunday, August 30, 2009

ಕೋಸಂಬರಿ / KOSAMBARI

ಬೇಕಾಗುವ ಸಾಮಗ್ರಿಗಳು:
ಕ್ಯಾರೆಟ್ -1 ತುರಿದುಕೊಂಡು
ಹೆಸರುಬೇಳೆ - ¼ ಕಪ್

ತೆಂಗಿನ ತುರಿ - ಸ್ವಲ್ಪ
ಹಸಿಮೆಣಸು - 1 ಸಣ್ಣಗೆ ಹೆಚ್ಚಿ
ಉಪ್ಪು - ರುಚಿಗೆ ತಕ್ಕಷ್ಟು
ಲಿಂಬೆ ರಸ - ಸ್ವಲ್ಪ
ಒಗ್ಗರೆಣೆಗೆ - ಎಣ್ಣೆ, ಸಾಸಿವೆ, 1 ಒಣಮೆಣಸು, ಹಿಂಗು ಹಾಗು ಕರಿಬೇವು

ಮಾಡುವ ವಿಧಾನ:
ಹೆಸರುಬೇಳೆಯನ್ನು 2-3 ಗಂಟೆ ನೀರಿನಲ್ಲಿ ನೆನೆಸಿಡಿ. ನಂತರ ಇದನ್ನು ತೊಳೆದು, ಬಸಿದುಕೊಂಡು ಮೇಲಿನ ಎಲ್ಲ ಸಾಮಗ್ರಿಗಳೊಂದಿಗೆ ಸೇರಿಸಿ, ಕೊನೆಯಲ್ಲಿ ಒಗ್ಗರಣೆ ಸೇರಿಸಿದರೆ ಕೋಸಂಬರಿ ಸಿದ್ದ. ಇದು ಆರೋಗ್ಯಕ್ಕೆ ತುಂಬ ಉತ್ತಮ.
ಇದಕ್ಕೆ ಬೇಕಿದ್ದರೆ, ಸಣ್ಣಗೆ ಹೆಚ್ಚಿದ ಈರುಳ್ಳಿ, ಸೌತೆಕಾಯಿ, ಕೊತ್ತಂಬರಿ ಸೊಪ್ಪು ಕೂಡ ಸೇರಿಸಬಹುದು.

ಆಗಸ್ಟ್ 30, 2009 ರಂದು ಬರೆದಿದ್ದ ಇದನ್ನು ಅನಿವಾರ್ಯ ಕಾರಣಗಳಿಂದಾಗಿ ಪೋಸ್ಟ್ ಮಾಡಲಾಗಲಿಲ್ಲ.
ಇವತ್ತು ಸೆಪ್ಟೆಂಬರ್ 5, ಶಿಕ್ಷಕರ ದಿನ..ತಮ್ಮ ಬಾಳಿನುದ್ದಕ್ಕೂ ಆದರ್ಶ ಶಿಕ್ಷಕರಾಗಿ ದುಡಿದ ನನ್ನ ಪ್ರೀತಿಯ ಅಪ್ಪನ ಸವಿನೆನಪಿನೊಂದಿಗೆ.......

Tuesday, August 18, 2009

ಗುಳಿಅಪ್ಪ / ಗುಳಿಯಪ್ಪ


ಮಂಗಳೂರಿನ ತಿಂಡಿಗಳಲ್ಲಿ ತರಕಾರಿಗಳು ಸಾಮಾನ್ಯ. ಇದರಲ್ಲಿ ಪ್ರಮುಖವಾದುವುಗಳೆಂದರೆ ಸೌತೆಕಾಯಿ (ಮಂಗಳೂರು ಸೌತೆ), ಮುಳ್ಳುಸೌತೆ (ಸೌತೆಕಾಯಿ), ಸೋರೆಕಾಯಿ, ಹಲಸಿನ ಹಣ್ಣು/ ಕಾಯಿ - ಮುಂತಾದುವುಗಳಿಂದ ತಯಾರಿಸಿದ ದೋಸೆ ಹಾಗು ಕಡುಬುಗಳು (ಅಡ್ಯ =ತುಳು). ಗುಳಿಅಪ್ಪವನ್ನು ಗುಂಡಿಗಳಿರುವ ಕಬ್ಬಿಣದ/Nonstick ಕಾವಲಿಗೆಯಲ್ಲಿ ಮಾಡುತ್ತಾರೆ.

ಇದನ್ನು ಹಲವು ವಿಧಾನಗಳಲ್ಲಿ ಮಾಡಬಹುದು. ನಾವು ಚಿಕ್ಕವರಿದ್ದಾಗ ನಮಗೆ ಗುಳಿಯಪ್ಪ ಬಹಳ ಇಷ್ಟದ ತಿಂಡಿಯಾದುದರಿಂದ, ಬೆಳಗ್ಗಿನ ದೋಸೆ ಅಥವಾ ಇಡ್ಲಿ ಹಿಟ್ಟು (ಅಕ್ಕಿ ಅಥವಾ ರವೆ) ಉಳಿದಿದ್ದರೆ, ಅದಕ್ಕೆ ಸಂಜೆ ಈರುಳ್ಳಿ, ಕೊತ್ತಂಬರಿ ಸೊಪ್ಪು, ಹಸಿಮೆಣಸು ಸೇರಿಸಿ ಅಮ್ಮ ಗುಳಿಅಪ್ಪ ಮಾಡುತ್ತಿದ್ದರು.

ಇನ್ನೊಂದು ರೀತಿಯ ಗುಳಿಅಪ್ಪ ಸೌತೆ ಕಾಯಿ (ಮುಳ್ಳುಸೌತೆ) ಹಾಕಿ ಮಾಡುವುದು. ಇದನ್ನು ಖಾರ ಅಥವಾ ಸಿಹಿಯಾಗಿ ಮಾಡಬಹುದು. ಖಾರ ಗುಳಿಯಪ್ಪ (ಈರುಳ್ಳಿ, ಕೊತ್ತಂಬರಿ ಸೊಪ್ಪು, ಹಸಿಮೆಣಸು ಸೇರಿಸಿ) ಬೆಳಗ್ಗಿನ ತಿಂಡಿಯಾದರೆ, ಸಿಹಿ ಗುಳಿಅಪ್ಪ ಹೆಚ್ಚಾಗಿ ಸಂಜೆ ಮಾಡುತ್ತಾರೆ. ಸೌತೆಕಾಯಿಯ ಬದಲು ಹಲಸಿನ ಹಣ್ಣು ಅಥವಾ ಬಾಳೆಹಣ್ಣು ಸೇರಿಸಿಕೊಂಡು ಅಕ್ಕಿಯ ಜೊತೆಗೆ ರುಬ್ಬಿ ಕೂಡ ಮಾಡಬಹುದು.

ಗುಳಿಅಪ್ಪ ಮಾಡಲು ಬೇಕಾಗುವ ಸಾಮಗ್ರಿಗಳು:
ಅಕ್ಕಿ - 1 ಕಪ್
ಸೌತೆ ಕಾಯಿ - ½ ಕಪ್ (ಸಿಪ್ಪೆ ತೆಗೆದು ತುರಿದುಕೊಂಡು)
ಬೆಲ್ಲ - ¼ ಕಪ್
ತೆಂಗಿನ ತುರಿ - ¼ ಕಪ್ (ತುರಿದು)
ಉಪ್ಪು - ರುಚಿಗೆ ತಕ್ಕಷ್ಟು
ಎಣ್ಣೆ/ತುಪ್ಪ- ಸ್ವಲ್ಪ

ಮಾಡುವ ವಿಧಾನ :
ಅಕ್ಕಿಯನ್ನು ನೀರಿನಲ್ಲಿ 4-5 ಗಂಟೆಗಳ ಕಾಲ ನೆನೆಸಿ ತೊಳೆದಿಟ್ಟುಕೊಳ್ಳಿ. ಸಿಪ್ಪೆ ಸುಲಿದ ಸೌತೆಕಾಯಿಯನ್ನು ತುರಿಯಬೇಕು. ಇದರಲ್ಲಿ ನೀರಿನ ಅಂಶ ಜಾಸ್ತಿ ಇರುವುದರಿಂದ ನೀರನ್ನು ಹಿಂಡಿಟ್ಟುಕೊಳ್ಳುವುದು ಉತ್ತಮ.
ಅಕ್ಕಿಯನ್ನು ಸ್ವಲ್ಪವೇ ನೀರು ಹಾಕಿಕೊಂಡು ಗಟ್ಟಿಯಾಗಿ ರುಬ್ಬಬೇಕು. ಇದಕ್ಕೆ ಸೌತೆಕಾಯಿಯ ನೀರನ್ನು ಉಪಯೋಗಿಸಬಹುದು. ಕೊನೆಯಲ್ಲಿ ಬೆಲ್ಲ ಹಾಗು ತೆಂಗಿನ ತುರಿ ಸೇರಿಸಿಕೊಂಡು 1ನಿಮಿಷ ರುಬ್ಬಿಕೊಂಡು ಈ ಮಿಶ್ರಣವನ್ನು ಸೌತೆಕಾಯಿ ತುರಿಯೊಂದಿಗೆ ಉಪ್ಪು ಸೇರಿಸಿಕೊಂಡು ಚೆನ್ನಾಗಿ ಕಲಸಬೇಕು.
ಬಿಸಿ ಯಾಗಿರುವ ಗುಳಿಯಪ್ಪದ ಕಾವಲಿಗೆ ¼ ಚಮಚ ಎಣ್ಣೆ /ತುಪ್ಪ ಹಾಕಿಕೊಂಡು ಗುಳಿಯ ¾ ಭಾಗದ ವರೆಗೆ ಹಿಟ್ಟನ್ನು ಹಾಕಿ ಮುಚ್ಚಳ ಮುಚ್ಚಿ ಬೇಯಿಸಬೇಕು. 3-4 ನಿಮಿಷದ ನಂತರ ಇದನ್ನು ತಿರುವಿ ಹಾಕಿ ಪುನ: 1-2 ನಿಮಿಷ ಬೇಯಿಸಿದರೆ ಗುಳಿಯಪ್ಪ ತಿನ್ನಲು ಸಿದ್ದ. ಇದನ್ನು ಬಿಸಿ ಬಿಸಿ ಕಾಫೀ ಅಥವಾ ಟೀಯೊಂದಿಗೆ ಸವಿಯಬಹುದು.

Saturday, August 15, 2009

Egg Pepper Fry

ಈ ರೆಸಿಪಿ ಸಿಕ್ಕಿದ್ದು ಒಬ್ಬ ಕೇರಳದ ಸಹೋದ್ಯೋಗಿಯಿಂದ. ಫ್ರಿಜ್ ಇರುವವರು ಮೊಟ್ಟೆಯನ್ನು boil ಮಾಡಿ ಶೇಖರಿಸಿಟ್ಟರೆ ಇದನ್ನು ಕೇವಲ 10 ನಿಮಿಷದಲ್ಲಿ ಮಾಡಬಹುದು. ಈರುಳ್ಳಿಯನ್ನು ಚೆನ್ನಾಗಿ ಕೆಂಪಗೆ ಆಗುವ ತನಕ ಹುರಿದರೆ flavour ಬಹಳ ಚೆನ್ನಾಗಿ ಬರುತ್ತದೆ.


ಬೇಕಾಗುವ ಸಾಮಗ್ರಿಗಳು:
ಮೊಟ್ಟೆ / Egg - 6
ಈರುಳ್ಳಿ - ½ ಕಪ್
ಕರಿಮೆಣಸಿನ ಪುಡಿ / Pepper - ½ -1 ಚಮಚ
ಹಳದಿ ಪುಡಿ - ಸ್ವಲ್ಪ
ಜೀರಿಗೆ -½ ಚಮಚ
ಉಪ್ಪು - ರುಚಿಗೆ ತಕ್ಕಷ್ಟು


ಮಾಡುವ ವಿಧಾನ:
ಮೊಟ್ಟೆಗಳನ್ನು ಕುದಿಯುವ ನೀರಿನಲ್ಲಿ ಸ್ವಲ್ಪ ಉಪ್ಪು ಸೇರಿಸಿಕೊಂಡು 10-15 ನಿಮಿಷ ಬೇಯಿಸಿಕೊಳ್ಳಿ. ಇದು ತಣ್ಣಗಾದ ನಂತರ ಸಿಪ್ಪೆ ಬೇರ್ಪಡಿಸಿ, ಬೇಕಾದ ರೀತಿಯಲ್ಲಿ ತುಂಡು ಮಾಡಿಟ್ಟುಕೊಳ್ಳಿ. ಒಂದು ಪಾತ್ರೆಯಲ್ಲಿ 2-3 ಚಮಚ ಎಣ್ಣೆ ಹಾಕಿ, ಬಿಸಿಯಾದ ನಂತರ ½ ಚಮಚ ಜೀರಿಗೆ ಹಾಗು ಈರುಳ್ಳಿಯನ್ನು ಸೇರಿಸಿ, ಕೆಂಪಗಾಗುವ ತನಕ ಹುರಿಯಿರಿ. ಕೊನೆಯಲ್ಲಿ ಸ್ವಲ್ಪ ಹಳದಿ ಪುಡಿ ಸೇರಿಸಿ 1 ನಿಮಿಷ ಹುರಿದುಕೊಂಡು ತುಂಡು ಮಾಡಿಟ್ಟ ಮೊಟ್ಟೆ, ರುಚಿಗೆ ತಕ್ಕಷ್ಟು ಉಪ್ಪು ಹಾಗು ಕರಿಮೆಣಸಿನ ಪುಡಿ ಯನ್ನು ಸೇರಿಸಿ, 5 ನಿಮಿಷ ಸಣ್ಣ ಉರಿಯಲ್ಲಿ , ಮೊಟ್ಟೆ ಹಳದಿ ಬೇರ್ಪಡದಂತೆ ಮೆಲ್ಲಗೆ ತಿರುವಿದರೆ, egg pepper fry ರೆಡಿ. ಬೇಕಿದ್ದರೆ ½ ಚಮಚ ನಿಂಬೆ ರಸ ಹಾಗು ಕೊತ್ತಂಬರಿ ಸೊಪ್ಪಿನಿಂದ ಅಲಂಕರಿಸಬಹುದು.ಇದನ್ನು ಪಲ್ಯದಂತೆ ಅನ್ನ ಅಥವಾ ಚಪಾತಿ ಜೊತೆಗೆ ತಿನ್ನಬಹುದು.

