ಬಸಳೆ ಸೊಪ್ಪಿನ ತಂಬುಳಿ [Basale (Indian Spinach) Soppina Thambuli]

ತಂಬುಳಿಯನ್ನು ಹೆಚ್ಚಾಗಿ ದಕ್ಷಿಣ ಕನ್ನಡ- ಉಡುಪಿ ಜಿಲ್ಲೆಯಲ್ಲಿ ಮಾಡುತ್ತಾರೆ. ಬಾಳೆಎಲೆಯಲ್ಲಿ ಉಪ್ಪು, ಉಪ್ಪಿನಕಾಯಿ, ಪಲ್ಯಗಳು ಹಾಗು ಅನ್ನ ಎಲ್ಲ ಬಡಿಸಿದ ನಂತರ, ತುಪ್ಪ ಸಾರು ಬಡಿಸುವುದರ ಮೊದಲು ತಂಬುಳಿಯನ್ನು ಅನ್ನಕ್ಕೆ ಬಡಿಸುತ್ತಾರೆ. ಇದು ತುಂಬ ಜೀರ್ಣಕಾರಿ.

ಬೇಕಾಗುವ ಸಾಮಗ್ರಿಗಳು:
ಬಸಳೆ ಸೊಪ್ಪು - 10
ಜೀರಿಗೆ - ½ ಚಮಚ
ಶುಂಠಿ - 1 ಸೆ. ಮಿ. ತುಂಡು
ಮೊಸರು / ಮಜ್ಜಿಗೆ - ½ ಕಪ್
ತೆಂಗಿನ ತುರಿ - ½ ಕಪ್
ಹಸಿ ಮೆಣಸು - 1 ರಿಂದ 2

ಉಪ್ಪು - ½ ಚಮಚ / ರುಚಿಗೆ ತಕ್ಕಷ್ಟು
ಎಣ್ಣೆ - ಸ್ವಲ್ಪ
ಒಗ್ಗರಣೆಗೆ - ಎಣ್ಣೆ, ಸಾಸಿವೆ, ಕರಿಬೇವು.

ಮಾಡುವ ವಿಧಾನ
ಬಸಳೆ ಸೊಪ್ಪನ್ನು ತೊಳೆದು, ಚೆನ್ನಾಗಿ ಒರೆಸಿ, ನಂತರ ಸಣ್ಣ ಸಣ್ಣ ತುಂಡು ಗಳನ್ನಾಗಿ ಮಾಡಬೇಕು. ಸ್ವಲ್ಪ (1 ಚಮಚ) ಎಣ್ಣೆ ಹಾಕಿ ಬಸಳೆಸೊಪ್ಪನ್ನು 5 ನಿಮಿಷ ಚನ್ನಾಗಿ ಹುರಿಯಬೇಕು. ನಂತರ ಮೇಲಿನ ಎಲ್ಲ ಸಾಮಗ್ರಿಗಳನ್ನು ಸೇರಿಸಿ ರುಬ್ಬಬೇಕು. ಮಜ್ಜಿಗೆ ಉಪಯೋಗಿಸಿದರೆ ಕೊನೆಯಲ್ಲಿ ಸೇರಿಸಿದರೆ ಸಾಕು.
ಇದನ್ನು ನಂತರ ಪಾತ್ರೆಗೆ ಹಾಕಿ, ಉಪ್ಪು ಸೇರಿಸಿ, ಬೇಕಿದ್ದಲ್ಲಿ ಸ್ವಲ್ಪ ನೀರು ಹಾಕಿ ಮಿಕ್ಸ್ ಮಾಡಬೇಕು. ಇದು ಚಟ್ನಿಗಿಂತ ಸ್ವಲ್ಪ ತೆಳ್ಳಗಿರಬೇಕು. ಕೊನೆಯಲ್ಲಿ ಒಗ್ಗರಣೆ ಸೇರಿಸಿದರೆ, ತಂಬುಳಿ ಸಿದ್ದ.

ಮಂಗಳೂರು ಬನ್ಸ್ (Mangalore Buns)

ಬೇಕಾಗುವ ಸಾಮಗ್ರಿಗಳು
ಬಾಳೆಹಣ್ಣು - 1
ಮೈದಾ ಹುಡಿ - 1.5 ಕಪ್
ಮೊಸರು - ½ ಕಪ್
ಸೋಡಾ ಪುಡಿ - ½ ಚಮಚ
ಜೀರಿಗೆ - ½ ಚಮಚ
ಸಕ್ಕರೆ - 4-5 ಚಮಚ
ಉಪ್ಪು - ರುಚಿಗೆ ತಕ್ಕಷ್ಟು

