ಕಲ್ಲಂಗಡಿ ಹಣ್ಣಿನ ಸಿಪ್ಪೆ ಪಲ್ಯ

ನನ್ನ ಅಮ್ಮ ಈ ಪಲ್ಯ ಮಾಡ್ತಿದ್ದರು. ಆದ್ರೆ ಈ ಪಲ್ಯ ಬೇರೆ ಕಡೆಯಲ್ಲೂ ಫೇಮಸ್ ಇದೆ ಎಂದು ಪಾಕಚಂದ್ರಿಕೆ ಯಲ್ಲಿ ನೋಡಿ ತಿಳಿಯಿತು. ಕಲ್ಲಂಗಡಿ ಹಣ್ಣು ತಿಂದಾದ ನಂತರ ಉಳಿಯುವ ಸಿಪ್ಪೆಯನ್ನು ಬಳಸಿ ಈ ಪಲ್ಯವನ್ನು ಮಾಡಬಹುದು.

ಬೇಕಾಗುವ ಸಾಮಗ್ರಿಗಳು :
ಕಲ್ಲಂಗಡಿ ಹಣ್ಣಿನ ಸಿಪ್ಪೆ - 2-3 ಕಪ್ (ಸಿಪ್ಪೆಯನ್ನು ಒಂದು ಸಲ ನೀರಲ್ಲಿ ತೊಳೆದು ಸಣ್ಣಗೆ ಹೆಚ್ಚಬೇಕು)
ಈರುಳ್ಳಿ - ಸ್ವಲ್ಪ (ಸಣ್ಣಗೆ ಕಟ್ ಮಾಡಿ)
ಟೊಮೇಟೊ - ಸ್ವಲ್ಪ (ಸಣ್ಣಗೆ ಕಟ್ ಮಾಡಿ)

ಮಸಾಲೆಗೆ
ಕೊತ್ತಂಬರಿ ಪುಡಿ - ¾ ಚಮಚ
ಜೀರಿಗೆ ಪುಡಿ - ¾ ಚಮಚ
ಮೆಣಸಿನ ಪುಡಿ (ಬ್ಯಾಡಗಿ) - ¾ ಚಮಚ
ಅರಿಶಿನ ಪುಡಿ - ಸ್ವಲ್ಪ
ತೆಂಗಿನ ಕಾಯಿ ತುರಿ - ¾ ಕಪ್
ಉಪ್ಪು - ರುಚಿಗೆ ತಕ್ಕಷ್ಟು

ಒಗ್ಗರೆಣೆಗೆ
ಎಣ್ಣೆ, ಸಾಸಿವೆ, ಉದ್ದಿನಬೇಳೆ, ಬೆಳ್ಳುಳ್ಳಿ, ಕರಿಬೇವಿನ ಎಲೆ.

ಮಾಡುವ ವಿಧಾನ:
ಒಂದು ಪಾತ್ರೆಯಲ್ಲಿ ಸ್ವಲ್ಪ ಎಣ್ಣೆ ಹಾಕಿ, ಎಣ್ಣೆ ಬಿಸಿಯಾದ ನಂತರ ಒಗ್ಗರಣೆ ಸೇರಿಸಿ, ಕೊನೆಯಲ್ಲಿ ಈರುಳ್ಳಿ ಹಾಕಿ ಸ್ವಲ್ಪ ಹುರಿಯಬೇಕು. ನಂತರ ಟೊಮೇಟೊ (ಅಥವಾ ಸ್ವಲ್ಪ ಹುಣಸೆ ರಸ) , ಹೆಚ್ಚಿದ ಕಲ್ಲಂಗಡಿ ಹಣ್ಣಿನ ಸಿಪ್ಪೆ ಹಾಗು ¼ ಕಪ್ ನೀರು ಸೇರಿಸಿ, 10-15 ನಿಮಿಷ ಹದ ಉರಿಯಲ್ಲಿ ಬೇಯಿಸಬೇಕು. ಕೊನೆಯಲ್ಲಿ ನೀರು ಆವಿಯಾದ ನಂತರ ಎಲ್ಲ ಮಸಾಲೆಯ ಸಾಮಗ್ರಿಗಳನ್ನು ಸೇರಿಸಿ, ಉಪ್ಪು, ಕಾಯಿತುರಿ ಸೇರಿಸಿ 5 ನಿಮಿಷ ಸಣ್ಣ ಉರಿಯಲ್ಲಿ ಬೇಯಿಸಿ ಒಲೆಯಿಂದ ಇಳಿಸಿದರೆ ಪಲ್ಯ ಸಿದ್ದ.