Sunday, August 2, 2009

ಪಾಸ್ತಾ / PASTA (Kids Favuorite; Indian Version)


ಬೇಕಾಗುವ ಸಾಮಗ್ರಿಗಳು:
ಪಾಸ್ತಾ - 200g
ಈರುಳ್ಳಿ - ½ ಕಪ್
ಕ್ಯಾಬೇಜ್ - ½ ಕಪ್ (ಉದ್ದಕೆ ತೆಳ್ಳಗೆ ಹೆಚ್ಚಿ)
Capsicum – ¼ ಕಪ್ (ಉದ್ದಕೆ ತೆಳ್ಳಗೆ ಹೆಚ್ಚಿ)
ತರಕಾರಿಗಳು - 1 ಕಪ್ (ಬೀನ್ಸ್, ಕ್ಯಾರೆಟ್, ಬಟಾಣಿ - ಸಣ್ಣಗೆ ಹೆಚ್ಚಿ ಬೇಯಿಸಿಟ್ಟುಕೊಳ್ಳಬೇಕು)
ಟೊಮೇಟೊ ಸಾಸ್ - 1-2 ಚಮಚ
ಸೋಯಾ ಸಾಸ್ - ½ ಚಮಚ
Heavy whipping cream - 2 ಟೇಬಲ್ ಸ್ಪೂನ್
Paramesan Cheese grated– 2-3 ಚಮಚ
ಉಪ್ಪು - ರುಚಿಗೆ ತಕ್ಕಷ್ಟು

ಮಾಡುವ ವಿಧಾನ:
ಪಾಸ್ತಾವನ್ನು ಪ್ಯಾಕೆಟ್ ನಲ್ಲಿರುವ ಸೂಚನೆಯಂತೆ 10-12 ನಿಮಿಷ ಬೇಯಿಸಿ, ನೀರನ್ನು ಬಸಿಯಬೇಕು. ಪಾಸ್ತಾ ಬೇಯಿಸುವಾಗ ಕುದಿಯುವ ನೀರಿಗೆ ಸ್ವಲ್ಪಉಪ್ಪು ಹಾಗು 2 ಚಮಚ ಎಣ್ಣೆ ಹಾಕಿದರೆ ಪಾಸ್ತಾ ಒಂದಕ್ಕೊಂದು ಅಂಟಿಕೊಳ್ಳುವುದಿಲ್ಲ. ಬಸಿದಿಟ್ಟ ಪಾಸ್ತಾಕ್ಕೆ 2 ಚಮಚ ಎಣ್ಣೆ (olive oil ಹಾಕಿದರೆ ಉತ್ತಮ) ಹಾಕಿ ಮಗುಚಿಕೊಂಡು ಬದಿಯಲ್ಲಿಡಬೇಕು.
ಇದೇ ಸಮಯದಲ್ಲಿ ಒಂದು ದಪ್ಪ ತಳದ ಪಾತ್ರೆಗೆ 4 ಚಮಚ ಎಣ್ಣೆ ಹಾಕಿ, ಈರುಳ್ಳಿಯನ್ನು ಕೆಂಬಣ್ಣ ಬರುವವರೆಗೆ ಹುರಿಯಬೇಕು. ಇದಕ್ಕೆ ಕ್ಯಾಬೇಜ್, ನಂತರ Capsicum ಸೇರಿಸಿಕೊಂಡು 3-4 ನಿಮಿಷ ಹುರಿಯಬೇಕು. ಬೇಯಿಸಿದ ತರಕಾರಿಗಳನ್ನು (ನೀರು ಸೇರಿಸಬಾರದು) ಸೇರಿಸಿಕೊಂಡು, ½ ಚಮಚ ಉಪ್ಪು, ಟೊಮೇಟೊ ಮತ್ತು ಸೋಯಾ ಸಾಸ್ ಸೇರಿಸಿಕೊಂಡು ಚೆನ್ನಾಗಿ ಮಗುಚಬೇಕು. ಕೊನೆಯಲ್ಲಿ 2 ಟೇಬಲ್ ಚಮಚ ಕ್ರೀಂ ಹಾಗು cheeseನ್ನು ಸೇರಿಸಿ, ಬಿಸಿ ಬಿಸಿಯಾಗಿರುವಾಗಲೇ ತಿನ್ನಲು ಕೊಡಿ.
ಬೇಕಿದ್ದರೆ ಹಸಿಮೆಣಸನ್ನು (ಸಣ್ಣಗೆ ಹೆಚ್ಚಿ, ತರಕಾರಿಯೊಂದಿಗೆ fry ಮಾಡಿ) ಅಥವಾ ಕರಿಮೆಣಸಿನ ಪುಡಿಯನ್ನು (ಕೊನೆಯಲ್ಲಿ) ಸೇರಿಸಿಕೊಳ್ಳಬಹುದು.

ಇದು ಮಕ್ಕಳಿಗೆ ತುಂಬಾ ಇಷ್ಟವಾಗುವ ತಿಂಡಿ.

Honey Dew Melon Juice / milkshake


ಬೇಕಾಗುವ ಸಾಮಗ್ರಿಗಳು:
Honey Dew Melon - 1/2
ಸಕ್ಕರೆ - 4 ಚಮಚ
ಹಾಲು - 1 ಕಪ್
Ice-cube - 4

ಮಾಡುವ ವಿಧಾನ:

ಸಿಪ್ಪೆ ತೆಗೆದ honey Dew melon ನ್ನು ಮಧ್ಯದಲ್ಲಿ ಕತ್ತರಿಸಿ, ಬೀಜಗಳನ್ನು ತೆಗೆಯಬೇಕು. ಇದನ್ನು ಹೋಳುಗಳನ್ನಾಗಿ ಮಾಡಿ, ಮಿಕ್ಸಿಯಲ್ಲಿ ಸಕ್ಕರೆ, Ice-cube ಜೊತೆಗೆ ರುಬ್ಬಿಕೊಳ್ಳಬೇಕು. ಇದಕ್ಕೆ ತಣ್ಣಗಿನ ಹಾಲು ಸೇರಿಸಿಕೊಂಡು ಅಥವಾ ಸೇರಿಸದೆಯೇ ಕುಡಿಯಬಹುದು.

Tuesday, July 28, 2009

Gendadadya / Kendadadya - ಕೆಂಡದಡ್ಯ / ಗೆಂಡದಡ್ಯ

Gendadadya or Kendadadya is a traditional delicacy of Mangalore. Genda (=tulu) or Kenda (=Kannada) reffers to ‘burning charcoal’ and Adya is ‘Kadubu or steamed rice dumpling/cake’. The name Kendadadya derives from the way it is prepared. Unlike other preparations, the speciality of this dish is that, it is baked on both the sides (top & bottom).


The main ingredients needed for this dish are cucumber, rice, jaggery, coconut and oil/Ghee. The batter prepared with the mentioned ingredinets is poured on a flat earthen vessel placed on a traditional fire place (called Ole in Kannada /Chula in Hindi). Another earthen vessel filled with hot red burning charcoal is placed just above the batter. The bottom vessel is heated using a slow and steady flame with a non smoky wood.


The blend of oil (preferably coconut oil), coconut, cucumber and Jaggery gives an amazing flavour to this dish. This is a great evening snack along with hot Coffee or Tea. This dish is slowly getting extinct our villages because of the fact that preparation method needs lot of skills interms of two side cooking and time required for the preparation. Here I have tried to adopt a simple and convenient method to make this preparation.





Ingredients:
White Rice - 2 cups
Grated cucumber - ~2 cup (In general, yellowish, ready to ripe cucumbers are being used. I have used 2 green cucumbers)
Jaggery - ½ - ¾ cup scrapped (can be changed according to your taste)
Grated cocnut – ¼ cup
Salt- ½ spoon
Oil or Ghee – 3-4 table spoon

Preperation:
1. Soak rice in sufficient amount of water for 4-5 hours.
2. Peel and grate the cucumber.
3. Squeeze the grated cucmber by hand and take out maximum amount of water. This water can be used for grinding rice.
4. Now grind rice by adding minimum amount of cucumber water. (Once you add Jaggery, the batter turns out watery, so try to use minimum amount of water).
5. To this thick ground rice batter, add scrapped Jaggery, coconut, salt and grated cucumber and mix nicely. The consistency should be thicker than Idly batter.
5. Centre a rack in the oven and preheat the oven to 400F
6. Add 2 tablespoon of oil in a baking pan (I have used 8x4x2 inch pan) and pour the batter. Cover the top with a thin layer of oil. At this point fried onion slices can also be sprinkled at the top.
7. Bake this for 40 - 45 minutes. Kendadadya is ready when it turns golden brown color.
8. Once cooled, Slice it using a long knife, and enjoy with hot tea or Coffee.

Serves- 10-12 Pieces




Sending this to RCI-UDUPI & MANGALOREAN CUISINE hosted by SIA an event started by LAKSHMI.


ಕೆಂಡದಡ್ಯ / ಗೆಂಡದಡ್ಯ [ಕೆಂಡ (=ಕನ್ನಡ); ಗೆಂಡ (=ತುಳು); ಅಡ್ಯ = ಕಡುಬು (ತುಳು)] :
ಮಳೆಗಾಲ ಬಂತೆಂದರೆ ಮಂಗಳೂರಿನಲ್ಲಿ ಹೆಚ್ಚಾಗಿ ಎಲ್ಲರ ಮನೆಯ ಹಿತ್ತಲಿನಲ್ಲಿಯೂ ಸೌತೆಕಾಯಿ (ಮಂಗಳೂರುಸೌತೆ), ಮುಳ್ಳುಸೌತೆ (ಸೌತೆಕಾಯಿ), ಬೆಂಡೆಕಾಯಿ, ತೊಂಡೆಕಾಯಿ, ಸೋರೆಕಾಯಿ, ಪಡುವಲಕಾಯಿ, ಹೀರೆಕಾಯಿ, ಅಲಸಂಡೆ ಮುಂತಾದ ತರಕಾರಿಗಳನ್ನು ಬೆಳೆಸುತ್ತಾರೆ. ಚೆನ್ನಾಗಿ ಬಲಿತ (ಹಣ್ಣಾಗಲು ತಯಾರಾದ, ಹಳದಿ ಬಣ್ಣದ) ಮುಳ್ಳುಸೌತೆ ಕೆಂಡದಡ್ಯ ಮಾಡಲು ಉತ್ತಮ. ಈ ತಿಂಡಿಯ ವಿಶೀಷತೆಯೆಂದರೆ, ಇದನ್ನು ಮೇಲೆ ಹಾಗು ಕೆಳಗೆ ಎರಡೂ ಕಡೆಯಿಂದ ಬೇಯಿಸಬೇಕು.
ಸಾಂಪ್ರದಾಯಿಕವಾಗಿ ಕೆಂಡದಡ್ಯ ಮಾಡುವ ವಿಧಾನ ತಲೆತಲಾಂತರಗಳಿಂದ ಬಂದುದು. ಇದನ್ನು ಹೆಚ್ಚಾಗಿ ದಪ್ಪ ತಳದ ಮಣ್ಣಿನ ಪಾತ್ರೆಯಲ್ಲಿ ಮಾಡುತ್ತಾರೆ. ಸ್ವಲ್ಪ ಕೊಬ್ಬರಿ ಎಣ್ಣೆ ಹಾಕಿ ಮಿಶ್ರಣವನ್ನು ಹರಡಿ, ಈ ಮಿಶ್ರಣದ ಸ್ವಲ್ಪವೇ ಮೇಲ್ಭಾಗದಲ್ಲಿ ಇನ್ನೊಂದು ಪಾತ್ರೆಯನ್ನಿಟ್ಟು ನಿಗಿನಿಗಿಸುವ ಕೆಂಡವನ್ನು ಮೇಲಿನ ಪಾತ್ರೆಯಲ್ಲಿ ತುಂಬುತ್ತಾರೆ. ಇದೇ ಸಮಯದಲ್ಲಿ ಕೆಳಭಾಗದ ಪಾತ್ರೆಯನ್ನು ಸ್ವಲ್ಪ ಉರಿಯಲ್ಲಿ ಅಥವಾ ಕೆಂಡದಲ್ಲಿ ಹದವಾಗಿ ಬೇಯಿಸಲಾಗುತ್ತದೆ.
ಹೀಗೆ ತಯಾರಾದ ಈ ತಿಂಡಿಯ ರುಚಿಯನ್ನು ಓವೆನ್ ನಲ್ಲಿ ಮಾಡಿದರೆ ಬರಲು ಸಾಧ್ಯವಿಲ್ಲವಾದರೂ, ಓವೆನ್ ವಿಧಾನ ನಗರದ ಅಡುಗೆ ಮನೆಯಲ್ಲೂ ಮಾಡಲು ಸುಲಭ.

ಕೆಂಡದಡ್ಯ / ಗೆಂಡದಡ್ಯ ಮಾಡಲು ಬೇಕಾಗುವ ಸಾಮಗ್ರಿಗಳು:

ಅಕ್ಕಿ - 2 ಕಪ್
ಮುಳ್ಳುಸೌತೆ / ಸೌತೆಕಾಯಿ - 2 ಕಪ್, ತುರಿದು
ಬೆಲ್ಲ - ½ - ¾ ಕಪ್ (ಸಿಹಿಗೆ ಹೊಂದಿಕೊಂಡು)
ತೆಂಗಿನಕಾಯಿ - ¼ ಕಪ್, ತುರಿದು
ಉಪ್ಪು - ½ - ಚಮಚ
ಎಣ್ಣೆ / ತುಪ್ಪ - 3-4 ಟೇಬಲ್ ಚಮಚ

ಮಾಡುವ ವಿಧಾನ :
ಅಕ್ಕಿಯನ್ನು ನೀರಿನಲ್ಲಿ 4-5 ಗಂಟೆಗಳ ಕಾಲ ನೆನೆಸಿ ತೊಳೆದಿಟ್ಟುಕೊಳ್ಳಿ
ಸಿಪ್ಪೆ ಸುಲಿದ ಸೌತೆಕಾಯಿಯನ್ನು ತುರಿಯಬೇಕು. ಇದರಲ್ಲಿ ನೀರಿನ ಅಂಶ ಜಾಸ್ತಿ ಇರುವುದರಿಂದ ನೀರನ್ನು ಹಿಂಡಿಟ್ಟುಕೊಳ್ಳುವುದು ಉತ್ತಮ.
ಅಕ್ಕಿಯನ್ನು ಸ್ವಲ್ಪವೇ ನೀರು ಹಾಕಿಕೊಂಡು ಗಟ್ಟಿಯಾಗಿ ರುಬ್ಬಬೇಕು.
ನಂತರ ತುರಿದ ಸೌತೆ ಕಾಯಿ, ಬೆಲ್ಲ, ತೆಂಗಿನ ತುರಿ, ಉಪ್ಪು ಸೇರಿಸಿಕೊಂಡು ಚೆನ್ನಾಗಿ ಕಲಸಬೇಕು.
ಈ ಮಿಶ್ರಣದಲ್ಲಿ ನೀರಿನ ಅಂಶ ಹೆಚ್ಚಾಗದಂತೆ ತುಂಬಾ ಎಚ್ಚರ ವಹಿಸಬೇಕು.
ಒಂದು ಓವೆನ್ ನಲ್ಲಿ ಇಡಬಹುದಾದ ಪಾತ್ರೆಯಲ್ಲಿ 2 ಟೇಬಲ್ ಸ್ಪೂನ್ ಎಣ್ಣೆ ಅಥವಾ ತುಪ್ಪವನ್ನು ಹಾಕಿಕೊಂಡು ಕಲಸಿಟ್ಟ ಅಕ್ಕಿ ಮಿಶ್ರಣವನ್ನು ಸುರಿಯಬೇಕು. ಇದರ ಮೇಲ್ಭಾಗದಲ್ಲಿ ಸ್ವಲ್ಪ ಎಣ್ಣೆ ಹಾಕಿಕೊಂಡು ಎಲ್ಲಾ ಭಾಗಕ್ಕೆ ಹರಡಬೇಕು. ಬೇಕಿದ್ದರೆ ಹುರಿದ ಈರುಳ್ಳಿಯನ್ನು ಸೇರಿಸಬಹುದು.
ಈ ಪಾತ್ರೆಯನ್ನು ಓವೆನ್ ನ ಮಧ್ಯದ rackನಲ್ಲಿಟ್ಟು 400Fನಲ್ಲಿ 40-45 ನಿಮಿಷ ಬೇಯಿಸಬೇಕು.
ಬೇಕಿದ್ದರೆ 30ನಿಮಿಷದ ನಂತರ ಕೆಂಡದಡ್ಯವನ್ನು ಮಗುಚಿ ಪುನ ಬೇಯಿಸಬಹುದು.
ಚೆನ್ನಾಗಿ ಬೆಂದ ಕೆಂಡದಡ್ಯದ ಮೇಲ್ಭಾಗ ಹೊಂಬಣ್ಣಕ್ಕೆ ತಿರುಗಿರುತ್ತದೆ. ಸ್ವಲ್ಪ ತಣ್ಣಗಾದ ನಂತರ ಇದನ್ನು ತುಂಡು ಮಾಡಿಕೊಂಡು ಬಿಸಿ ಬಿಸಿ ಕಾಫೀ ಅಥವಾ ಟೀಯೊಂದಿಗೆ ಸವಿಯಲು ಕೊಡಿ.