ಮಾಡುವ ವಿಧಾನ
ಬಾಳೆಹಣ್ಣಿನ ಸಿಪ್ಪೆ ತೆಗೆದು, ಅದನ್ನು ಚೆನ್ನಾಗಿ ಕೈಯಿಂದ ಹಿಚುಕಬೇಕು. ನಂತರ ಮೇಲಿನ ಎಲ್ಲ ಸಾಮಗ್ರಿಗಳನ್ನು ಹಾಕಿ ಚಪಾತಿ ಹಿಟ್ಟಿನ ಹದಕ್ಕೆ ಕಲಸಿ 5-6 ಗಂಟೆ ಮುಚ್ಚಿ ಇಡಬೇಕು.
ನಿಂಬೆ ಹಣ್ಣಿನ ಗಾತ್ರದ ಹಿಟ್ಟು ತೆಗೆದುಕೊಂಡು, ಪೂರಿಯ ರೀತಿಯಲ್ಲಿ (೧ ರಿಂದ ೧.೫ ಇಂಚು ದಪ್ಪಕ್ಕೆ) ಲಟ್ಟಿಸಬೇಕು. ಇದನ್ನು ಮಾಡುವಾಗ ಕಡಿಮೆ ಪ್ರಮಾಣದಲ್ಲಿ ಹಿಟ್ಟು ಅಥವಾ ಕೈಗೆ ಸ್ವಲ್ಪಎಣ್ಣೆ ಹಾಕಿಕೊಂಡರೆ ಒಳ್ಳೆಯದು.
ನಂತರ ಇದನ್ನು ಕಾದ ಎಣ್ಣೆಗೆ ಹಾಕಿ ಎರಡೂ ಬದಿ ಕೆಂಬಣ್ಣ ಬರುವ ವರೆಗೆ ಕರಿಯಬೇಕು.
ಇದನ್ನು ಚಟ್ನಿ, ಸಾಂಬಾರ್ ಜೊತೆಗೆ ಅಥವಾ ಹಾಗೆಯೇ ತಿನ್ನಬಹುದು.

ಸೆವೆನ್ ಕಪ್ ಸ್ವೀಟ್ (Seven Cup Sweet)

ಇದು ಒಂದು ಸಿಂಪಲ್ ಆದರೆ ರುಚಿಯಾದ ಸ್ವೀಟ್.

ಬೇಕಾಗುವ ಸಾಮಗ್ರಿಗಳು
ಕಡಲೆ ಹಿಟ್ಟು - 1 ಕಪ್
ಹಾಲು - 1 ಕಪ್
ಕಾಯಿ ತುರಿ - 1 ಕಪ್
ತುಪ್ಪ - 1 ಕಪ್
ಸಕ್ಕರೆ - 3 ಕಪ್
ಇದರಲ್ಲಿ 7 ಕಪ್ ಸಾಮಗ್ರಿಗಳು ಸೇರಿರುವ ಕಾರಣ ಬಹುಶ: ಈ ಹೆಸರು ಬಂದಿರಬಹುದು. ಆದರೆ, 3 ಕಪ್ ಸ್ವೀಟ್ ಹಾಕಿದರೆ ತುಂಬ ಸಿಹಿ ಆಗುವುದರಿಂದ 2-21/4 ಕಪ್ ಸಕ್ಕರೆ ಹಾಕಿದರೆ ಸಾಕಾಗುತ್ತದೆ.
ಮಾಡುವ ವಿಧಾನ
ಮೇಲಿನ ಎಲ್ಲಾ ಸಾಮಗ್ರಿಗಳನ್ನು ಹಾಕಿ, ಹದ ಹುರಿಯಲ್ಲಿ 25-30 ನಿಮಿಷ (ತಳ ಬಿಟ್ಟುಕೊಂಡು ಬರುವ ತನಕ) ಕಾಯಿಸಿಕೊಂಡು, ಕೊನೆಯಲಿ ತುಪ್ಪ ಸವರಿದ ಬಟ್ಟಲಿಗೆ ಹಾಕಬೇಕು. ಸ್ವಲ್ಪ ಬಿಸಿ ಆರಿದ ಮೇಲೆ, ಬೇಕಾದ ಆಕಾರಕ್ಕೆ ತುಂಡು ಮಾಡಿಟ್ಟುಕೊಳ್ಳಬೇಕು.

ಗೋಳಿ ಬಜೆ / ಮಂಗಳೂರು ಬಜ್ಜಿ (Golibaje / Mangalore Bajji)

ನೀವು ಮಂಗಳೂರಿನ ಯಾವುದೇ ಹೋಟೆಲ್ ಗೆ ಹೋಗಿ ತಿಂಡಿ ಏನಿದೆ..? ಎಂದು ಕೇಳಿದರೆ, ಹೀಗೆ ಶುರುವಾಗುತ್ತದೆ..ಗೋಳಿಬಜೆ, ನೀರುಳ್ಳಿ ಬಜೆ, ಮಂಗಳೂರು ಬನ್ಸ್, ಸೆಟ್ ದೋಸೆ, ಮಸಾಲೆ ದೋಸೆ...... ಮಂಗಳೂರಿನಲ್ಲಿ ಗೋಳಿ ಬಜೆ ಮತ್ತು ಬಿಸಿ ಬಿಸಿ ಕಾಫಿ/ಚಾ ಬಲು ಪ್ರಸಿದ್ದ. ಅದೇ ಬೆಂಗಳೂರು/ಮೈಸೂರಿನ ಹೋಟೆಲಿಗೆ ಹೋದರೆ, ಇದೇ ಗೋಳಿಬಜೆಗೆ ಮಂಗಳೂರು ಬಜ್ಜಿ ಎನ್ನುತ್ತಾರೆ.

