ಬಾಳೆಹಣ್ಣು ದೋಸೆ (Banana / Balehannu Dose)

ಬೇಕಾಗುವ ಸಾಮಗ್ರಿಗಳು:

ದೋಸೆ ಅಕ್ಕಿ-೧ ಕಪ್
ಬಾಳೆಹಣ್ಣು-೧ (ನೇಂದ್ರ ಬಾಳೆಹಣ್ಣಿನ ಗಾತ್ರದ್ದು)
ಉಪ್ಪು- ರುಚಿಗೆ ತಕ್ಕಷ್ಟು

ಅಕ್ಕಿಯನ್ನು ೪-೫ ಗಂಟೆಗಳ ಕಾಲ ನೀರಿನಲ್ಲಿ ನೆನೆಸಿಡಿ. ನಂತರ ಅಕ್ಕಿಯನ್ನು ಚೆನ್ನಾಗಿ ತೊಳೆದುಕೊಂಡು ರುಬ್ಬಿರಿ, ಕೊನೆಯಲ್ಲಿ ಬಾಳೆಹಣ್ಣು ಸೇರಿಸಿ ರುಬ್ಬಿರಿ. ಉಪ್ಪು ಸೇರಿಸಿಕೊಂಡು, ದೋಸೆಯ ಹಿಟ್ಟಿನ ಹದಕ್ಕೆ ಬೇಕಾದಷ್ಟು ನೀರು ಸೇರಿಸಿ. ಒಲೆಯ ಮೇಲೆ ಕಾವಲಿ ಇಟ್ಟು, ಕಾವಲಿಗೆ ಬೆಣ್ಣೆ ಅಥವಾ ಎಣ್ಣೆಯನ್ನು ಸವರಿ, ಒಂದು ಸೌಟಿನಷ್ಟು ಹಿಟ್ಟನ್ನು ಹೆಂಚಿನ ಮೇಲೆ ಹಾಕಿ ಮಗಚುವಕೈಯಲ್ಲಿ ಎರಡೂ ಬದಿ ಬೇಯಿಸಿದರೆ, ಬಾಳೆಹಣ್ಣು ದೋಸೆ ರೆಡಿ. ತೆಂಗಿನಕಾಯಿಯ ಚಟ್ನಿಯ ಜೊತೆಗೆ ಸವಿಯಲು ಕೊಡಿರಿ.

ಇದಕ್ಕೆ ಕೊನೆಯಲ್ಲಿ 1/4 ಕಪ್ ರವೆ ಸೇರಿಸಿಕೊಂಡರೆ, ದೋಸೆ ಚೆನ್ನಾಗಿ ಗರಿ ಗರಿಯಾಗಿರುತ್ತದೆ.