ಈ ತಿಂಡಿ ಹಳ್ಳಿಯಲ್ಲೂ ಈಗ ಕಾಣಸಿಗಲು ಕಷ್ಟವಾಗಿದೆ. ಅಂಥಹ ನಶಿಸುತ್ತಿರುವ ತಿಂಡಿ ಕೆಲವಾದರೂ ಅಡುಗೆ ಮನೆಗಳಲ್ಲಿ ಮತ್ತೆ ಕಾಣಬಂದರೆ ತುಂಬಾ ಸಂತೋಷ..
(ಮಂಗಳೂರಿನ ಎ. ಬಿ. ಶೆಟ್ಟಿ ಸರ್ಕಲ್ ಬಳಿ ಇರುವ Kochin Bakeryಯಲ್ಲಿ ಒಳ್ಳೆಯ ಕೆಂಡದಡ್ಯ ಸಿಗುತ್ತದೆ)

Thursday, July 23, 2009

ಕ್ಯಾರೆಟ್ ಹಲ್ವ / CARROT HALWA

ಬೇಕಾಗುವ ಸಾಮಗ್ರಿಗಳು:
ಕ್ಯಾರೆಟ್ (ತುರಿದುಕೊಂಡು) – 4 ಕಪ್
ಹಾಲು - 2 ಕಪ್
ಸಕ್ಕರೆ - 1 ಕಪ್
ಏಲಕ್ಕಿ ಪುಡಿ - ಸ್ವಲ್ಪ
ಗೋಡಂಬಿ - 2 ಟೇಬಲ್ ಚಮಚ
ದ್ರಾಕ್ಷಿ - 2 ಟೇಬಲ್ ಚಮಚ
ತುಪ್ಪ - 2 ಟೇಬಲ್ ಚಮಚ

ಮಾಡುವ ವಿಧಾನ :
ಕ್ಯಾರೆಟ್ ನ್ನು ತೊಳೆದು ಒರೆಸಿಕೊಂಡು, ತುರಿದಿಟ್ಟುಕೊಳ್ಳಿ. ಒಂದು ದಪ್ಪ ತಳದ ಪಾತ್ರೆಯಲ್ಲಿ ತುಪ್ಪ ಹಾಕಿಕೊಂಡು ಗೋಡಂಬಿಯನ್ನು ಹುರಿದು ಬದಿಯಲ್ಲಿಡಿ. ನಂತರ ಇದಕ್ಕೆ ತುರಿದ ಕ್ಯಾರೆಟ್ ನ್ನು ಹಾಕಿ 10 ನಿಮಿಷ ಬಾಡಿಸಿಕೊಳ್ಳಿ. ಈ ತುರಿಗೆ ಹಾಲು ಸೇರಿಸಿ, ಚೆನ್ನಾಗಿ ಬೇಯಲು ಬಿಡಿ. (ಹಾಲು ಮತ್ತು ತುರಿದ ಕ್ಯಾರೆಟ್ ನ್ನು ಕುಕ್ಕರಿನಲ್ಲಿ ಕೂಡ ಬೇಯಿಸಬಹುದು) . ಹಾಲು ಆವಿಯಾದ ನಂತರ ಇದಕ್ಕೆ ಸಕ್ಕರೆ ಮತ್ತು ದ್ರಾಕ್ಷಿ ಸೇರಿಸಿ ಚೆನ್ನಾಗಿ ಮಗುಚಿರಿ. ಕೊನೆಯಲ್ಲಿ ಇದು ತಳ ಬಿಡಲು ಶುರುವಾದಾಗ, ಏಲಕ್ಕಿ ಪುಡಿ ಹಾಗು ಗೋಡಂಬಿ ಸೇರಿಸಿ, ಒಲೆಯಿಂದ ಇಳಿಸಿ, ಬೇಕಾದ ಪಾತ್ರೆಗೆ ಹಾಕಿ ಇಡಿರಿ. ಇದನ್ನು ಬಿಸಿಯಾಗಿ ಅಥವಾ ಫ್ರಿಜ್ ನಲ್ಲಿಟ್ಟು ತಂಪಾದ ನಂತರ ಕೂಡ ತಿನ್ನಬಹುದು.

Sunday, July 12, 2009

ಮಾವಿನಹಣ್ಣು ಗೊಜ್ಜು / MANGO GOJJU

ಬೇಕಾಗುವ ಸಾಮಗ್ರಿಗಳು:
ಮಾವಿನಹಣ್ಣು - 2-3 (ಇದಕ್ಕೆ ಸ್ವಲ್ಪ ಹುಳಿಯಾಗಿರುವ ಮಾವಿನ ಹಣ್ಣು ಉಪಯೋಗಿಸಿದರೆ ತುಂಬ ರುಚಿಯಾಗುತ್ತದೆ).
ಹಸಿಮೆಣಸು - 1
ಉಪ್ಪು - ರುಚಿಗೆ ತಕ್ಕಷ್ಟು
ಬೆಲ್ಲ - ಸ್ವಲ್ಪ
ಒಗ್ಗರಣೆಗೆ :- ಎಣ್ಣೆ- 1 ಚಮಚ, ಸಾಸಿವೆ, ಸ್ವಲ್ಪ ಇಂಗು, ಕರಿಬೇವು, ಕೆಂಪು ಮೆಣಸು-1.

ಮಾವಿನಹಣ್ಣನ್ನು ಕುದಿಯುವ ನೀರಿನಲ್ಲಿ 10 ನಿಮಿಷ ಬೇಯಿಸಿಕೊಳ್ಳಿ. ನಂತರ ಮಾವಿನ ಹಣ್ಣಿನ ಸಿಪ್ಪೆಯನ್ನು ಬೇರ್ಪಡಿಸಿ, ಹಣ್ಣನ್ನು ಚೆನ್ನಾಗಿ ಕೈಯಿಂದ ಹಿಚುಕಬೇಕು. ಇದಕ್ಕೆ ಹೆಚ್ಚಿದ ಹಸಿಮೆಣಸು, ಸ್ವಲ್ಪ ಬೆಲ್ಲ, ರುಚಿಗೆ ತಕ್ಕಷ್ಟು ಉಪ್ಪು ಹಾಗು 1/4 ಗ್ಲಾಸ್ ನೀರುಸೇರಿಸಿ 5 ನಿಮಿಷ ಕುದಿಸಬೇಕು. ಕೊನೆಯಲ್ಲಿ ಒಗ್ಗರಣೆ ಕೊಟ್ಟರೆ, ರುಚಿಯಾದ ಗೊಜ್ಜು ಸಿದ್ದ. ಮಾವಿನ ಹಣ್ಣಿನ ಗೊಜ್ಜನ್ನು ಅನ್ನದೊಂದಿಗೆ ತಿನ್ನಲು ರುಚಿ.

Friday, July 10, 2009

ಪೂರಿ / ದೋಸೆ ಮತ್ತು ಆಲೂಗಡ್ಡೆ ಪಲ್ಯ (ಬಾಜಿ*)

ಪೂರಿ ಮಾಡಲು ಬೇಕಾಗುವ ಸಾಮಗ್ರಿಗಳು:
ಗೋಧಿ ಹಿಟ್ಟು - 2 ಕಪ್
ಉಪ್ಪು - ರುಚಿಗೆ ತಕ್ಕಷ್ಟು
ನೀರು
ಕರಿಯಲು ಎಣ್ಣೆ

ಗೋಧಿ ಹಿಟ್ಟಿಗೆ ಉಪ್ಪು ಹಾಕಿ ನೀರು ಸೇರಿಸಿಕೊಂಡು ಚೆನ್ನಾಗಿ ಮಿಕ್ಸ್ ಮಾಡಿಕೊಂಡು ಚಪಾತಿ ಹಿಟ್ಟಿನ ಹದಕ್ಕೆ ನಾದಿಕೊಳ್ಳಿ. ಕೊನೆಯಲ್ಲಿ ಎರಡು ಚಮಚ ಎಣ್ಣೆ ಹಾಕಿ ಚೆನ್ನಾಗಿ ನಾದಿಕೊಂಡು 20-30 ನಿಮಿಷ ಮುಚ್ಚಿ ಇಡಿ. ನಂತರ ಸಣ್ಣ ಸಣ್ಣ ಗೋಲಿಗಳನ್ನು ಮಾಡಿ ಸ್ವಲ್ಪ ಎಣ್ಣೆ ಸವರಿಕೊಂಡು ಚಪಾತಿ ಗಿಂತ ಸಣ್ಣಗೆ ಸ್ವಲ್ಪ ದಪ್ಪಕ್ಕೆ ಲಟ್ಟಿಸಿ ಕೊಳ್ಳಿ. ಇದನ್ನು ಹದ ಉರಿಯಲ್ಲಿ ಎಣ್ಣೆಯಲ್ಲಿ ಎರಡೂ ಬದಿ ಕರಿದರೆ ಪೂರಿ ರೆಡಿ.
ದೋಸೆ ಮಾಡಲು ಬೇಕಾಗುವ ಸಾಮಗ್ರಿಗಳು:
ಬೆಳ್ತಿಗೆ ಅಕ್ಕಿ - 3 ಕಪ್
ಉದ್ದಿನಬೇಳೆ- 1 ಕಪ್
ಕಡಲೆಬೇಳೆ /ತೊಗರಿಬೇಳೆ - 2 ಚಮಚ
ಮೆಂತೆ - ½ ಚಮಚ
ಉಪ್ಪು - ರುಚಿಗೆ ತಕ್ಕಷ್ಟು
ಸಕ್ಕರೆ - 1 ಚಮಚ (ಬೇಕಿದ್ದರೆ ಮಾತ್ರ)
ಗಟ್ಟಿ ಅವಲಕ್ಕಿ - ¼ ಕಪ್ / ಒಂದು ಹಿಡಿಯಷ್ಟು
ಎಣ್ಣೆ ಅಥವಾ ತುಪ್ಪ - ದೋಸೆ ತಯಾರಿಸಲು ಬೇಕಾದಷ್ಟು

ಅಕ್ಕಿ ಹಾಗು ಬೇಳೆಗಳನ್ನು ಬೇರೆ ಬೇರೆಯಾಗಿ ನೀರಿನಲ್ಲಿ 6-8 ಗಂಟೆ ಕಾಲ ನೀರಿನಲ್ಲಿ ನೆನೆಸಿಡಬೇಕು. ನಂತರ ಇದನ್ನು ಚೆನ್ನಾಗಿ ನೀರಿನಲ್ಲಿ ತೊಳೆದುಕೊಳ್ಳಬೇಕು. ನೆನೆಸಿದ ಉದ್ದಿನಬೇಳೆ, ಕಡಲೆಬೇಳೆ, ಮೆಂತೆ, ಹಾಗು ಅವಲಕ್ಕಿ (5-10 ನಿಮಿಷ ನೀರಿನಲ್ಲಿ ನೆನೆಸಿ ತೆಗೆದುಕೊಂಡು) ಯನ್ನು ಸೇರಿಸಿ ನಯವಾಗಿ ಅರೆದು ಒಂದು ದೊಡ್ಡ ಪಾತ್ರೆಗೆ ಹಾಕಿ. ನಂತರ ಅಕ್ಕಿ ಹಿಟ್ಟನ್ನು ಚೆನ್ನಾಗಿ ಅರೆದು, ಒಂದು ಚಮಚ ಉಪ್ಪು ಮತ್ತು ಸಕ್ಕರೆ ಸೇರಿಸಿ, ರುಬ್ಬಿದ ಉದ್ದಿನ ಹಿಟ್ಟಿನೊಂದಿಗೆ ಸೇರಿಸಿ, ಚೆನ್ನಾಗಿ ಮಿಕ್ಸ್ ಮಾಡಿಕೊಂಡು 8-10 ಗಂಟೆಗಳ ಕಾಲ ಮುಚ್ಚಿ ಇಡಬೇಕು.

ಮರುದಿನ ಬೆಳಗ್ಗೆ ಹೊತ್ತಿಗೆ ಹಿಟ್ಟು ಚೆನ್ನಾಗಿ ಹುದುಗು ಬಂದಿರುತ್ತದೆ. ಇದಕ್ಕೆ ಬೇಕಿದ್ದಷ್ಟು ಉಪ್ಪು (ಬೇಕಿದ್ದರೆ ಸ್ವಲ್ಪ ನೀರು) ಹಾಕಿ ಕಲಸಿ ಹಿಟ್ಟು ಹದ ಮಾಡಿಕೊಳ್ಳಿ. ಬಳಿಕ ಕಾದ ಕಾವಲಿಗೆ ಎಣ್ಣೆ ಸವರಿ ದೋಸೆಯನ್ನು ಹುಯ್ಯಿದು ಎರಡೂ ಕಡೆ ಕೆಂಬಣ್ಣ ಬರುವತನಕ ಬೇಯಿಸಿದರೆ ದೋಸೆ ಸಿದ್ದ.

ಆಲೂಗಡ್ಡೆ ಪಲ್ಯ ಮಾಡಲು ಬೇಕಾಗುವ ಸಾಮಗ್ರಿಗಳು:
ಆಲೂಗಡ್ಡೆ - 2-3 (ಬೇಯಿಸಿ, ಸಣ್ಣಗೆ ತುಂಡು ಮಾಡಿದ್ದು)
ಈರುಳ್ಳಿ - 1-2 (ಸಣ್ಣಗೆ ಹೆಚ್ಚಿ)
ಟೊಮೇಟೊ - 2-3 (ಸಣ್ಣಗೆ ಹೆಚ್ಚಿ)
ಹಸಿಮೆಣಸು - 2-3 (ಉದ್ದಕ್ಕೆ ಸೀಳಿ)
ಶುಂಠಿ - ½ ಇಂಚು
ಹಳದಿ ಪುಡಿ - ಸ್ವಲ್ಪ
ಗರಂ ಮಸಾಲ - ½ ಚಮಚ (ಬೇಕಿದ್ದರೆ ಮಾತ್ರ)
ಒಗ್ಗರಣೆಗೆ - ಸ್ವಲ್ಪ ಎಣ್ಣೆ, ಸಾಸಿವೆ, ಉದ್ದಿನಬೇಳೆ, ಕರಿಬೇವು, ಬೆಳ್ಳುಳ್ಳಿ

ಒಂದು ಪಾತ್ರೆಯಲ್ಲಿ 3-4 ಚಮಚ ಎಣ್ಣೆ ಹಾಕಿ, ಎಣ್ಣೆ ಬಿಸಿ ಯಾದ ನಂತರ ಸಾಸಿವೆ, ಉದ್ದಿನಬೇಳೆ, ಕರಿಬೇವು ಹಾಗು ಬೆಳ್ಳುಳ್ಳಿ ಸೇರಿಸಿ, ಒಗ್ಗರಣೆ ಮಾಡಿಕೊಳ್ಳಿ. ಬೆಳ್ಳುಳ್ಳಿ ಕೆಂಪಗಾದ ನಂತರ ಈರುಳ್ಳಿ ಹಾಕಿ 5-10 ನಿಮಿಷ ಹುರಿಯಬೇಕು. ಇದಕ್ಕೆ ಹಳದಿ ಪುಡಿ ಸೇರಿಸಿ, 1ನಿಮಿಷ ಹುರಿದುಕೊಂಡು , ಕೊನೆಯಲ್ಲಿ ಟೊಮೇಟೊ ಸೇರಿಸಿ 5 ನಿಮಿಷ ಹುರಿಯಬೇಕು. ನಂತರ ಜಜ್ಜಿದ ಶುಂಠಿ ಹಾಗು ¼ ಕಪ್ ನೀರು ಸೇರಿಸಿ ಹದ ಉರಿಯಲ್ಲಿ 5 ನಿಮಿಷ ಬೇಯಿಸಬೇಕು. ಇದಕ್ಕೆ ರುಚಿಗೆ ತಕ್ಕಷ್ಟು ಉಪ್ಪು ಸೇರಿಸಿ, ಬೇಯಿಸಿದ ಆಲೂಗಡ್ಡೆ ಸೇರಿಸಿ, ನಂತರ ಗರಂ ಮಸಾಲ ಪುಡಿ ಸೇರಿಸಿ ಸಣ್ಣ ಉರಿಯಲ್ಲಿ 5 ನಿಮಿಷ ಬೇಯಿಸಿಕೊಂಡು ಕೊನೆಯಲ್ಲಿ ಕೊತ್ತಂಬರಿ ಸೊಪ್ಪಿನಿಂದ ಅಲಂಕರಿಸಿದರೆ ಆಲೂಗಡ್ಡೆ ಪಲ್ಯ ಸಿದ್ದ.



*- ದಕ್ಷಿಣ ಕನ್ನಡ ಹಾಗು ಮಂಗಳೂರಿನಲ್ಲಿ ಆಲೂಗಡ್ಡೆ ಪಲ್ಯಕ್ಕೆ ಬಾಜಿ ಹಾಗು ಬೇರೆ ಕಡೆಗಳಲ್ಲಿ ಬಾಂಬೆ ಸಾಗು ಎಂದು ಕರೆಯುತ್ತಾರೆ.
(ತುಂಬ ಚಳಿ ಇದ್ದಾಗ ಹಿಟ್ಟು ಹುಳಿ ಬರದಿದ್ದಲ್ಲಿ, ಒಂದು ಪಾತ್ರೆಯಲ್ಲಿ (ಕುಕ್ಕರಿನಲ್ಲಿ) ಸ್ವಲ್ಪ ನೀರು ಬಿಸಿ ಮಾಡಿ ಹಿಟ್ಟಿನ ಪಾತ್ರೆಯನ್ನು ಅದರ ಒಳಗೆ ಇಟ್ಟು ಮುಚ್ಚಿಟ್ಟರೆ ಹಿಟ್ಟು ಚೆನ್ನಾಗಿ ಹುದುಗು ಬರುತ್ತದೆ.)