ಗೋಳಿ ಬಜೆ ಮಾಡಲು ಬೇಕಾಗುವ ಸಾಮಗ್ರಿಗಳು
ಮೈದಾ ಹುಡಿ - 1 ಕಪ್
ಮೊಸರು/ ದಪ್ಪ ಮಜ್ಜಿಗೆ - 1/2 ಕಪ್
ಶುಂಠಿ - 1 ಚಮಚ (ಸಣ್ಣಗೆ ಹೆಚ್ಚಿದ್ದು ಅಥವಾ ತುರಿದಿದ್ದು)
ಹಸಿ ಮೆಣಸು - 1 ಚಮಚ (ಸಣ್ಣಗೆ ಹೆಚ್ಚಿ)
ಕರಿ ಬೇವು - 5-6 (ಸಣ್ಣಗೆ ಹೆಚ್ಚಿ)
ಹಿಂಗು - ಸ್ವಲ್ಪ
ಬೇಕಿಂಗ್ ಸೋಡಾ - ½ ಚಮಚ
ಸಕ್ಕರೆ - 1 ಚಮಚ
ಉಪ್ಪು - ರುಚಿಗೆ ತಕ್ಕಷ್ಟು
ಕರಿಯಲು ಎಣ್ಣೆ

ಮಾಡುವ ವಿಧಾನ
ಮೇಲಿನ ಎಲ್ಲಾ ಸಾಮಗ್ರಿಗಳನ್ನು ಸೇರಿಸಿ, ಬೇಕಿದ್ದರೆ ಸ್ವಲ್ಪ ನೀರು ಸೇರಿಸಿ, ದೋಸೆ ಹಿಟ್ಟಿಗಿಂತ ಸ್ವಲ್ಪ ಗಟ್ಟಿಯಾಗಿ ಹಿಟ್ಟು ಮಾಡಿಟ್ಟುಕೊಂಡು, 15-20 ನಿಮಿಷ ಮುಚ್ಚಿ ಇಡಬೇಕು. ನಂತರ ಸಣ್ಣದಾದ ಉಂಡೆ ಮಾಡಿಕೊಂಡು, ಕಾದ ಎಣ್ಣೆ ಗೆ ಹಾಕಿ, ಚೆನ್ನಾಗಿ ಕೆಂಬಣ್ಣ ಬರುವ ತನಕ ಕರಿಯಬೇಕು. ಇದನ್ನು ತೆಂಗಿನ ಕಾಯಿ ಚಟ್ನಿ ಯೊಂದಿಗೆ ಬಿಸಿಬಿಸಿ ಸವಿಯಬೇಕು.

ವೆಜ್ ಪಲಾವ್ / VEGETABLE PULAO

ಬೇಕಾಗುವ ಸಾಮಗ್ರಿಗಳು
ಬಾಸ್ಮತಿ ಅಕ್ಕಿ - 1 ಕಪ್
ಬೀನ್ಸ್ - 1/2 ಕಪ್ (ಹೆಚ್ಚಿದ್ದು)
ಬಟಾಣಿ - 1/4 ಕಪ್ ( 6 ರಿಂದ 8 ಗಂಟೆ ನೆನೆಸಿಟ್ಟಿದ್ದು)
ಕ್ಯಾರೆಟ್ - 1/4 ಕಪ್ (ಹೆಚ್ಚಿದ್ದು)
ಈರುಳ್ಳಿ - 1/2 ಸಣ್ಣಗೆ ಹೆಚ್ಚಿದ್ದು
ತುಪ್ಪ/ ಎಣ್ಣೆ - 2 ಟೇಬಲ್ ಸ್ಪೂನ್
ಗರಂ ಮಸಾಲೆ ಸಾಮಗ್ರಿಗಳು (ಚಕ್ಕೆ- 1 ಇಂಚು, ಲವಂಗ - 4, ಕಾಳು ಮೆಣಸು - 8, ಮೊಗ್ಗು -2)
ಮಸಾಲೆಯನ್ನು ಈ ಕೆಳಗಿನ ಸಾಮಗ್ರಿಗಳೊಂದಿಗೆ ರುಬ್ಬಿಟ್ಟು ಕೊಳ್ಳಬೇಕು.
{ತೆಂಗಿನ ತುರಿ - 3 ಟೇಬಲ್ ಸ್ಪೂನ್; ಹಸಿಮೆಣಸು -1 ಅಥವಾ 2; ಶುಂಠಿ - ½ ಇಂಚು, ಬೆಳ್ಳುಳ್ಳಿ - ೨ ಎಸಳು, ಕೊತ್ತಂಬರಿ ಸೊಪ್ಪು - 2 ಟೇಬಲ್ ಸ್ಪೂನ್ (ಹೆಚ್ಚಿದ್ದು)}
ಉಪ್ಪು - ರುಚಿಗೆ ತಕ್ಕಷ್ಟು

ಮಾಡುವ ವಿಧಾನ:
ಕುಕ್ಕರಿನಲ್ಲಿ ಎಣ್ಣೆ/ತುಪ್ಪ ಬಿಸಿ ಮಾಡಿ ಗರಂ ಮಸಾಲೆಯ ಸಾಮಗ್ರಿಗಳನ್ನು ಹಾಕಿ 1 ನಿಮಿಷ ಹುರಿಯಬೇಕು. ನಂತರ ಇದಕ್ಕೆ ಒಂದೊಂದೇ ತರಕಾರಿಗಳನ್ನು ಹಾಕಿ (ಈರುಳ್ಳಿ, ಬೀನ್ಸ್, ಬಟಾಣಿ, ಕ್ಯಾರೆಟ್) ಹಸಿ ಬಣ್ಣ ಹೋಗುವ ತನಕ ಹುರಿಯಬೇಕು. ನಂತರ ತೊಳೆದಿಟ್ಟ ಅಕ್ಕಿಯನ್ನು ಸೇರಿಸಿ ಸ್ವಲ್ಪ ಹುರಿಯಬೇಕು. ಕೊನೆಯಲ್ಲಿ ರುಬ್ಬಿಟ್ಟ ಮಸಾಲೆಯನ್ನು ಸೇರಿಸಿ, 2 ಕಪ್ ನೀರಿನೊಂದಿಗೆ, ರುಚಿಗೆ ತಕ್ಕಷ್ಟು ಉಪ್ಪು ಸೇರಿಸಿ, ಕುಕ್ಕರ್ ನಲ್ಲಿ ಬೇಯಿಸಿ. ಇದನ್ನು ಮೊಸರು ಬಜ್ಜಿ (raitha) ಯೊಂದಿಗೆ ಸವಿಯಲು ಕೊಡಿ.

ಎಲ್ಲಾ ಮಸಾಲೆ ರುಬ್ಬಿಕೊಳ್ಳಲು ಟೈಮ್ ಇಲ್ಲ ಅಂದ್ರೆ, ಅಕ್ಕಿ, ತರಕಾರಿಗಳನ್ನು ಹುರಿದುಕೊಂಡು ಶುಂಠಿ - ಬೆಳ್ಳುಳ್ಳಿ ಪೇಸ್ಟ್ ಹಾಗು ಹಸಿ ಮೆಣಸಿನಕಾಯಿಯನ್ನು ಉದ್ದಕ್ಕೆ ಸೀಳಿ ಹಾಕಿ, ಕೊನೆಯಲ್ಲಿ ಉಪ್ಪು, 1/2 - 1 ಚಮಚ ಗರಂ ಮಸಾಲ ಪುಡಿ ಹಾಗು ಸ್ವಲ್ಪ ಕೊತ್ತಂಬರಿ ಸೊಪ್ಪು, ನೀರು ಸೇರಿಸಿ ಬೇಯಿಸಿದರೆ ದಿಡೀರ್ ಪಲಾವ್ ಸಿದ್ದ.

ಮಕರ ಸಂಕ್ರಾಂತಿ ಹಬ್ಬ (Makara Sankranthi)

ನಾನು ಈ ಸಲ ಮಾಡಿದ ಸಂಕ್ರಾಂತಿ ಹಬ್ಬದ ಸ್ಪೆಷಲ್ ಅಡುಗೆಗಳು: ಎಳ್ಳು-ಬೆಲ್ಲ, ಸಿಹಿ ಪೊಂಗಲ್, ಕೊಬ್ಬರಿ ಬರ್ಫಿ.

ಎಳ್ಳು-ಬೆಲ್ಲ ಕ್ಕೆ ಬೇಕಾಗುವ ಸಾಮಗ್ರಿಗಳು

ನೆಲಕಡಲೆ- ೧ ಕಪ್
ಹುರಿಗಡಲೆ- ೧ ಕಪ್
ಬೆಲ್ಲ -೧/೨ ಕಪ್
ಕೊಬ್ಬರಿ ತುಂಡು -೧/೨ ಕಪ್ (ಸಣ್ಣಗೆ ಆಯತಾಕಾರದ ತುಂಡುಗಳು)
ಎಳ್ಳು - ೧ ಹಿಡಿ

ಎಳ್ಳನ್ನು ಎಣ್ಣೆ ಹಾಕದೆ ಸಿಡಿಯುವ ತನಕ ಹುರಿದು ತೆಗೆದಿಡಿ.
ನೆಲಕಡಲೆಯನ್ನು ಎಣ್ಣೆ ಹಾಕದೆ ಹುರಿದು ತಣ್ಣಗಾದ ನಂತರ ಸಿಪ್ಪೆಯನ್ನು ತೆಗೆದು, ೨ ಭಾಗ ಮಾಡಿರಿ. ಕೊನೆಯಲ್ಲಿ ಎಳ್ಳು, ನೆಲ ಕಡಲೆ, ಹುರಿಕಡಲೆ, ಬೆಲ್ಲ ಹಾಗು ಕೊಬ್ಬರಿ ತುಂಡನ್ನು ಬೆರೆಸಿದರೆ ಎಳ್ಳು-ಬೆಲ್ಲ ಸಿದ್ದ.