Saturday, June 27, 2009

ಚಕ್ಕುಲಿ / CHAKKULI



ಮನೆಯಲ್ಲಿದ್ದಾಗ ಅಮ್ಮ ಮಾಡಿದ ಚಕ್ಕುಲಿಯನ್ನು ಡಬ್ಬ ಖಾಲಿಯಾಗುವ ತನಕ ತಿನ್ನೋದು ಬಿಟ್ರೆ, ಹೇಗೆ ಮಾಡುವುದು ಎಂದು ತಿಳಿಯುವ ಗೋಜಿಗೆ ಹೋಗಿರಲಿಲ್ಲ. ನಂತರ ಕೆಲವು ವರ್ಷಗಳ ಕಾಲ ಮೈಸೂರಿನಲ್ಲಿದ್ದಾಗ, ಅಯ್ಯಂಗಾರ್ಸ್ ಬೇಕರಿ, ಶ್ರೀಕೃಷ್ಣ ಬೇಕರಿ, ಮಹಾಲಕ್ಷ್ಮಿ ಸ್ವೀಟ್ಸ್, ಲಾಯಲ್ ವರ್ಲ್ಡ್...ಹೀಗೆ ಎಲ್ಲಾ ಕಡೆ ಒಳ್ಳೆಯ ತಿಂಡಿಗಳು ಸಿಕ್ತಾ ಇದ್ದಾಗ ನಿಜವಾಗಿಯೂ ಮನೆಯಲ್ಲಿ ಮಾಡುವ ಪ್ರಮೇಯವೇ ಬಂದಿರಲಿಲ್ಲ. ಕೊನೆಗೂ ಇಲ್ಲಿ ಬಂದ ಮೇಲೆ ಸ್ವಂತ ಮಾಡಿದ್ರೆನೇ ತಿನ್ನೋ ಭಾಗ್ಯ, ಹೀಗೆ ಶುರುವಾಯಿತು ಚಕ್ಕುಲಿ ಪ್ರಯೋಗ.
(ಫ್ರೆಂಡ್ ಕೃಷ್ಣವೇಣಿಯ ಬ್ಲಾಗ್ ನೋಡಿ ಮಾಡಿದ್ದು)
ಚಕ್ಕುಲಿ ಮಾಡಲು ಬೇಕಾಗುವ ಸಾಮಗ್ರಿಗಳು:
ಬೆಳ್ತಿಗೆ ಅಕ್ಕಿ - 2 ಕಪ್
ಉದ್ದಿನಬೇಳೆ - 1 ಕಪ್ (ಅಥವಾ 1½ ಕಪ್ ನಷ್ಟು ಉದ್ದಿನ ಪುಡಿ)
ಜೀರಿಗೆ - 1 ಚಮಚ
ಬೆಣ್ಣೆ - 4 ಚಮಚ
ಉಪ್ಪು - ರುಚಿಗೆ ತಕ್ಕಷ್ಟು
ಎಣ್ಣೆ - ಕರಿಯಲು

ಮಾಡುವ ವಿಧಾನ:
ಅಕ್ಕಿಯನ್ನು 3-4 ಗಂಟೆ ಅಥವಾ ಇಡೀ ರಾತ್ರಿ ನೀರಿನಲ್ಲಿ ನೆನಸಿಡಬೇಕು. ನಂತರ ಅದನ್ನು ತೊಳೆದುಕೊಂದು, ಸ್ವಲ್ಪ ನೀರು ಸೇರಿಸಿಕೊಂಡು ಗಟ್ಟಿಯಾಗಿ ರುಬ್ಬಬೇಕು. ಉದ್ದಿನಬೇಳೆಯನ್ನು ಘಂ ಎನ್ನುವ ತನಕ ಹುರಿದುಕೊಂಡು, ಮಿಕ್ಸಿಯಲ್ಲಿ ಪುಡಿ ಮಾಡಿಟ್ಟುಕೊಳ್ಳಬೇಕು. ಕೊನೆಯಲ್ಲಿ ರುಬ್ಬಿದ ಅಕ್ಕಿಗೆ, ಉದ್ದಿನಬೇಳೆ ಪುಡಿ, ಬೆಣ್ಣೆ, ಜೀರಿಗೆ, ಉಪ್ಪು ಸೇರಿಸಿಕೊಂಡು ಚೆನ್ನಾಗಿ ಮಿಕ್ಸ್ ಮಾಡಿಕೊಂಡು 30 ನಿಮಿಷ ಮುಚ್ಚಿ ಇಡಬೇಕು.
ಈ ಹಿಟ್ಟನ್ನು ಚಕ್ಕುಲಿ ಅಚ್ಚಿನಲ್ಲಿ ತುಂಬಿಸಿ, ಒಂದು wax ಪೇಪರ್ ಅಥವಾ ಪ್ಲಾಸ್ಟಿಕ್ ಶೀಟ್ ನ ಮೇಲೆ ಒತ್ತಿಕೊಂಡು, ಎಣ್ಣೆಯಲ್ಲಿ ಕರಿದರೆ, ಚಕ್ಕುಲಿ ಸಿದ್ದ.

Thursday, June 18, 2009

ಕಲ್ಲಂಗಡಿ ಹಣ್ಣಿನ ಸಿಪ್ಪೆ ಪಲ್ಯ



ನನ್ನ ಅಮ್ಮ ಈ ಪಲ್ಯ ಮಾಡ್ತಿದ್ದರು. ಆದ್ರೆ ಈ ಪಲ್ಯ ಬೇರೆ ಕಡೆಯಲ್ಲೂ ಫೇಮಸ್ ಇದೆ ಎಂದು ಪಾಕಚಂದ್ರಿಕೆ ಯಲ್ಲಿ ನೋಡಿ ತಿಳಿಯಿತು. ಕಲ್ಲಂಗಡಿ ಹಣ್ಣು ತಿಂದಾದ ನಂತರ ಉಳಿಯುವ ಸಿಪ್ಪೆಯನ್ನು ಬಳಸಿ ಈ ಪಲ್ಯವನ್ನು ಮಾಡಬಹುದು.

ಬೇಕಾಗುವ ಸಾಮಗ್ರಿಗಳು :
ಕಲ್ಲಂಗಡಿ ಹಣ್ಣಿನ ಸಿಪ್ಪೆ - 2-3 ಕಪ್ (ಸಿಪ್ಪೆಯನ್ನು ಒಂದು ಸಲ ನೀರಲ್ಲಿ ತೊಳೆದು ಸಣ್ಣಗೆ ಹೆಚ್ಚಬೇಕು)
ಈರುಳ್ಳಿ - ಸ್ವಲ್ಪ (ಸಣ್ಣಗೆ ಕಟ್ ಮಾಡಿ)
ಟೊಮೇಟೊ - ಸ್ವಲ್ಪ (ಸಣ್ಣಗೆ ಕಟ್ ಮಾಡಿ)

ಮಸಾಲೆಗೆ
ಕೊತ್ತಂಬರಿ ಪುಡಿ - ¾ ಚಮಚ
ಜೀರಿಗೆ ಪುಡಿ - ¾ ಚಮಚ
ಮೆಣಸಿನ ಪುಡಿ (ಬ್ಯಾಡಗಿ) - ¾ ಚಮಚ
ಅರಿಶಿನ ಪುಡಿ - ಸ್ವಲ್ಪ
ತೆಂಗಿನ ಕಾಯಿ ತುರಿ - ¾ ಕಪ್
ಉಪ್ಪು - ರುಚಿಗೆ ತಕ್ಕಷ್ಟು

ಒಗ್ಗರೆಣೆಗೆ
ಎಣ್ಣೆ, ಸಾಸಿವೆ, ಉದ್ದಿನಬೇಳೆ, ಬೆಳ್ಳುಳ್ಳಿ, ಕರಿಬೇವಿನ ಎಲೆ.

ಮಾಡುವ ವಿಧಾನ:
ಒಂದು ಪಾತ್ರೆಯಲ್ಲಿ ಸ್ವಲ್ಪ ಎಣ್ಣೆ ಹಾಕಿ, ಎಣ್ಣೆ ಬಿಸಿಯಾದ ನಂತರ ಒಗ್ಗರಣೆ ಸೇರಿಸಿ, ಕೊನೆಯಲ್ಲಿ ಈರುಳ್ಳಿ ಹಾಕಿ ಸ್ವಲ್ಪ ಹುರಿಯಬೇಕು. ನಂತರ ಟೊಮೇಟೊ (ಅಥವಾ ಸ್ವಲ್ಪ ಹುಣಸೆ ರಸ) , ಹೆಚ್ಚಿದ ಕಲ್ಲಂಗಡಿ ಹಣ್ಣಿನ ಸಿಪ್ಪೆ ಹಾಗು ¼ ಕಪ್ ನೀರು ಸೇರಿಸಿ, 10-15 ನಿಮಿಷ ಹದ ಉರಿಯಲ್ಲಿ ಬೇಯಿಸಬೇಕು. ಕೊನೆಯಲ್ಲಿ ನೀರು ಆವಿಯಾದ ನಂತರ ಎಲ್ಲ ಮಸಾಲೆಯ ಸಾಮಗ್ರಿಗಳನ್ನು ಸೇರಿಸಿ, ಉಪ್ಪು, ಕಾಯಿತುರಿ ಸೇರಿಸಿ 5 ನಿಮಿಷ ಸಣ್ಣ ಉರಿಯಲ್ಲಿ ಬೇಯಿಸಿ ಒಲೆಯಿಂದ ಇಳಿಸಿದರೆ ಪಲ್ಯ ಸಿದ್ದ.

Monday, June 8, 2009

ಖರ್ಜೂರ ಹಲ್ವ / DATE HALWA

ಬೇಕಾಗುವ ಸಾಮಗ್ರಿಗಳು:
ಖರ್ಜೂರ - 10
ಹಾಲು - 1 ಕಪ್ (160 ml)
ಸಕ್ಕರೆ - ½ ಕಪ್ (ನಿಮ್ಮ ರುಚಿಗೆ ಹೊಂದಿಕೊಂಡು)
Dry fruits (ಬಾದಾಮಿ, ಪಿಸ್ತಾ, ಗೋಡಂಬಿ, ಒಣ ದ್ರಾಕ್ಷಿ-ಎಲ್ಲ ಸಣ್ಣಗೆ ಕಟ್ ಮಾಡಿ) - 1ಕಪ್
ತುಪ್ಪ - ¼ ಕಪ್
ಏಲಕ್ಕಿ ಪುಡಿ - ಸ್ವಲ್ಪ
ಮಾಡುವ ವಿಧಾನ:
ಸಣ್ಣಗೆ ತುಂಡು ಮಾಡಿದ ಪಿಸ್ತಾ, ಬಾದಾಮಿ, ಗೋಡಂಬಿಗಳನ್ನು ತುಪ್ಪದಲ್ಲಿ ಹುರಿದು ತೆಗೆದಿಡಬೇಕು. ಖರ್ಜೂರದ ಬೀಜ ತೆಗೆದು, ಅದನ್ನು ಸಣ್ಣಗೆ ಹೆಚ್ಚಿಕೊಳ್ಳಬೇಕು. ಒಂದು ದಪ್ಪತಳದ ಪಾತ್ರೆಯಲ್ಲಿ, ಹಾಲು ಮತ್ತು ಖರ್ಜೂರವನ್ನು ಹದಉರಿಯಲ್ಲಿ ಖರ್ಜೂರ ಮೆತ್ತಗೆ ಆಗುವ ತನಕ (10 ನಿಮಿಷ) ಕುದಿಸಬೇಕು. ಇದಕ್ಕೆ ಸಕ್ಕರೆ ಮತ್ತು ತುಪ್ಪ ಸೇರಿಸಿ, ತಳ ಬಿಡುವ ತನಕ (20 ನಿಮಿಷ) ಕಾಯಿಸಬೇಕು. ಕೊನೆಯಲ್ಲಿ ಏಲಕ್ಕಿ ಪುಡಿ, ಹುರಿದಿಟ್ಟ ಡ್ರೈ fruit ಗಳನ್ನು ಸೇರಿಸಿ, ತುಪ್ಪ ಸವರಿದ ಪ್ಲೇಟ್ ನಲ್ಲಿ ಹರಡಿ ಫ್ರೀಜರ್ ನಲ್ಲಿ 30 ನಿಮಿಷ ಇಟ್ಟು, ನಂತರ ಬೇಕಾದ ಆಕಾರಕ್ಕೆ ತುಂಡು ಮಾಡಿದರೆ, ಖರ್ಜೂರ ಹಲ್ವ ಸಿದ್ದ. ಇದನ್ನು ಫ್ರಿಜ್ ನಲ್ಲಿ ಇಟ್ಟರೆ ತಿನ್ನಲು ತುಂಬ ರುಚಿಯಾಗಿರುತ್ತದೆ.

Tuesday, June 2, 2009

ಮೊಳಕೆ ಕಾಳು - ಬಸಳೆ ಸೊಪ್ಪು ಸಾಂಬಾರ್


ಬೇಕಾಗುವ ಸಾಮಗ್ರಿಗಳು:
ಬಸಳೆ - ½ ಕೆ. ಜಿ.
ಮೊಳಕೆ ಕಾಳು (ಹೆಸರು ಕಾಳು ಅಥವಾ ಹುರುಳಿ ಕಾಳು)- 1 ಕಪ್
ಈರುಳ್ಳಿ - ¼ ಕಪ್
ಟೊಮೇಟೊ - ¼ ಕಪ್
ಹುಣಸೆಹಣ್ಣಿನ ರಸ - ಸಣ್ಣ ನಿಂಬೆ ಗಾತ್ರದ ಹುಣಸೆಹಣ್ಣಿನಿಂದ ತೆಗೆದು
ಬೆಲ್ಲ - ಸ್ವಲ್ಪ (ಬೇಕಿದ್ದರೆ ಮಾತ್ರ)
ಉಪ್ಪು - ರುಚಿಗೆ ತಕ್ಕಷ್ಟು
ಒಗ್ಗರೆಣೆಗೆ- ಎಣ್ಣೆ, ಕರಿಬೇವು, ಸಾಸಿವೆ, ಬೆಳ್ಳುಳ್ಳಿ,

ಮಸಾಲೆಗೆ:
ತೆಂಗಿನಕಾಯಿ ತುರಿ - 1 ಕಪ್
ಬ್ಯಾಡಗಿ ಮೆಣಸು - 5-6
ಕೊತ್ತಂಬರಿ ಬೀಜ - 2 ಚಮಚ
ಜೀರಿಗೆ - 1 ಚಮಚ
ಮೆಂತೆ - 6-8 ಬೀಜ
ಹಳದಿ ಪುಡಿ - ಚಿಟಿಕೆ

ಮಾಡುವ ವಿಧಾನ:
ಬಸಳೆ ಸೊಪ್ಪನ್ನು ದಂಟಿನಿಂದ ಬೇರ್ಪಡಿಸಿ, ತೊಳೆದು ಇಟ್ಟುಕೊಳ್ಳಬೇಕು.
ಬಸಳೆ ದಂಟನ್ನು 2-3 ಇಂಚು ಉದ್ದದ ತುಂಡು ಮಾಡಿಕೊಂಡು, ಮೊಳಕೆ ಕಾಳು ಸೇರಿಸಿ, ಕುಕ್ಕರಿನಲ್ಲಿ ಬೇಯಿಸಿಟ್ಟುಕೊಳ್ಳಬೇಕು.
ಮಸಾಲೆಯ ಎಲ್ಲ ಸಾಮಗ್ರಿಗಳನ್ನು ಒಂದೊಂದಾಗಿ ಪರಿಮಳ ಬರುವ ತನಕ ಹುರಿಯಬೇಕು. ಕೊನೆಯಲ್ಲಿ ಸ್ವಲ್ಪ ಎಣ್ಣೆ ಹಾಕಿ ಮೆಣಸನ್ನು ಹುರಿಯಬೇಕು. ಈ ಮಸಾಲೆ ಸಾಮಗ್ರಿಗಳನ್ನು ತೆಂಗಿನತುರಿ ಸೇರಿಸಿ , ಸ್ವಲ್ಪ ನೀರು ಸೇರಿಸಿಕೊಂಡು ರುಬ್ಬಿಟ್ಟು ಕೊಳ್ಳಬೇಕು.
ಬೇಯಿಸಿದ ದಂಟು, ಕಾಳು, ತುಂಡು ಮಾಡಿದ ಸೊಪ್ಪು, ಟೊಮೇಟೊ, ಈರುಳ್ಳಿ, ಹುಣಸೆ ರಸ, ಉಪ್ಪು, ಸ್ವಲ್ಪ ಬೆಲ್ಲ ಸೇರಿಸಿ 5 ನಿಮಿಷ ಕುದಿಸಬೇಕು. ಕೊನೆಯಲ್ಲಿ ರುಬ್ಬಿದ ಮಸಾಲೆ ಸೇರಿಸಿ, 5-10 ನಿಮಿಷ ಸಣ್ಣ ಉರಿಯಲ್ಲಿ ಕುದಿಸಿ, ಒಲೆಯಿಂದ ಇಳಿಸಬೇಕು. ಕೊನೆಯಲ್ಲಿ ಒಗ್ಗರಣೆ ಸೇರಿಸಿ.