ಸಿಹಿ ಪೊಂಗಲ್ ಗೆ ಬೇಕಾಗುವ ಸಾಮಗ್ರಿಗಳು

ಅಕ್ಕಿ - ೧/೨ ಕಪ್
ಹೆಸರುಬೇಳೆ- ೧/೨ ಕಪ್
ನೀರು- ೨ ಕಪ್
ಹಾಲು - ೨ ಕಪ್
ಏಲಕ್ಕಿ ಬೀಜ - ೬ (ಪುಡಿ ಮಾಡಿದ್ದು)
ಬೆಲ್ಲ - ೧/೨ ಕಪ್
ತುಪ್ಪ- ೨ ಚಮಚ
ದ್ರಾಕ್ಷಿ ಹಾಗು ಗೋಡಂಬಿ - ಸ್ವಲ್ಪ

ಹೆಸರು ಬೇಳೆ ಯನ್ನು ಘಮ್ ಪರಿಮಳ ಬರುವ ತನಕ ಹುರಿದು, ಅಕ್ಕಿ ಯ ಜೊತೆ ಸೇರಿಸಿ ಕುಕ್ಕರಿನಲ್ಲಿ ನೀರು ಹಾಗು ಹಾಲು ಸೇರಿಸಿ ಬೇಯಲು ಇಡಿ. ಅಕ್ಕಿ ಮತ್ತು ಬೇಳೆ ಬೆಂದ ನಂತರ, ಒಂದು ಪಾತ್ರೆಯಲ್ಲಿ ಸ್ವಲ್ಪ ನೀರು ಹಾಕಿ, ಬೆಲ್ಲವನ್ನು ಕರಗಲು ಬಿಡಿರಿ. ಬೆಲ್ಲ ಕರಗಿದ ನಂತರ ಬೇಯಿಸಿದ ಅಕ್ಕಿ, ಬೇಳೆಯನ್ನು ಹಾಕಿ, ಸಣ್ಣ ಉರಿಯಲ್ಲಿಟ್ಟು ಚೆನ್ನಾಗಿ ಬೆರೆಸಿರಿ. ಕೊನೆಯಲ್ಲಿ ತುಪ್ಪದಲ್ಲಿ ಹುರಿದ ಗೋಡಂಬಿ ಹಾಗು ದ್ರಾಕ್ಷಿ ಯನ್ನು ಸೇರಿಸಿದರೆ, ಸಿಹಿ ಪೊಂಗಲ್ ಸವಿಯಲು ರೆಡಿ.

ತೆಂಗಿನಕಾಯಿ ಬರ್ಫಿ

ಬೇಕಾಗುವ ಸಾಮಗ್ರಿಗಳು
ತೆಂಗಿನ ತುರಿ- ೨ ಕಪ್
ನೀರು - ೨ ಕಪ್
ಹಾಲು - ೫ ಚಮಚ
ಸಕ್ಕರೆ - ೧- ೧೧/೨ ಕಪ್
ಏಲಕ್ಕಿ - ೬ (ಸಣ್ಣಗೆ ಪುಡಿ ಮಾಡಿ)
ತುಪ್ಪ - ೮ ಚಮಚ (೩ tablespoon)

ತೆಂಗಿನ ತುರಿಯನ್ನು ಘಮ್ ಎಂದು ಪರಿಮಳ ಬರುವ ತನಕ ಹುರಿದು, ಬದಿಯಲ್ಲಿಡಿ.
ಒಂದು ಬಾಣಲೆಯಲ್ಲಿ ನೀರು ಮತ್ತು ಸಕ್ಕರೆ ಹಾಕಿಕೊಂಡು ಒಂದೆಳೆ ಪಾಕ ಬರುವ ತನಕ ಕುದಿಸಬೇಕು.
ಈ ಹಂತದಲ್ಲಿ ಹಾಲು ಹಾಕಿ, ಏನಾದರು ಸಕ್ಕರೆಯಲ್ಲಿದ್ದ ಕಸ ಮೇಲೆ ಬಂದರೆ ತೆಗೆಯಬಹುದು.
ಒಂದೆಳೆ ಪಾಕಕ್ಕೆ ತೆಂಗಿನ ತುರಿಯನ್ನು ಸೇರಿಸಿಕೊಂಡು, ತುಪ್ಪ ಸೇರಿಸಿ ಥಳ ಬಿಡುವ ತನಕ (೫ ನಿಮಿಷ) ತಿರುಗಿಸಬೇಕು. ನಂತರ ಇದನ್ನು ತುಪ್ಪ ಸವರಿದ ಪ್ಲೇಟ್ ಗೆ ಹಾಕಿ, ಸ್ವಲ್ಪ ತಣ್ಣಗಾದ ನಂತರ ತುಂಡು ಮಾಡಿದರೆ, ಸ್ವೀಟ್ ರೆಡಿ.

ಹೊಸವರುಷದ ಶುಭಾಶಯಗಳು

ಹೊಸ ವರುಷವು ಎಲ್ಲರಿಗೂ ಹರುಷ ತರಲಿ...
(ಫೋಟೊ: ಸೋಮೇಶ್ವರ ಕಡಲು ತೀರ, ಮಂಗಳೂರು)

ಬದನೆಕಾಯಿ ಗೊಜ್ಜು / BRINJAL GOJJU / BAINGAN BARTHA

ಬೇಕಾಗುವ ಸಾಮಗ್ರಿಗಳು:

ಗುಳ್ಳ ಬದನೆ - 1
ಈರುಳ್ಳಿ (ಸಣ್ಣಗೆ ಹೆಚ್ಚಿದ್ದು) - 1 ಕಪ್
ಹಸಿ ಮೆಣಸು- 2 (ಸಣ್ಣಗೆ ಸೀಳಿದ್ದು)
ಹುಣಸೆ ಹಣ್ಣಿನ ರಸ- 4 ಚಮಚ
ಬೆಲ್ಲ - ಸ್ವಲ್ಪ
ಉಪ್ಪು - ರುಚಿಗೆ ತಕ್ಕಷ್ಟು
ಎಣ್ಣೆ - 5 ಚಮಚ
ಒಗ್ಗರಣೆಗೆ - ಸ್ವಲ್ಪ ಎಣ್ಣೆ, ಸಾಸಿವೆ, ಹಿಂಗು, ಕರಿಬೇವು, ಬೆಳ್ಳುಳ್ಳಿ
ಬದನೇಕಾಯಿಯನ್ನು ತೊಳೆದುಕೊಂಡು, ಸ್ವಲ್ಪ ಎಣ್ಣೆಯನ್ನು ಸವರಬೇಕು. ನಂತರ ಒಲೆಯ ಕೆಂಡದಲ್ಲಿ ಇಟ್ಟು 5 ನಿಮಿಷಕ್ಕೊಮ್ಮೆ ಬದನೆಕಾಯಿಯ ಬದಿಯನ್ನು ತಿರುಗಿಸುತ್ತಾ ಸಿಪ್ಪೆ ಚೆನ್ನಾಗಿ ಬಾಡುವ ತನಕ ಸುಡಬೇಕು. ಒಲೆ ಇಲ್ಲದಿದ್ದರೆ, ಕಾವಲಿಗೆಯಲ್ಲಿ ಎಣ್ಣೆ ಸವರಿ ಮಾಡಬಹುದು. ಎಲ್ಲಾ ಬದಿಗಳನ್ನು ಸಮವಾಗಿ ಸುಟ್ಟ ನಂತರ, ತಣ್ಣಗೆ ಅದ ಮೇಲೆ, ಸಿಪ್ಪೆಯನ್ನು ಕೈಯಿಂದ ಎಳೆದು ತೆಗೆಯಬೇಕು. ನಂತರ ಇದನ್ನು ಒಂದು ಪಾತ್ರೆಗೆ ಹಾಕಿ, ಕೈಯಿಂದ ಅಥವಾ ಸೌಟಿನ ಸಹಾಯದಿಂದ, ಸಣ್ಣಗೆ ಜಜ್ಜಿ, ಬದಿಯಲ್ಲಿಡಿ.
ಇನ್ನು, ಒಂದು ಬಾಣಲೆಗೆ, ಎಣ್ಣೆಯನ್ನು ಹಾಕಿ, ಹಸಿಮೆಣಸು ಸೇರಿಸಿ, ಈರುಳ್ಳಿಯನ್ನು ಚೆನ್ನಾಗಿ ಬಣ್ಣ ಬರುವ ತನಕ ಹುರಿಯಿರಿ. ಕೊನೆಯಲ್ಲಿ ಇದಕ್ಕೆ ಜಜ್ಜಿದ ಬದನೆಕಾಯಿಯನ್ನು ಸೇರಿಸಿ, ಹುಣಸೆ ರಸ, ಸ್ವಲ್ಪ ಬೆಲ್ಲ ಹಾಗು ರುಚಿಗೆ ತಕ್ಕಷ್ಟು ಉಪ್ಪು ಸೇರಿಸಿ, ಸಣ್ಣ ಉರಿಯಲ್ಲಿ, 5 ನಿಮಿಷ ಬೇಯಿಸಿರಿ. ಇದಕ್ಕೆ ಒಗ್ಗರಣೆ ಸೇರಿಸಿ, ಕೊನೆಯಲ್ಲಿ ಕೊತ್ತಂಬರಿ ಸೊಪ್ಪಿನಿಂದ ಅಲಂಕಾರ ಮಾಡಿ, ಸವಿಯಲು ಕೊಡಿರಿ.
ಇದನ್ನು ಚಪಾತಿ ಅಥವಾ ಅನ್ನದೊಂದಿಗೆ ಉಪಯೋಗಿಸಬಹುದು.