Monday, May 25, 2009

STUFFED ಬೆಂಡೆಕಾಯಿ (STUFFED BHINDI / OKRA)

ಬೇಕಾಗುವ ಸಾಮಗ್ರಿಗಳು:
ಬೆಂಡೆಕಾಯಿ - 8-10
ಈರುಳ್ಳಿ - ¼ ಕಪ್ (ಸಣ್ಣಗೆ ಹೆಚ್ಚಿ)
ತೆಂಗಿನ ತುರಿ - 1 ಕಪ್
ಕೊತ್ತಂಬರಿ ಪುಡಿ - ¾ ಚಮಚ
ಜೀರಿಗೆ ಪುಡಿ - ¾ ಚಮಚ
ಮೆಣಸಿನ ಪುಡಿ - 1 ಚಮಚ
ಹಳದಿ - ಚಿಟಿಕೆ
ಹಿಂಗು - ಚಿಟಿಕೆ
ಹುಣಸೆಹಣ್ಣಿನ ರಸ - ಸಣ್ಣ ನಿಂಬೆ ಗಾತ್ರದ ಹುಣಸೆಹಣ್ಣಿನಿಂದ ತೆಗೆದದ್ದು
ಕೊತ್ತಂಬರಿ ಸೊಪ್ಪು - 2 ಚಮಚ (ಸಣ್ಣಗೆ ಹೆಚ್ಚಿ)
ಉಪ್ಪು - ರುಚಿಗೆ ತಕ್ಕಷ್ಟು
ಎಣ್ಣೆ - ಸ್ವಲ್ಪ

ಮಾಡುವ ವಿಧಾನ:

ಬೆಂಡೆಕಾಯಿಯನ್ನು ನೀರಿನಲ್ಲಿ ತೊಳೆದು ಚೆನ್ನಾಗಿ ಒರೆಸಬೇಕು. ತೊಟ್ಟು ತೆಗೆದ ಬೆಂಡೆಕಾಯಿಯನ್ನು ಬುಡದಿಂದ ¾ ಭಾಗದ ತನಕ ಉದ್ದಕ್ಕೆ 2 ಸೀಳು ಮಾಡಬೇಕು. ತೆಂಗಿನತುರಿಯನ್ನು ಘಂ ಎನ್ನುವ ತನಕ ಹುರಿದುಕೊಂಡು, ತರಿತರಿಯಾಗಿ ಪುಡಿ ಮಾಡಬೇಕು. ಇದಕ್ಕೆ ಎಲ್ಲ ಮಸಾಲೆ ಸಾಮಗ್ರಿ, ಈರುಳ್ಳಿ, ಹುಣಸೆಹಣ್ಣಿನ ರಸ, ಕೊತ್ತಂಬರಿ ಸೊಪ್ಪು ಸೇರಿಸಿ ಚೆನ್ನಾಗಿ ಮಿಕ್ಸ್ ಮಾಡಬೇಕು. ಬೇಕಿದ್ದರೆ ಸ್ವಲ್ಪ ನೀರು ಸೇರಿಸಬಹುದು. ಈ ಮಸಾಲೆಯನ್ನು ಸೀಳಿಟ್ಟ ಬೆಂಡೆಕಾಯಿಯ ಒಳಗೆ ತುಂಬಿಸಬೇಕು. ಒಂದು ನಾನ್ ಸ್ಟಿಕ್ ಕಾವಲಿಯಲ್ಲಿ, ಸ್ವಲ್ಪ ಎಣ್ಣೆ ಹಾಕಿ, ಬೆಂಡೆಕಾಯಿಗಳನ್ನಿಟ್ಟು, ಸಣ್ಣ ಉರಿಯಲ್ಲಿ 30 ನಿಮಿಷ (10 ನಿಮಿಷಕ್ಕೊಮ್ಮೆ ಬೆಂಡೆಕಾಯಿಯನ್ನು ತಿರುಗಿಸುತ್ತಿರಬೇಕು) ಬೇಯಿಸಬೇಕು.

Thursday, May 7, 2009

ಪನೀರ್ ಮಟರ್ / PANEER MATTAR

ಬೇಕಾಗುವ ಸಾಮಗ್ರಿಗಳು:
ಪನೀರ್ (Paneer) - 100 ಗ್ರಾಂ
ಬಟಾಣಿ (mattar) -1 ½ ಕಪ್ (ಬೇಯಿಸಿದ್ದು / Frozen)
ಈರುಳ್ಳಿ - 1 ಕಪ್
ಟೊಮೇಟೊ ಪ್ಯೂರಿ (Tomato puree) – 5 ಚಮಚ / 1 ಟೊಮೇಟೊದ್ದು
ಕ್ರೀಂ - ½ ಕಪ್
ಶುಂಠಿ - 1 ಚಮಚ (ತುರಿದು)
ಬೆಳ್ಳುಳ್ಳಿ - 1 ಚಮಚ (ತುರಿದು)
ಜೀರಿಗೆ - ½ ಚಮಚ
ಗೋಡಂಬಿ ಬೀಜ - 5 (ಚೆನ್ನಾಗಿ ಪುಡಿ ಮಾಡಿ)
ಜೀರಿಗೆ ಪುಡಿ - ½ ಚಮಚ
ಕೊತ್ತಂಬರಿ ಪುಡಿ - ½ ಚಮಚ
ಮೆಣಸಿನ ಪುಡಿ - 1- 2 ಚಮಚ
ಮೆಂತ್ಯ ಪುಡಿ - ಚಿಟಿಕೆ
ಅರಿಶಿನ ಪುಡಿ - ಚಿಟಿಕೆ
ಎಣ್ಣೆ - 1- 2 ಟೇಬಲ್ ಸ್ಪೂನ್
ಉಪ್ಪು - ರುಚಿಗೆ ತಕ್ಕಷ್ಟು

ಮಾಡುವ ವಿಧಾನ:
ಪನೀರ್ ನ್ನು ಸಣ್ಣಗೆ ಕಟ್ ಮಾಡಿ, ಎಣ್ಣೆಯಲ್ಲಿ ಸ್ವಲ್ಪ ಕೆಂಪು ಬಣ್ಣ ಬರುವ ತನಕ ಹುರಿದು ಪ್ಲೇಟ್ ನಲ್ಲಿ ತೆಗೆದು ಇಡಬೇಕು. ಇದೇ ಎಣ್ಣೆಗೆ, ಜೀರಿಗೆ, ಶುಂಠಿ, ಬೆಳ್ಳುಳ್ಳಿ, ಗೋಡಂಬಿ ಪುಡಿಯನ್ನು ಸೇರಿಸಿಕೊಂಡು, 1 ನಿಮಿಷ ಹುರಿಯಬೇಕು. ಈರುಳ್ಳಿಯನ್ನು ಸೇರಿಸಿ, ಕೆಂಪಗಾಗುವ ತನಕ ಹುರಿಯಬೇಕು. ನಂತರ ಎಲ್ಲಾ ಮಸಾಲೆಯ ಸಾಮಗ್ರಿಗಳನ್ನು ಸೇರಿಸಿಕೊಂಡು, ಸಣ್ಣ ಉರಿಯಲ್ಲಿ 2-3 ನಿಮಿಷ ಹುರಿಯಬೇಕು. ಟೊಮೇಟೊ ಪ್ಯೂರೀ ಸೇರಿಸಿ, 5 ನಿಮಿಷ ಹುರಿದುಕೊಂಡು, ನಂತರ ಬಟಾಣಿ ಸೇರಿಸಿ, ½ ಕಪ್ ನೀರು ಸೇರಿಸಿ ಸಣ್ಣ ಉರಿಯಲ್ಲಿ 10 ನಿಮಿಷ ಮುಚ್ಚಿ ಬೇಯಿಸಬೇಕು. ನಂತರ ಹುರಿದ ಪನೀರ್ ಸೇರಿಸಿ, 5 ನಿಮಿಷ ಸಣ್ಣ ಉರಿಯಲ್ಲಿ ಕುದಿಸಿ, ಕೊನೆಯಲ್ಲಿ ½ ಕಪ್ ಕ್ರೀಂ , ಉಪ್ಪು ಸೇರಿಸಿ, ಸಣ್ಣ ಉರಿಯಲ್ಲಿ 5 ನಿಮಿಷ ಕುದಿಸಬೇಕು. ಪನೀರ್ ಹಾಕಿದ ನಂತರ ಇದನ್ನು ಜೋರಾಗಿ ಮಿಕ್ಸ್ ಮಾಡಬಾರದು. ಇದನ್ನು ಕೊತ್ತಂಬರಿ ಸೊಪ್ಪಿನಿಂದ ಅಲಂಕರಿಸಿ ಚಪಾತಿ, ರೊಟ್ಟಿ ಯೊಂದಿಗೆ ತಿನ್ನಬಹುದು.

Wednesday, May 6, 2009

ಮಿಲ್ಕ್ ಶೇಕ್ ಗಳು

ಬೇಸಗೆಯ ಸೆಖೆಗೆ, ಮನೆಗೆ ಬಂದು ತಣ್ಣನೆಯ ಜ್ಯೂಸ್/ ಮಿಲ್ಕ್ ಶೇಕ್ ಕುಡಿದರೆ, ಹಾಯಾಗಿರುತ್ತದೆ ಹಾಗು ಆರೋಗ್ಯಕ್ಕೂ ಒಳ್ಳೆಯದು.

ಸ್ಟ್ರಾಬೆರಿ ಜ್ಯೂಸ್ / ಮಿಲ್ಕ್ ಶೇಕ್ :
ಸ್ಟ್ರಾಬೆರಿ - 6-10
ಸಕ್ಕರೆ - 4 ಚಮಚ
ತಣ್ಣಗಿನ ಹಾಲು - 1- 1½ ಗ್ಲಾಸ್
ಸ್ಟ್ರಾಬೆರಿ ಯನ್ನು ತುಂಡು ಮಾಡಿ, ಸಕ್ಕರೆ ಹಾಲು ಸೇರಿಸಿ ಮಿಕ್ಸಿ ಯಲ್ಲಿ 2-3 ನಿಮಿಷ ರುಬ್ಬಿಕೊಂಡು ಗ್ಲಾಸ್ ಗೆ ಹಾಕಿದರೆ, ಸ್ಟ್ರಾಬೆರಿ ಜ್ಯೂಸ್ / ಮಿಲ್ಕ್ ಶೇಕ್ ಕುಡಿಯಲು ಸಿದ್ದ.



ಸೇಬು (APPLE) ಮಿಲ್ಕ್ ಶೇಕ್
Apple - 1
ಸಕ್ಕರೆ - 4 ಚಮಚ
ಹಾಲು - 1- 1½ ಗ್ಲಾಸ್
ಸೇಬನ್ನು ತುಂಡು ಮಾಡಿ, ಬೀಜ ತೆಗೆದು (ಬೇಕಿದ್ದರೆ ಸಿಪ್ಪೆ ಕೂಡ, ನಿಮ್ಮಿಷ್ಟ) ಮಿಕ್ಸಿಯಲ್ಲಿ ರುಬ್ಬಿದರೆ, ಆಪಲ್ ಜ್ಯೂಸ್ / ಮಿಲ್ಕ್ ಶೇಕ್ ಸಿದ್ದ. ಇದಕ್ಕೆ ಹತ್ತು ಕಾಳು ಏಲಕ್ಕಿ ಹಾಕಿದರೆ, flavour ತುಂಬಾ ಚೆನ್ನಾಗಿರುತ್ತದೆ.

Thursday, April 30, 2009

ಕಡಾಯಿ ಮಶ್ರೂಮ್ / KADAI MUSHROOM


ಬೇಕಾಗುವ ಸಾಮಗ್ರಿಗಳು:
ಮಶ್ರೂಮ್ (Button Mushroom) - 200 ಗ್ರಾಂ
ಕ್ಯಾಪ್ಸಿಕಂ (Capsicum / Bell pepper) - ¼ ಕಪ್ (ಉದ್ದಕ್ಕೆ ಹೆಚ್ಚಿದ್ದು)
ಬಟಾಣಿ - ¼ ಕಪ್ (ಬೇಯಿಸಿದ್ದು / Frozen)
ಈರುಳ್ಳಿ - 1 ಕಪ್
ಟೊಮೇಟೊ - ½ ಕಪ್ (ಹೆಚ್ಚಿದ್ದು)
ಟೊಮೇಟೊ ಪ್ಯೂರಿ (Tomato puree) – 5 ಚಮಚ
ಕ್ರೀಂ - ½ ಕಪ್ (Whipping cream)
ಶುಂಠಿ - 1 ಚಮಚ (ತುರಿದು)
ಬೆಳ್ಳುಳ್ಳಿ - 1 ಚಮಚ (ತುರಿದು)
ಜೀರಿಗೆ - ½ ಚಮಚ
ಜೀರಿಗೆ ಪುಡಿ - 1 ಚಮಚ
ಕೊತ್ತಂಬರಿ ಪುಡಿ - 1 ಚಮಚ
ಮೆಣಸಿನ ಪುಡಿ - 1- 2 ಚಮಚ
ಮೆಂತ್ಯ ಪುಡಿ - ಚಿಟಿಕೆ
ಅರಿಶಿನ ಪುಡಿ - ಚಿಟಿಕೆ
ಎಣ್ಣೆ - 1-2 ಟೇಬಲ್ ಸ್ಪೂನ್
ಉಪ್ಪು - ರುಚಿಗೆ ತಕ್ಕಷ್ಟು
ಮಾಡುವ ವಿಧಾನ:
ಮಶ್ರೂಮ್ ನ್ನು, ಒದ್ದೆ ಬಟ್ಟೆಯಲ್ಲಿ ಒರೆಸಿ, ತುಂಡು ಮಾಡಿಟ್ಟುಕೊಳ್ಳಬೇಕು.
ಬಾಣಲೆಯಲ್ಲಿ ಎಣ್ಣೆ ಬಿಸಿ ಮಾಡಿ, ಜೀರಿಗೆಯನ್ನು ಹುರಿದುಕೊಂಡು, ಶುಂಠಿ- ಬೆಳ್ಳುಳ್ಳಿಯನ್ನು ಸೇರಿಸಿಕೊಂಡು, 1 ನಿಮಿಷ ಹುರಿಯಬೇಕು. ನಂತರ ಇದಕ್ಕೆ ಈರುಳ್ಳಿಯನ್ನು ಸೇರಿಸಿ, ಕೆಂಪಗಾಗುವ ತನಕ ಹುರಿಯಬೇಕು. ನಂತರ ಎಲ್ಲಾ ಮಸಾಲೆಯ ಸಾಮಗ್ರಿಗಳನ್ನು ಸೇರಿಸಿಕೊಂಡು, ಸಣ್ಣ ಉರಿಯಲ್ಲಿ 2-3 ನಿಮಿಷ ಹುರಿಯಬೇಕು. ಇದಕ್ಕೆ ಟೊಮೇಟೊ ಪ್ಯೂರಿ, ಟೊಮೇಟೊ ಸೇರಿಸಿ , 5 ನಿಮಿಷ ಹುರಿದುಕೊಂಡು, ನಂತರ ಕಟ್ ಮಾಡಿದ ಮಶ್ರೂಮ್, ಕ್ಯಾಪ್ಸಿಕಂ , ಬಟಾಣಿ ಸೇರಿಸಿ, ಸಣ್ಣ ಉರಿಯಲ್ಲಿ 30 ನಿಮಿಷ ಮುಚ್ಚಿ ಬೇಯಿಸಬೇಕು. ಕೊನೆಯಲ್ಲಿ ½ ಕಪ್ ಕ್ರೀಂ ಸೇರಿಸಿ, ಒಂದು ಸಲ ಕುದಿಸಿ, ಉಪ್ಪು ಸೇರಿಸಿ, ಒಲೆಯಿಂದ ಇಳಿಸಿದರೆ, ಕಡಾಯಿ ಮಶ್ರೂಮ್ ಸಿದ್ದ. ಇದನ್ನು ಕೊತ್ತಂಬರಿ ಸೊಪ್ಪಿನಿಂದ ಅಲಂಕರಿಸಿ ಚಪಾತಿ, ರೊಟ್ಟಿ ಯೊಂದಿಗೆ ತಿನ್ನಬಹುದು.