ಪಾಲಕ್ ಪರೋಟ ಹಾಗು ಎಲೆಕೋಸು ಚಟ್ನಿ (Palak Parota and Cabbage chutny)

ಬೇಕಾಗುವ ಸಾಮಗ್ರಿಗಳು:
ಪಾಲಕ್ ಸೊಪ್ಪು (ಸಣ್ಣಗೆ ಹೆಚ್ಚಿದ್ದು)- ೧ ಕಪ್
ಗೋಧಿ ಹಿಟ್ಟು- ೩ ಕಪ್
ಉಪ್ಪು- ರುಚಿಗೆ ತಕ್ಕಷ್ಟು
ಮೇಲಿನ ಎಲ್ಲ ಸಾಮಗ್ರಿಗಳನ್ನು, ಬೇಕಾದಷ್ಟು ನೀರು ಬೆರೆಸಿಕೊಂಡು ಚಪಾತಿ ಹಿಟ್ಟಿನ ಹದಕ್ಕೆ ನಾದಿ ಇಟ್ಟುಕೊಳ್ಳಬೇಕು. ಸಣ್ಣ ಉಂಡೆಯನ್ನು ಮಾಡಿಕೊಂಡು, ಮೇಲುಗಡೆಗೆ ಸ್ವಲ್ಪ ಗೋಧಿ ಪುಡಿಯನ್ನು ಹರಡಿ, ಚಪಾತಿಯನ್ನು ಲಟ್ಟಿಸಿಕೊಂಡು, ಕಾದ ಕಾವಲಿಯಲ್ಲಿ ಹಾಕಿ ಎರಡು ಬದಿ ಬೇಯಿಸಿದರೆ, ಪಾಲಕ್ ಚಪಾತಿ ಅಥವಾ ಪಾಲಕ್ ಪರೋಟ ತಿನ್ನಲು ರೆಡಿ.

ಪಾಲಕ್ ಅತ್ಯಂತ ಆರೋಗ್ಯಕರ ತರಕಾರಿ. ಇದರಲ್ಲಿ ಕಬ್ಬಿಣ, ಕ್ಯಾಲ್ಸಿಯಂ, ವಿಟಮಿನ್ ಎ ಹಾಗು ಸಿ ಹೇರಳವಾಗಿ ಲಭಿಸುತ್ತದೆ (http://en.wikipedia.org/wiki/Spinach).

ಚಟ್ನಿ ಗೆ ಬೇಕಾಗುವ ಸಾಮಗ್ರಿಗಳು:
ಎಲೆಕೋಸು (ಸಣ್ಣಗೆ ಹೆಚ್ಚಿದ್ದು)- ೧ ಕಪ್
ಈರುಳ್ಳಿ (ಸಣ್ಣಗೆ ಹೆಚ್ಚಿದ್ದು)- ೧ ಕಪ್
ಟೊಮೇಟೊ (ಸಣ್ಣಗೆ ಹೆಚ್ಚಿದ್ದು)- ೧ ಕಪ್
ಹಸಿಮೆಣಸಿನ ಕಾಯಿ-೨
ಎಣ್ಣೆ- ೫ ಚಮಚ
ಜೀರಿಗೆ- ೧/೨ ಚಮಚ
ಕಡಲೆಬೇಳೆ- ೧/೨ ಚಮಚ
ಉದ್ದಿನಬೇಳೆ- ೧/೨ ಚಮಚ
ಉಪ್ಪು- ರುಚಿಗೆ ತಕ್ಕಷ್ಟು

ಒಗ್ಗರೆಣೆಗೆ:
ಸ್ವಲ್ಪ ಎಣ್ಣೆ, ಸಾಸಿವೆ, ಕರಿಬೇವು ಎಲೆ.

ಬಾಣಲೆಯಲ್ಲಿ ಎಣ್ಣೆಯನ್ನು ಬಿಸಿ ಮಾಡಿ, ಜೀರಿಗೆ ಕಡಲೆಬೇಳೆ, ಉದ್ದಿನಬೇಳೆ ಸೇರಿಸಿ ಕೆಂಪಾಗುವ ತನಕ ಹುರಿಯಬೇಕು. ನಂತರ ಈರುಳ್ಳಿ, ಎಲೆಕೋಸು, ಟೊಮೇಟೊ, ಒಂದೊಂದೇ ಸೇರಿಸಿಕೊಂಡು ಸ್ವಲ್ಪ ಹುರಿಯಬೇಕು. ಬಿಸಿ ಆರಿದ ಮೇಲೆ, ರುಚಿಗೆ ತಕ್ಕಷ್ಟು ಉಪ್ಪು ಸೇರಿಸಿ, ಮಿಕ್ಸಿ ಯಲ್ಲಿ ಚಟ್ನಿ ಹದಕ್ಕೆ ರುಬ್ಬಬೇಕು. ಕೊನೆಯಲ್ಲಿ ಒಗ್ಗರಣೆ ಕೊಟ್ಟರೆ ಚಟ್ನಿ ಸವಿಯಲು ಸಿದ್ದ.

ಸೂಚನೆ: ಭಾರತದಲ್ಲಿ ಕ್ಯಾಬೇಜ್ ಚಟ್ನಿ ಮಾಡುವವರು, ಸ್ವಲ್ಪ ಕಡಿಮೆ ಪ್ರಮಾಣದಲ್ಲಿ ಕ್ಯಾಬೇಜ್ ತೆಗೆದುಕೊಂಡು, ಜಾಸ್ತಿ ಹೊತ್ತು ಹುರಿದರೆ ಒಳ್ಳೆಯದು.

ಮೆಣಸುಕಾಯಿ

ಇದಕ್ಕೆ ಯಾಕೆ ಈ ಹೆಸರು ಬಂತು ಎಂದು ನನಗೆ ತಿಳಿದಿಲ್ಲ. ಆದರೆ ನನ್ನ ಅಮ್ಮ ಇದನ್ನು ಮಾಡುತ್ತ ಇದ್ದುದನ್ನು ನೋಡಿ ನಾನು ಕಲಿತೆ. ಇದು ಹವ್ಯಕ ಸಮಾಜ ಬಾಂಧವರ ಒಂದು ಸ್ಪೆಷಲ್ ಅಡುಗೆ.

ಬೇಕಾಗುವ ಸಾಮಗ್ರಿಗಳು:
ಅನಾನಸು ಹೋಳುಗಳು-೧ ಕಪ್
ತೆಂಗಿನತುರಿ-೧ ಕಪ್
ಮೆಣಸು- ೮-೧೦
ಎಳ್ಳು-೨ ಚಮಚ
ಉದ್ದಿನಬೇಳೆ-೧ ಚಮಚ
ಹುಣಿಸೇಹಣ್ಣು- ಸ್ವಲ್ಪ
ಬೆಲ್ಲ- ಸ್ವಲ್ಪ
ಉಪ್ಪು- ರುಚಿಗೆ ತಕ್ಕಷ್ಟು
ಎಣ್ಣೆ- ಸ್ವಲ್ಪ
ಒಗ್ಗರೆಣೆಗೆ:ಸಾಸಿವೆ, 1-ಮೆಣಸು, ಕರಿಬೇವು, ಹಿಂಗು.

ಉದ್ದಿನಬೇಳೆ ಹಾಗು ಎಳ್ಳನ್ನು ಎಣ್ಣೆ ಹಾಕದೆ ಪ್ರತ್ಯೇಕವಾಗಿ ಹುರಿಯಿರಿ. ಕಪ್ಪು ಎಳ್ಳನ್ನು ಉಪಯೋಗಿಸಿದರೆ ಅದರ ಸಿಪ್ಪೆಯನ್ನು ಕೈಯಿಂದ ಉಜ್ಜಿ ಬೇರ್ಪಡಿಸಿ. ನಂತರ ಸ್ವಲ್ಪ ಎಣ್ಣೆ ಹಾಕಿ ಮೆಣಸನ್ನು ಹುರಿದಿಡಿ. ಹಾಗೆಯೆ ತೆಂಗಿನಕಾಯಿ ತುರಿಯನ್ನು ಸ್ವಲ್ಪ ಬಾಡಿಸಿ. ನಂತರ ಇದನ್ನು ನುಣ್ಣಗೆ ರುಬ್ಬಿಡಿರಿ.ಒಂದು ಪಾತ್ರೆಯಲ್ಲಿ ಅನಾನಸು ಹೋಳುಗಳನ್ನು ಸ್ವಲ್ಪ ನೀರು ಸೇರಿಸಿ 5-8 ನಿಮಿಷ ಬೇಯಿಸಿರಿ. ಇದಕ್ಕೆ ರುಬ್ಬಿದ ಮಸಾಲೆಯನ್ನು ಸೇರಿಸಿ, ಬೇಕಾದಷ್ಟು ಪ್ರಮಾಣದಲ್ಲಿ ಉಪ್ಪು, ಹುಳಿ, ಬೆಲ್ಲ ಹಾಗು ನೀರು ಸೇರಿಸಿ ೫ ನಿಮಿಷ ಕುದಿಸಿರಿ. ಸ್ವಲ್ಪ ಎಣ್ಣೆಯಲ್ಲಿ ಸಾಸಿವೆ, ಹಿಂಗು ಮತ್ತು ಕರಿಬೇವು ಸೇರಿಸಿ ಒಗ್ಗರಣೆ ಕೊಡಿರಿ. ಇದು ಅನ್ನದೊಂದಿಗೆ ಸವಿಯಲು ರುಚಿ.
ಮೆಣಸುಕಾಯಿಯನ್ನು ಹಾಗಲಕಾಯಿ ಅಥವಾ ಮಾವಿನ ಹಣ್ಣಿನಿಂದ ಕೂಡ ಮಾಡಬಹುದು.