ಮಶ್ರೂಮ್ ನ್ನು ನೀರಿನಲ್ಲಿ ಮುಳುಗಿಸಿ ತೊಳೆದರೆ, ಅದು ಬೇಯಿಸುವಾಗ crispness ಕಳೆದುಕೊಳ್ಳುತ್ತದೆ. ಹಾಗೆಯೇ ಬೇಯಿಸುವಾಗ ಕೂಡ, ನೀರು ಸೇರಿಸಬಾರದು. ಸಣ್ಣ ಉರಿಯಲ್ಲಿ ಬೇಯಿಸಿದರೆ ಅದು ನೀರು ಬಿಟ್ಟುಕೊಳ್ಳುತ್ತದೆ. ಇದೇ ನೀರು ಬೇಯಲು ಸಾಕಾಗುತ್ತದೆ. ಇದನ್ನು ಕ್ರೀಂ ಸೇರಿಸದೆ ಕೂಡ ಮಾಡಬಹುದು.

ಮನೆಯಲ್ಲಿ ಟೊಮೇಟೊ ಪ್ಯೂರಿ ಮಾಡುವ ವಿಧಾನ - ಕುದಿಯುವ ನೀರಿಗೆ ಇಡೀ ಟೊಮೇಟೊವನ್ನು ಹಾಕಿಕೊಂಡು, 5-10 ನಿಮಿಷ ಕುದಿಸಬೇಕು. ತಣ್ಣಗಾದ ನಂತರ ಸಿಪ್ಪೆ ತೆಗೆದುಕೊಂಡು, ಮಿಕ್ಸಿಯಲ್ಲಿ ರುಬ್ಬಿಕೊಳ್ಳಬೇಕು.

Friday, April 24, 2009

ಹೆಸರುಕಾಳು ವಡೆ / MUNG BEAN VADA


ಬೇಕಾಗುವ ಸಾಮಗ್ರಿಗಳು:
ಹೆಸರುಕಾಳು - 2 ಕಪ್ (ಮೊಳಕೆ ಬರಿಸಿದ್ದು)
ಈರುಳ್ಳಿ - 1 ಕಪ್ (ಸಣ್ಣಗೆ ಹೆಚ್ಚಿ)
ಬೆಳ್ಳುಳ್ಳಿ ತುರಿದು - 1 ಚಮಚ
ಶುಂಠಿ ತುರಿದು - 1 ಚಮಚ
ಜೀರಿಗೆ - ½ ಚಮಚ
ಎಳ್ಳು - ½ ಚಮಚ
ಕೊತ್ತಂಬರಿ ಸೊಪ್ಪು - 2 ಚಮಚ (ಸಣ್ಣಗೆ ಹೆಚ್ಚಿ)
ಕರಿಬೇವು - 1 ಚಮಚ (ಸಣ್ಣಗೆ ಹೆಚ್ಚಿ)
ಹಸಿಮೆಣಸು - 1- 2 (ಸಣ್ಣಗೆ ಹೆಚ್ಚಿ)
ಕಾರದ ಪುಡಿ - ¼ ಚಮಚ
ಕಡ್ಲೆ ಹಿಟ್ಟು - 1 ಟೇಬಲ್ ಚಮಚ
ಕಾರ್ನ್ ಫ್ಲೋರ್ - 1 ಟೇಬಲ್ ಚಮಚ
ಉಪ್ಪು - ½ ಚಮಚ / ರುಚಿಗೆ ತಕ್ಕಷ್ಟು
ಕರಿಯಲು ಎಣ್ಣೆ
ಮಾಡುವ ವಿಧಾನ:
ಮೊಳಕೆ ಬರಿಸಿದ ಹೆಸರುಕಾಳನ್ನು ಮಿಕ್ಸಿಯಲ್ಲಿ ತರಿ ತರಿಯಾಗಿ ರುಬ್ಬಬೇಕು. ಇದಕ್ಕೆ ಮೇಲಿನ ಎಲ್ಲ ಸಾಮಗ್ರಿಗಳನ್ನು ಸೇರಿಸಿ (ನೀರು ಹಾಕದೆ) ಚೆನ್ನಾಗಿ ಮಿಕ್ಸ್ ಮಾಡಬೇಕು. ಇದರಿಂದ 10 ಉಂಡೆಗಳನ್ನು ಮಾಡಿ ಬೇಕಾದ ಆಕಾರದಲ್ಲಿ ಕೈಯಿಂದ ಒತ್ತಿ, ಕೆಂಬಣ್ಣ ಬರುವವರೆಗೆ, ಕಾದ ಎಣ್ಣೆಯಲ್ಲಿ ಹದ ಉರಿಯಲ್ಲಿ ಕರಿದರೆ, ಹೆಸರುಕಾಳು ವಡೆ/ ಪಕೋಡ ಸಿದ್ದ. ಇದನ್ನು, ಟೊಮೇಟೊ ಸಾಸ್ / ತೆಂಗಿನ ಕಾಯಿ ಚಟ್ನಿ ಯೊಂದಿಗೆ ತಿನ್ನಬಹುದು.

ಇದಕ್ಕೆ ಎಲ್ಲಿಯೂ ನೀರು ಸೇರಿಸಬಾರದು. ಮೊಳಕೆ ಬರಿಸಿದ ಹೆಸರುಕಾಳು ಇಲ್ಲದಿದ್ದಲ್ಲಿ, ಹೆಸರುಕಾಳನ್ನು ನೀರಿನಲ್ಲಿ 5-6 ಗಂಟೆ ನೆನೆಸಿ ಉಪಯೋಗಿಸಬಹುದು. ಉಂಡೆ ಮಾಡುವಾಗ ಅಂಟು ಬರದಿದ್ದಲ್ಲಿ, ಸ್ವಲ್ಪ ಹಿಟ್ಟು ಜಾಸ್ತಿ ಹಾಕಿ ಉಂಡೆ ಮಾಡಬಹುದು.

Friday, April 10, 2009

ಅವಿಲ್ / ಅವಿಯಲ್ / AVIAL

ಅವಿಲ್ ಅಥವಾ ಆವಿಯಲ್ ಮಲಯಾಳಿಗರ ಓಣಂ ಊಟದ ಪ್ರಮುಖ ಡಿಶ್. ಮನೆಯಲ್ಲಿ ಎಲ್ಲಾ ತರಕಾರಿಗಳು ಸ್ವಲ್ಪ ಸ್ವಲ್ಪ ಇದ್ದರೆ, ಇದು ಒಂದು ರುಚಿಯಾದ ಅಡುಗೆ.




ಅವಿಲ್ ಮಾಡಲು ಬೇಕಾಗುವ ಸಾಮಗ್ರಿಗಳು:
ತರಕಾರಿಗಳು - 3-4 ಕಪ್ (ತೊಂಡೆಕಾಯಿ, ಬಾಳೆಕಾಯಿ, ಸುವರ್ಣಗಡ್ಡೆ, ಬೀನ್ಸ್, ಹೀರೆಕಾಯಿ, ಸೋರೆಕಾಯಿ, ಪಡುವಲಕಾಯಿ, ಸೌತೆಕಾಯಿ, ಆಲೂಗಡ್ಡೆ -ಎಲ್ಲಾ ತರಕಾರಿಗಳನ್ನು ಸ್ವಲ್ಪ ದೊಡ್ಡದಾಗಿ ಕಟ್ ಮಾಡಬೇಕು)
ನನಗೆ ಎಲ್ಲಾ ತರಕಾರಿಗಳು ಸಿಗದ ಕಾರಣ ಬಾಳೆಕಾಯಿ, ಬೀನ್ಸ್, ಆಲೂಗಡ್ಡೆ ಹಾಗು ಅವರೆಕಾಳು ಹಾಕಿ ಮಾಡಿದ್ದೇನೆ)
ತೆಂಗಿನ ತುರಿ - 1 ಕಪ್
ಹಸಿಮೆಣಸು - 3
ಜೀರಿಗೆ - 1 ಚಮಚ
ಶುಂಠಿ - 2 ಸೆ.ಮಿ ತುಂಡು
ಬೆಳ್ಳುಳ್ಳಿ - 1 ಎಸಳು (ಬೇಕಿದ್ದರೆ ಮಾತ್ರ)
ಮೊಸರು - ½ ಕಪ್

ಹಳದಿ ಪುಡಿ - ಸ್ವಲ್ಪ
ಉಪ್ಪು - ರುಚಿಗೆ ತಕ್ಕಷ್ಟು
ಕರಿಬೇವು- 8- 10 ಎಲೆ
ತೆಂಗಿನ ಎಣ್ಣೆ - 2 ಚಮಚ

ಮಾಡುವ ವಿಧಾನ :
ತರಕಾರಿಯನ್ನು 2 ಹಸಿಮೆಣಸು, ಒಂದು ಕಪ್ ನೀರು ಸೇರಿಸಿ ಬೇಯಿಸಿ ಇಟ್ಟುಕೊಳ್ಳಬೇಕು.
ತೆಂಗಿನತುರಿಯನ್ನು 1 ಹಸಿಮೆಣಸು, ಶುಂಠಿ, ಬೆಳ್ಳುಳ್ಳಿ, ಹಳದಿ ಪುಡಿ ಸೇರಿಸಿ ರುಬ್ಬಬೇಕು. ಇದನ್ನು ಬೇಯಿಸಿದ ತರಕಾರಿಯೊಂದಿಗೆ ಬೆರೆಸಿ, ಉಪ್ಪು, ಕೊನೆಯಲ್ಲಿ ಮೊಸರು ಸೇರಿಸಿ, ಸಣ್ಣ ಉರಿಯಲ್ಲಿ 5 ನಿಮಿಷ ಕುದಿಸಬೇಕು. ಕೊನೆಯಲ್ಲಿ ಎಣ್ಣೆ ಬಿಸಿ ಮಾಡಿ ಕರಿಬೇವಿನ ಒಗ್ಗರಣೆ ಕೊಟ್ಟರೆ ಅವಿಲ್ ಸಿದ್ದ.
ಅವಿಲ್ ಸಾಂಬಾರಿಗಿಂತ ಗಟ್ಟಿಯಾಗಿ ಇರುತ್ತದೆ. ಇದನ್ನು ಅನ್ನ ಹಾಗು ಚಪಾತಿಯೊಂದಿಗೆ ತಿನ್ನಬಹುದು.

ವೆಜಿಟೇಬಲ್ ಕಟ್ಲೆಟ್ / VEGETABLE CUTLET


ಬೇಕಾಗುವ ಸಾಮಗ್ರಿಗಳು:
ಬೇಯಿಸಿದ ಆಲೂಗಡ್ಡೆ - 2 ಕಪ್ (ಸಿಪ್ಪೆ ತೆಗೆದು ಸಣ್ಣಗೆ ಪುಡಿ ಮಾಡಿದ್ದು)
ಬೇಯಿಸಿದ ತರಕಾರಿಗಳು - 1 ಕಪ್ ( ಸಣ್ಣಗೆ ಹೆಚ್ಚಿದ ಕ್ಯಾರೆಟ್, ಬೀನ್ಸ್, ಬಟಾಣಿ)
ಕೊತ್ತಂಬರಿ ಸೊಪ್ಪು - ¼ ಕಪ್ (ಸಣ್ಣಗೆ ಹೆಚ್ಚಿದ್ದು)
ಶುಂಠಿ - 2 ಚಮಚ (ತುರಿದು)
ಹಸಿಮೆಣಸು - 1-2 (ಸಣ್ಣಗೆ ಹೆಚ್ಚಿದ್ದು)
ಗರಂ ಮಸಾಲ ಪುಡಿ - ¼ - ½ ಚಮಚ
ಚಾಟ್ ಮಸಾಲ ಪುಡಿ - ¼ ಚಮಚ
ಲಿಂಬೆ ರಸ- 2 ಚಮಚ
ಉಪ್ಪು - ರುಚಿಗೆ ತಕ್ಕಷ್ಟು
ಬ್ರೆಡ್ ಪುಡಿ * - ¼ ಕಪ್
ರವೆ - ¼ ಕಪ್
ಮೈದಾ - 3 ಚಮಚ
ಎಣ್ಣೆ - ಕರಿಯಲು

ಮಾಡುವ ವಿಧಾನ:
ಒಂದು ಪಾತ್ರೆಯಲ್ಲಿ, ಬೇಯಿಸಿದ ಎಲ್ಲಾ ತರಕಾರಿಗಳನ್ನು(ತರಕಾರಿಯಲ್ಲಿ ಸ್ವಲ್ಪ ಕೂಡ ನೀರು ಇರಬಾರದು) ಹಾಕಿ, ಮಸಾಲೆಯ ಸಾಮಗ್ರಿಗಳನ್ನು ಹಾಗು ಹಸಿ ಮೆಣಸು, ಶುಂಠಿ, ಉಪ್ಪು, ಲಿಂಬೆ ರಸ, ಕೊತ್ತಂಬರಿ ಸೊಪ್ಪನ್ನು ಸೇರಿಸಿ ಚೆನ್ನಾಗಿ ಮಿಕ್ಸ್ ಮಾಡಬೇಕು. ಇದನ್ನು 10 ಉಂಡೆ ಮಾಡಿ ಬೇಕಾದ ಆಕಾರದಲ್ಲಿ 1 ರಿಂದ 1.5 ಇಂಚು ದಪ್ಪಗೆ ತಟ್ಟಬೇಕು.
3 ಚಮಚ ಮೈದಾ ಹಿಟ್ಟಿಗೆ, ¼ ಕಪ್ ನೀರು ಸೇರಿಸಿ, ಚೆನ್ನಾಗಿ ಗಂಟಿಲ್ಲದೆ ಕಲಸಿ ಇಟ್ಟುಕೊಳ್ಳಬೇಕು.
ತಟ್ಟಿದ ಕಟ್ಲೆಟ್ ನ್ನು ಮೈದಾ ಹಿಟ್ಟಿನಲ್ಲಿ ಮುಳುಗಿಸಿ ಬ್ರೆಡ್ ಪುಡಿ ಹಾಗು ರವೆ (1:1) ಪುಡಿಯಲ್ಲಿ ಹೊರಳಾಡಿಸಿ ಎಣ್ಣೆಯಲ್ಲಿ ಕೆಂಬಣ್ಣ ಬರುವ ತನಕ ಕಾಯಿಸಿದರೆ ಕಟ್ಲೆಟ್ ರೆಡಿ. ಇದನ್ನು ಕಡಿಮೆ ಎಣ್ಣೆ ಉಪಯೋಗಿಸಿ, ಕಾವಲಿಯಲ್ಲಿ ಕರಿದು ಕೂಡ ಮಾಡಬಹುದು. . ಇದನ್ನು ಟೊಮೇಟೊ ಸಾಸ್ ಅಥವಾ ಸಿಹಿ ಚಟ್ನಿಯೊಂದಿಗೆ ತಿನ್ನಬಹುದು.
ತರಕಾರಿಯಲ್ಲಿ ನೀರಿನ ಅಂಶ ಇದ್ದರೆ ಕಟ್ಲೆಟ್ ಮಾಡುವಾಗ ಪುಡಿಯಾಗುತ್ತದೆ. ಹಾಗಾದಲ್ಲಿ ಸ್ವಲ್ಪ ಬ್ರೆಡ್ ಪುಡಿ ಸೇರಿಸಿ ಬೆರೆಸಬಹುದು.

ಬ್ರೆಡ್ ಪುಡಿ * /Bread crumbs/ ರಸ್ಕ್ ಪುಡಿ - ಇದು ಸೂಪರ್ ಮಾರ್ಕೆಟ್ ಗಳಲ್ಲಿ ಸಿಗುತ್ತದೆ.
ಮನೆಯಲ್ಲಿ ಬ್ರೆಡ್ ಪುಡಿ ಮಾಡುವ ವಿಧಾನ- ಬ್ರೆಡ್ ನ್ನು ಓವೆನ್ ನಲ್ಲಿ ಇಟ್ಟು ಚೆನ್ನಾಗಿ ರೋಸ್ಟ್ ಮಾಡಬೇಕು. ಇದನ್ನು ನಂತರ ಮಿಕ್ಸಿ ಯಲ್ಲಿ ಪುಡಿ ಮಾಡಿ ಇಟ್ಟು ಕೊಳ್ಳಬೇಕು.

Saturday, April 4, 2009

ಮಜ್ಜಿಗೆ ನೀರು / BUTTERMILK



ಬೇಕಾಗುವ ಸಾಮಗ್ರಿಗಳು:
ಮೊಸರು - 1 ಗ್ಲಾಸ್
ಶುಂಠಿ - ಸ್ವಲ್ಪ
ಕೊತ್ತಂಬರಿ ಸೊಪ್ಪು - 2 ಚಮಚ (ಸಣ್ಣಗೆ ಹೆಚ್ಚಿದ್ದು)
ಹಸಿಮೆಣಸು - 1
ಉಪ್ಪು - ರುಚಿಗೆ ತಕ್ಕಷ್ಟು
ಒಗ್ಗರೆಣೆಗೆ -
ಎಣ್ಣೆ - 1 ಚಮಚ
ಸಾಸಿವೆ - ¼ ಚಮಚ
ಕರಿಬೇವು - 3-4 ಎಲೆಗಳು
ಹಿಂಗು - ಸ್ವಲ್ಪ

ಮಾಡುವ ವಿಧಾನ:
ಮೊಸರನ್ನು ಮಿಕ್ಸಿಯಲ್ಲಿ ಸ್ವಲ್ಪ ಕಡೆದುಕೊಳ್ಳಬೇಕು. ಇದನ್ನು ಒಂದು ಪಾತ್ರೆಗೆ ಹಾಕಿ, ಜಜ್ಜಿದ ಶುಂಠಿ, ಸೀಳಿದ ಹಸಿಮೆಣಸು, ಉಪ್ಪು, ಕೊತ್ತಂಬರಿ ಸೊಪ್ಪು, ಬೇಕಾದಷ್ಟು ನೀರು (2-3 ಗ್ಲಾಸ್) ಸೇರಿಸಬೇಕು. ಕೊನೆಯಲ್ಲಿ ಒಗ್ಗರಣೆ ಸೇರಿಸಿದರೆ, ರುಚಿಯಾದ ಮಜ್ಜಿಗೆ ನೀರು ರೆಡಿ.

Sunday, March 29, 2009

ಮಾವಿನಕಾಯಿ ಉಪ್ಪಿನಕಾಯಿ ಹಾಗು ಅಮೂಲ್ಯ ಮಲ್ಲಾಡಿ ಯವರ "The Mango Season"

ಇತ್ತೀಚೆಗೆ, ನಾನು ಓದಿದ ಪುಸ್ತಕ ‘ಅಮೂಲ್ಯ ಮಲ್ಲಾಡಿ’ಯವರ “The Mango Season”.
ಇದರಲ್ಲಿ ಪ್ರಿಯಾ ರಾವ್ ಎನ್ನುವ ಆಂದ್ರಪ್ರದೇಶದ ಹುಡುಗಿ ತೀರಾ ಸಾಂಪ್ರದಾಯಿಕ ಕುಟುಂಬದಲ್ಲಿ ಬೆಳೆದು, ಹೆಚ್ಚಿನ ವಿದ್ಯಾಭ್ಯಾಸಕ್ಕೆಂದು ಅಮೆರಿಕಕ್ಕೆ ಬಂದು, ನಿಕ್ಕ್ ಎನ್ನುವ ಅಮೆರಿಕನ್ ಹುಡುಗನನ್ನು ಪ್ರೀತಿಸಿ ಅವನೊಂದಿಗೆ ವಾಸಿಸುವವಳ ಕಥೆ. ಕೆಲವು ವರ್ಷಗಳ ನಂತರ ಭಾರತಕ್ಕೆ ರಜೆಯಲ್ಲಿ ಮರಳಿದಾಗ ಅಲ್ಲಿ ಕೇವಲ ಒಂದು ವಾರದೊಳಗೆ ನಡೆಯುವ ಅವಳ ಬಾಳಿನ ಪ್ರಮುಖ ಘಟನೆಯನ್ನು ಈ ಕಾದಂಬರಿಯಲ್ಲಿ ಸರಳವಾದ ರೀತಿಯಲ್ಲಿ ಮಲ್ಲಾಡಿಯವರು ಮನಮುಟ್ಟುವಂತೆ ಬಿಚ್ಚಿಡುತ್ತಾರೆ. ಭಾರತಕ್ಕೆ ರಜೆಯಲ್ಲಿ ಬಂದಾಗ, ಬೇಸಗೆಕಾಲದಲ್ಲಿ ಹೇರಳವಾಗಿ ಲಭಿಸುವ, ಮಾವಿನಕಾಯಿಯೊಂದಿಗೆ ಬಿಚ್ಚಿಕೊಳ್ಳುವ ಅವಳ ಬಾಲ್ಯದ ನೆನಪುಗಳು, ಬಾಲ್ಯದಿಂದ ಬೆಳೆದು ಬಂದ, ಮತ್ತು ಮನೆಯವರೆಲ್ಲರು ಅನುಸರಿಸುವ ಭಾರತೀಯ ಸಂಸ್ಕೃತಿ, ಈಗ ನೆಲೆಸಿರುವ ಅಮೇರಿಕಾದಲ್ಲಿನ ಸಾಂಸ್ಕೃತಿಕ ಭಿನ್ನತೆಗಳು ಹಾಗು ಅವಳ ಪ್ರೇಮವನ್ನು Orthodox ನಂಬಿಕೆಯೊಂದಿಗೆ ಬೆಳೆದ, ಅಮ್ಮ, ಅಪ್ಪ, ಅಜ್ಜ, ಅಜ್ಜಿ ಯವರೊಂದಿಗೆ ಹೇಳಿಕೊಳ್ಳಲು ತೊಳಲಾಡುವ ಸಂಧಿಗ್ದತೆಯೇ ಕಥೆಯ ಪ್ರಮುಖ ಅಂಗ.

ನಾವು ಭಾರತೀಯರಾದ ಕಾರಣವೋ ಏನೋ, ಅವರ ಕಥೆಗಳು ಮನ ಮುಟ್ಟುತ್ತದೆ. ದೂರದ ದೇಶದಲ್ಲಿದ್ದು ಕೊಂಡೇ ನಮ್ಮೂರಿಗೆ ಹೋದ ಅನುಭವವನ್ನು ಕೊಡುತ್ತದೆ. ಇದರಲ್ಲಿ ಪ್ರತಿ Chapterನ ಆರಂಭ ದಲ್ಲೂ ಆವರು ಆಂದ್ರಪ್ರದೇಶದ ಮಾವಿನಕಾಯಿ ಉಪ್ಪಿನಕಾಯಿ (ಆವಕ್ಕಾಯಿ), ದಾಲ್, ರವೆ ಲಡ್ಡು ……ಹೀಗೆ ಸಾಂಪ್ರದಾಯಿಕ ಆಂದ್ರ ಅಡುಗೆಗಳ ಬಗ್ಗೆಯೂ ತಿಳಿಸುತ್ತ ಹೋಗುತ್ತಾರೆ.

ಇದು ಉಪ್ಪಿನಕಾಯಿ ಮಾಡುವ ಸಿಂಪಲ್ ವಿಧಾನ. ನಾನು ಅದೇ ರೀತಿ ಮಾವಿನಕಾಯಿ ಉಪ್ಪಿನಕಾಯಿ ಮನೆಯಲ್ಲಿ ಮಾಡಿದಾಗ ತುಂಬ ಚೆನ್ನಾಗೇ ಬಂತು. ಹಾಗಾಗಿ ಇಲ್ಲಿ ಬರೆಯುತ್ತಾ ಇದ್ದೇನೆ.

ಮಾವಿನಕಾಯಿ ಉಪ್ಪಿನಕಾಯಿ ಮಾಡಲು ಬೇಕಾಗುವ ಸಾಮಗ್ರಿಗಳು:
ಹುಳಿಮಾವಿನ ಕಾಯಿ - 5 ಕಪ್
ಸಾಸಿವೆ ಪುಡಿ - 1 ಕಪ್
ಮೆಣಸಿನ ಪುಡಿ - 1 ಕಪ್
ಉಪ್ಪು- 1 ಕಪ್
ಹಳದಿ ಪುಡಿ - ಸ್ವಲ್ಪ
ಮೆಂತೆ ಪುಡಿ - 1 ಚಮಚ
ಎಣ್ಣೆ - 3 ಕಪ್

ಮಾಡುವ ವಿಧಾನ :
ಮಾವಿನಕಾಯಿಯನ್ನು ಸಣ್ಣದಾಗಿ ಕಟ್ ಮಾಡಿಟ್ಟುಕೊಂಡು, ಮೇಲಿನ ಎಲ್ಲ ಪುಡಿಗಳನ್ನು ಬೆರೆಸಿ, ಕೊನೆಯಲ್ಲಿ ಎಣ್ಣೆ ಸೇರಿಸಿ, 4 ವಾರಗಳ ಕಾಲ ಮುಚ್ಚಿ ಇಡಬೇಕು.
ಉಪ್ಪಿನಕಾಯಿ ಮಾಡುವಾಗ ಗಮನಿಸಬೇಕಾದ ಅಂಶ ವೆಂದರೆ, ಯಾವುದೇ ಪಾತ್ರೆ, ಚಮಚ ಹಾಗು ಕೈಯಲ್ಲಿ ಸ್ವಲ್ಪ ಕೂಡ ನೀರಿನ ಅಂಶ ಇರಬಾರದು. ಇದರಿಂದ ಉಪ್ಪಿನಕಾಯಿ ಬೇಗ ಕೆಡುತ್ತದೆ.

Saturday, March 28, 2009

BROCCOLI STIR FRY


ಬೇಕಾಗುವ ಸಾಮಗ್ರಿಗಳು:
Broccoli – ½ ಕೆ. ಜಿ.
ಬೆಳ್ಳುಳ್ಳಿ - 10 ಎಸಳು (ಸಣ್ಣಗೆ ಹೆಚ್ಚಿದ್ದು)
ಬೆಣ್ಣೆ - ಸ್ವಲ್ಪ
ಲಿಂಬೆರಸ - 3 ಚಮಚ
ಕರಿಮೆಣಸಿನ ಪುಡಿ - ಸ್ವಲ್ಪ
ಉಪ್ಪು - ರುಚಿಗೆ ತಕ್ಕಷ್ಟು

ಮಾಡುವ ವಿಧಾನ:
Broccoliಯನ್ನು, ತೊಳೆದು ನೀರು ಒರೆಸಿಕೊಂಡು, ಸಣ್ಣ ಸಣ್ಣ ತುಂಡು ಮಾಡಬೇಕು.
ಒಂದು ನಾನ್ ಸ್ಟಿಕ್ ಪಾತ್ರೆಯಲ್ಲಿ, ಸ್ವಲ್ಪ ಬೆಣ್ಣೆ ಹಾಕಿಕೊಂಡು, ಇದರಲ್ಲಿ ಬೆಳ್ಳುಳ್ಳಿಯನ್ನು ಕೆಂಬಣ್ಣ ಬರುವ ತನಕ ಕಾಯಿಸಿಕೊಂಡು, Broccoliಯನ್ನು ಸೇರಿಸಿ, 10 ನಿಮಿಷ ಸಣ್ಣ ಉರಿಯಲ್ಲಿ ಕಾಯಿಸಬೇಕು. ಕೊನೆಯಲ್ಲಿ ಸ್ವಲ್ಪ ಉಪ್ಪು, ಕರಿಮೆಣಸಿನ ಪುಡಿ, ಲಿಂಬೆ ರಸ ಸೇರಿಸಿದರೆ Broccoli stir fry ಸಿದ್ದ. ಇದನ್ನು starter ಆಗಿ ಉಪಯೋಗಿಸಬಹುದು.

Broccoliಯಲ್ಲಿ ವಿಟಮಿನ್ ಸಿ, ಕೆ ಹಾಗು ಬಿಯು ಧಾರಾಳವಾಗಿ ಸಿಗುತ್ತದೆ (http://en.wikipedia.org/wiki/Broccoli).


ಇದೇ ರೀತಿ Broccoliಯೊಂದಿಗೆ cauliflowerನ್ನು ಸೇರಿಸಿ ಕೂಡ ಮಾಡಬಹುದು.

Friday, March 27, 2009

ಮೆಂತೆ ಸೊಪ್ಪು - ಹೆಸರುಕಾಳು ಪಲ್ಯ


ಬೇಕಾಗುವ ಸಾಮಗ್ರಿಗಳು:
ಈರುಳ್ಳಿ - 1 ಕಪ್
ಮೆಂತೆ ಸೊಪ್ಪು - 3-4 ಕಪ್ (ಹೆಚ್ಚಿದ್ದು)
ಮೊಳಕೆ ಬರಿಸಿದ ಹೆಸರುಕಾಳು - 1 ½ ಕಪ್
ಟೊಮೇಟೊ - ¼ ಕಪ್
ಮಸಾಲೆಗೆ:
ಕೊತ್ತಂಬರಿ ಬೀಜ - 3 ಚಮಚ
ಜೀರಿಗೆ - 1 ಚಮಚ
ಮೆಂತೆ - 10 ಕಾಳು
ಬ್ಯಾಡಗಿ ಮೆಣಸಿನಕಾಯಿ - 8-10
ಬೆಳ್ಳುಳ್ಳಿ - 3 ದೊಡ್ಡ ಎಸಳು
ಹಳದಿ - ಸ್ವಲ್ಪ
ತೆಂಗಿನ ತುರಿ - 1- 1 ½ ಕಪ್
ಉಪ್ಪು - ರುಚಿಗೆ ತಕ್ಕಷ್ಟು
ಎಣ್ಣೆ

ಮಾಡುವ ವಿಧಾನ:
ಕೊತ್ತಂಬರಿ ಬೀಜ, ಜೀರಿಗೆ, ಮೆಂತೆ ಹಾಗು ಮೆಣಸನ್ನು ಬೇರೆ ಬೇರೆಯಾಗಿ ಸ್ವಲ್ಪ ಎಣ್ಣೆ ಹಾಕಿ ಘಮ್ ಎನ್ನುವ ತನಕ ಹುರಿಯಬೇಕು. ಇದನ್ನು ಮಿಕ್ಸಿಯಲ್ಲಿ ಹಾಕಿ ಪುಡಿ ಮಾಡಿ ತೆಗೆದು ಇಟ್ಟುಕೊಳ್ಳಬೇಕು. ನಂತರ ತೆಂಗಿನ ತುರಿ ಹಾಗು ಸಣ್ಣಗೆ ಹೆಚ್ಚಿದ ಬೆಳ್ಳುಳ್ಳಿಯನ್ನು ಸೇರಿಸಿ, ನೀರು ಹಾಕದೆ ಮಿಕ್ಸಿಯಲ್ಲಿ 10 ಸೆಕೆಂಡ್ ರುಬ್ಬಬೇಕು. ತೆಂಗಿನ ತುರಿ ಸ್ವಲ್ಪ ಸಣ್ಣಗಾದರೆ ಸಾಕು, ಹೆಚ್ಚು ನುಣ್ಣಗೆ ಆಗಬಾರದು. ಒಂದು ಪಾತ್ರೆಯಲ್ಲಿ ಸ್ವಲ್ಪ ಎಣ್ಣೆ ಹಾಕಿ, ಇದರಲ್ಲಿ ಈರುಳ್ಳಿಯನ್ನು 2 ನಿಮಿಷ ಹುರಿದುಕೊಂಡು, ಹೆಸರುಕಾಳನ್ನು ಸೇರಿಸಿ ½ ಕಪ್ ನೀರು ಹಾಗು ಟೊಮೇಟೊ, ಸೇರಿಸಿ, 15- 20 ನಿಮಿಷ ಸಣ್ಣ ಉರಿಯಲ್ಲಿ ಬೇಯಿಸಬೇಕು. ಕೊನೆಯಲ್ಲಿ, ಸಣ್ಣಗೆ ಕಟ್ ಮಾಡಿದ ಸೊಪ್ಪು, ಉಪ್ಪು, ತೆಂಗಿನಕಾಯಿ ಹಾಗು ಮಸಾಲೆ ಪುಡಿಯನ್ನು ಸೇರಿಸಿ ಸಣ್ಣ ಉರಿಯಲ್ಲಿ 10 ನಿಮಿಷ ಬೇಯಿಸಿ, ಒಗ್ಗರಣೆ ಸೇರಿಸಿದರೆ, ಪಲ್ಯ ಸಿದ್ದ. ಕೊನೆಯಲ್ಲಿ ಸ್ವಲ್ಪ ಕಹಿ ಅನಿಸಿದರೆ, 1ಚಮಚ ಸಕ್ಕರೆ/ಬೆಲ್ಲ ಸೇರಿಸಬಹುದು.

Saturday, March 21, 2009

ಸಮೋಸ (SAMOSA)

ಬೇಕಾಗುವ ಸಾಮಗ್ರಿಗಳು
ಮೈದಾ - 2 ಕಪ್
ಆಲೂಗಡ್ಡೆ - 2 ಕಪ್ (ಬೇಯಿಸಿ, ಸಣ್ಣದಾಗಿ ಚೂರು ಮಾಡಿದ್ದು)
ಬೇಯಿಸಿದ ತರಕಾರಿಗಳು - ½ ಕಪ್ (ಬಟಾಣಿ, ಸಣ್ಣಗೆ ಹೆಚ್ಚಿದ ಕ್ಯಾರೆಟ್, ಬೀನ್ಸ್)
ಈರುಳ್ಳಿ - ¼ ಕಪ್ (ಸಣ್ಣಕೆ ಹೆಚ್ಚಿದ್ದು)
ಕೊತ್ತಂಬರಿ ಸೊಪ್ಪು - ¼ ಕಪ್ (ಸಣ್ಣಕೆ ಹೆಚ್ಚಿದ್ದು)
ಹಸಿಮೆಣಸು - 1-2 (ಸಣ್ಣಕೆ ಹೆಚ್ಚಿದ್ದು)
ಕೊತ್ತಂಬರಿ ಪುಡಿ - ¼ ಚಮಚ
ಜೀರಿಗೆ ಪುಡಿ - ¼ ಚಮಚ
ಖಾರ ಪುಡಿ - ¼ - ½ ಚಮಚ
ಗರಂ ಮಸಾಲ ಪುಡಿ - ¼ - ½ ಚಮಚ
ಚಾಟ್ ಮಸಾಲ ಪುಡಿ - ¼ ಚಮಚ
ಸೋಂಪು - ½ ಚಮಚ
ಉಪ್ಪು - ರುಚಿಗೆ ತಕ್ಕಷ್ಟು
ಎಣ್ಣೆ

ಮಸಾಲೆ ಮಾಡುವ ವಿಧಾನ - ಒಂದು ಪಾತ್ರೆಯಲ್ಲಿ, ಸ್ವಲ್ಪ ಎಣ್ಣೆ ಹಾಕಿ, ಸೋಂಪು ಸೇರಿಸಿ, ಈರುಳ್ಳಿಯನ್ನು ಚೆನ್ನಾಗಿ ಕೆಂಬಣ್ಣ ಬರುವವರೆಗೆ ಹುರಿಯಬೇಕು. ನಂತರ ಇದಕ್ಕೆ ಬೇಯಿಸಿದ ತರಕಾರಿಗಳನ್ನು (ಬೇಯಿಸಿದ ತರಕಾರಿಯನ್ನು, ಒಂದು ಬಟ್ಟೆಗೆ ಹಾಕಿ ನೀರಿನ ಅಂಶವನ್ನೆಲ್ಲಾ ತೆಗೆಯಬೇಕು) ಹಾಕಿ 2 ನಿಮಿಷ ಹುರಿದುಕೊಂಡು, ಕೊನೆಯಲ್ಲಿ ಎಲ್ಲ ಮಸಾಲೆಯ ಸಾಮಗ್ರಿಗಳನ್ನು ಹಾಗು ಉಪ್ಪು ಸೇರಿಸಿ, ಕೊತ್ತಂಬರಿ ಸೊಪ್ಪನ್ನು ಕೂಡ ಹಾಕಿ, ಚೆನ್ನಾಗಿ ಮಿಕ್ಸ್ ಮಾಡಿ, ಒಲೆಯಿಂದ ತೆಗೆದು ಇಡಬೇಕು.

ಸಮೋಸ ಮಾಡುವ ವಿಧಾನ:
ಮೈದಾಪುಡಿಗೆ ಸ್ವಲ್ಪ ಉಪ್ಪು ಸೇರಿಸಿ, 3-4 ಚಮಚ ಎಣ್ಣೆ ಹಾಕಿ, ಚೆನ್ನಾಗಿ ಮಿಕ್ಸ್ ಮಾಡಬೇಕು, ಕೊನೆಯಲ್ಲಿ ಸ್ವಲ್ಪ ನೀರು ಸೇರಿಸಿಕೊಂಡು, ಚಪಾತಿ ಹಿಟ್ಟಿನ ಹದಕ್ಕೆ ನಾದಿಕೊಂಡು, ಒಂದು ಪಾತ್ರೆಯಲ್ಲಿ 30 ನಿಮಿಷ ಮುಚ್ಚಿಡಬೇಕು.
ಮೈದಾ ಹಿಟ್ಟಿನ ಸಣ್ಣ ಗೋಲಿಗಳನ್ನು ಮಾಡಿ, ಚಪಾತಿಯಂತೆ ಲಟ್ಟಿಸಬೇಕು. ಇದನ್ನು ಚಾಕುವಿನಿಂದ ಅರ್ಧ ಚಂದ್ರಾಕೃತಿಗೆ ಕತ್ತರಿಸಿ, ಎಲ್ಲಾ ಬದಿಗಳಿಗೆ ತೆಳ್ಳಗೆ ನೀರು ಸವರಬೇಕು. ನಂತರ coneನ ಶೇಪ್ ನಲ್ಲಿ ಮಡಚಿ ಒಳಗೆ ಮಸಾಲೆಯನ್ನು ತುಂಬಿ, ಕೊನೆಗೆ ಮೇಲಿನ ಭಾಗವನ್ನು, ಸ್ವಲ್ಪ ನೀರು ಮುಟ್ಟಿಸಿಕೊಂಡು ಮುಚ್ಚಬೇಕು. ಇದನ್ನು ಎಣ್ಣೆಯಲ್ಲಿ ಕರಿದರೆ ಸಮೋಸ ಸಿದ್ದ.
ಆದರೆ ಇದಕ್ಕೆ ಎಣ್ಣೆ ಜಾಸ್ತಿ ಕಾಯಬಾರದು. ಸಣ್ಣ ತುಂಡು, ಚಪಾತಿಯನ್ನು ಹಾಕಿದಾಗ ಅದು ಮೇಲಕ್ಕೆ ಬರಬಾರದು. ಇದನ್ನು ಟೊಮೇಟೊ ಸಾಸ್ ಅಥವಾ ಸಿಹಿ ಚಟ್ನಿ ಮತ್ತು ಖಾರ ಚಟ್ನಿಯ ಜೊತೆ ಸವಿಯಬೇಕು.

ಸಿಹಿ ಚಟ್ನಿ ಮಾಡುವ ವಿಧಾನ
ಖರ್ಜೂರ - 4-5
ಹುಣಸೆ ಹಣ್ಣು - ಸಣ್ಣ ನಿಂಬೆಯ ಗಾತ್ರದ್ದು
ಬೆಲ್ಲ - 1-2 ಟೇಬಲ್ ಸ್ಪೂನ್
ಉಪ್ಪು - ಸ್ವಲ್ಪ
ಮೆಣಸಿನ ಪುಡಿ - 1/2 ಚಮಚ
ಖರ್ಜೂರ ಹಾಗು ಹುಣಸೆಹಣ್ಣನ್ನು ಸ್ವಲ್ಪ ನೀರಿನೊಂದಿಗೆ ಬೇಯಿಸಬೇಕು. ನಂತರ ಇದನ್ನು ಮಿಕ್ಸಿಗೆ ಹಾಕಿ ರುಬ್ಬಿಕೊಂಡು, ಪುನ: ಪಾತ್ರೆಗೆ ಹಾಕಿ ಬೆಲ್ಲ ಸೇರಿಸಿ, ಚೆನ್ನಾಗಿ ಸ್ವಲ್ಪ ಗಟ್ಟಿಯಾಗುವ ತನಕ ಕುದಿಸಬೇಕು. ಕೊನೆಯಲ್ಲಿ ಉಪ್ಪು ಹಾಗು ಮೆಣಸಿನ ಪುಡಿ ಸೇರಿಸಿ, ಒಮ್ಮೆ ಕುದಿಸಿ ತೆಗೆಯಬೇಕು.

ವೆಜ್ ಪಫ್ಫ್ಸ್ (VEG PUFFS)

ಬೇಕಾಗುವ ಸಾಮಗ್ರಿಗಳು:
ಪಫ್ಫ್ಸ್ ಪೇಸ್ತ್ರೀ ಶೀಟುಗಳು (Puff Pastry sheets, super marketಗಳ frozen sectionನಲ್ಲಿ ಸಿಗುತ್ತದೆ)
ಆಲೂಗಡ್ಡೆ - 2 ಕಪ್ (ಬೇಯಿಸಿ, ಸಣ್ಣದಾಗಿ ಚೂರು ಮಾಡಿದ್ದು)
ಬೇಯಿಸಿದ ತರಕಾರಿಗಳು - ½ ಕಪ್ (ಬಟಾಣಿ, ಸಣ್ಣಗೆ ಹೆಚ್ಚಿದ ಕ್ಯಾರೆಟ್, ಬೀನ್ಸ್)
ಈರುಳ್ಳಿ - ¼ ಕಪ್ (ಸಣ್ಣಕೆ ಹೆಚ್ಚಿದ್ದು)
ಕೊತ್ತಂಬರಿ ಸೊಪ್ಪು - ¼ ಕಪ್ (ಸಣ್ಣಕೆ ಹೆಚ್ಚಿದ್ದು)
ಹಸಿಮೆಣಸು - 1-2 (ಸಣ್ಣಕೆ ಹೆಚ್ಚಿದ್ದು)
ಕೊತ್ತಂಬರಿ ಪುಡಿ - ¼ ಚಮಚ
ಜೀರಿಗೆ ಪುಡಿ - ¼ ಚಮಚ
ಖಾರ ಪುಡಿ - ¼ - ½ ಚಮಚ
ಗರಂ ಮಸಾಲ ಪುಡಿ - ¼ - ½ ಚಮಚ
ಚಾಟ್ ಮಸಾಲ ಪುಡಿ - ¼ ಚಮಚ
ಸೋಂಪು - ½ ಚಮಚ
ಉಪ್ಪು - ರುಚಿಗೆ ತಕ್ಕಷ್ಟು
ಎಣ್ಣೆ

ಮಸಾಲೆ ಮಾಡುವ ವಿಧಾನ - ಒಂದು ಪಾತ್ರೆಯಲ್ಲಿ, ಸ್ವಲ್ಪ ಎಣ್ಣೆ ಹಾಕಿ, ಸೋಂಪು ಸೇರಿಸಿ, ಈರುಳ್ಳಿಯನ್ನು ಚೆನ್ನಾಗಿ ಕೆಂಬಣ್ಣ ಬರುವವರೆಗೆ ಹುರಿಯಬೇಕು. ನಂತರ ಇದಕ್ಕೆ ಬೇಯಿಸಿದ ತರಕಾರಿಗಳನ್ನು (ಬೇಯಿಸಿದ ತರಕಾರಿಯನ್ನು, ಒಂದು ಬಟ್ಟೆಗೆ ಹಾಕಿ ನೀರಿನ ಅಂಶವನ್ನೆಲ್ಲಾ ತೆಗೆಯಬೇಕು) ಹಾಕಿ 2 ನಿಮಿಷ ಹುರಿದುಕೊಂಡು, ಕೊನೆಯಲ್ಲಿ ಎಲ್ಲ ಮಸಾಲೆಯ ಸಾಮಗ್ರಿಗಳನ್ನು ಹಾಗು ಉಪ್ಪು ಸೇರಿಸಿ, ಕೊತ್ತಂಬರಿ ಸೊಪ್ಪನ್ನು ಕೂಡ ಹಾಕಿ, ಚೆನ್ನಾಗಿ ಮಿಕ್ಸ್ ಮಾಡಿ, ಒಲೆಯಿಂದ ತೆಗೆದು ಇಡಬೇಕು.

ಪಫ್ಫ್ಸ್ ಮಾಡುವ ವಿಧಾನ - ಪಫ್ಫ್ ಪೇಸ್ತ್ರೀ ಶೀಟುಗಳನ್ನು, ಫ್ರಿಜ್ ನಿಂದ ಹೊರಗೆ ತೆಗೆದು 40 ನಿಮಿಷ ಇಡಬೇಕು.
ಇದನ್ನು ಉದ್ದಕ್ಕೆ ಬಿಡಿಸಿಕೊಂಡು, ಆಯತಾಕಾರದಲ್ಲಿ ಕತ್ತರಿಸಬೇಕು. ಇದರ ಒಂದು ಬಾಗದಲ್ಲಿ ಮಸಾಲೆಯನ್ನು ಇಟ್ಟು, 4 sideಗೆ ಬೆರಳಿನಿಂದ ನೀರು ಸವರಿ, ಇನ್ನೊಂದು ಬಾಗವನ್ನು ಮಡಚಿ ಮುಚ್ಚಬೇಕು. ನಂತರ ಎಲ್ಲ ಬದಿಯನ್ನು ಚೆನ್ನಾಗಿ seal ಮಾಡಬೇಕು. ಒಂದು Aluminium ಶೀಟ್ ನಲ್ಲಿ ಇಟ್ಟು ಓವೆನ್ ನಲ್ಲಿ 350 - 450 Fನಲ್ಲಿ, 30 ನಿಮಿಷ ಬೇಯಿಸಬೇಕು.

ಟಿಪ್ಸ್: ಬೇಯಿಸಿದ ಮೊಟ್ಟೆಯನ್ನು ಅರ್ಧ ಕತ್ತರಿಸಿ, ಅಥವಾ ಚಿಕನ್ ತುಂಡುಗಳನ್ನು (roasted) ಮಸಾಲೆಯ ಜೊತೆಗೆ ಬೆರೆಸಿ ಇಟ್ಟರೆ, Egg/ Chicken ಪಫ್ಫ್ ತಯಾರು. ಈ ಮಸಾಲೆಗೆ, ಸ್ವಲ್ಪ ಜಾಸ್ತಿ ಗರಂ ಮಸಾಲ ಹಾಗು ಕರಿಮೆಣಸಿನಪುಡಿಯನ್ನು ಹಾಕಿದರೆ ಚೆನ್ನಾಗಿರುತ್ತದೆ.



Monday, March 9, 2009

ಈರುಳ್ಳಿ ಬಜೆ / ನೀರುಳ್ಳಿ ಬಜೆ (ONION BAJJI)

ಬೇಕಾಗುವ ಸಾಮಗ್ರಿಗಳು:
ಈರುಳ್ಳಿ - 2-3 ಕಪ್ (ಉದ್ದಕ್ಕೆ ಹೆಚ್ಚಿದ್ದು)
ಕಡಲೆ ಹಿಟ್ಟು - 5-6 ಟೇಬಲ್ ಚಮಚ
ಅಕ್ಕಿ ಹಿಟ್ಟು - 1 ಟೇಬಲ್ ಚಮಚ
ಕಾರ್ನ್ ಫ್ಲೋರ್ - 1 ಟೇಬಲ್ ಚಮಚ
ಜೀರಿಗೆ - 1 ಚಮಚ
ಕೆಂಪು ಮೆಣಸಿನ ಪುಡಿ - ½ - ¾ ಚಮಚ
ಉಪ್ಪು - ರುಚಿಗೆ ತಕ್ಕಷ್ಟು
ಸೋಡಾ ಪುಡಿ - ¼ ಚಮಚ
ಹಿಂಗು - ಸ್ವಲ್ಪ
ಕೊತ್ತಂಬರಿ ಸೊಪ್ಪು - 2 ಚಮಚ (ಸಣ್ಣಕೆ ಹೆಚ್ಚಿದ್ದು)
ಪಾಲಕ್ ಸೊಪ್ಪು - 2 ಟೇಬಲ್ ಚಮಚ (ಸಣ್ಣಕೆ ಹೆಚ್ಚಿದ್ದು)
ಎಣ್ಣೆ

ಮಾಡುವ ವಿಧಾನ:
ಒಂದು ಪಾತ್ರೆಯಲ್ಲಿ, ಮೇಲಿನ ಎಲ್ಲ ಸಾಮಗ್ರಿಗಳನ್ನು ಹಾಕಿಕೊಂಡು ಚೆನ್ನಾಗಿ ಕೈಯಿಂದ ಮಿಕ್ಸ್ ಮಾಡಿಕೊಳ್ಳಬೇಕು. ಈರುಳ್ಳಿಯಲ್ಲಿರುವ ನೀರು ಬಿಟ್ಟುಕೊಳ್ಳುವ ಕಾರಣ, ಇದಕ್ಕೆ ನೀರು ಸೇರಿಸಬಾರದು. ಕೊನೆಯಲ್ಲಿ ಬೇಕಿದ್ದರೆ ಸ್ವಲ್ಪ ನೀರನ್ನು ಕೈಗೆ ಸವರಿಕೊಂಡು, ಸಣ್ಣ ಗಾತ್ರದಲ್ಲಿ ಹಿಟ್ಟನ್ನು ತೆಗೆದುಕೊಂಡು, ಕಾದ ಎಣ್ಣೆಗೆ ಹಾಕಿ, ಕೆಂಬಣ್ಣ ಬರುವ ತನಕ ಕರಿಯಬೇಕು.
ಇದನ್ನು ಅಕ್ಕಿ ಹಿಟ್ಟು, ಕಾರ್ನ್ ಫ್ಲೌರ್, ಸೋಡಾ ಪುಡಿ, ಪಾಲಕ್ ಸೊಪ್ಪು ಹಾಗು ಕೊತ್ತಂಬರಿ ಸೊಪ್ಪು ಹಾಕದೆ ಕೂಡ ಮಾಡಬಹುದು.